នៅក្នុងឱកាសអុជទៀនរំឭកចំពោះវិញ្ញាណក្ខន្ធជនរងគ្រោះដោយអំពើសម្លាប់រង្គាលនៃរបបខ្មែរក្រហមដែលបានប្រព្រឹត្តទៅនៅមុខអគារសេតវិមានរបស់ប្រធានាធិបតីសហរដ្ឋអាមេរិកកាលពីរាត្រីថ្ងៃទី១៧ ខែមេសា កន្លងទៅនេះ ដូចអ្នកចូលរួមផ្សេងទៀតដែរ គូសា្វមីភរិយាមួយគូមកពីទីក្រុងសាន់ហូហ្សេ រដ្ឋកាលីហ្វ័នីញ៉ា គឺលោក កោះ ប៊ុនកន បានអំពាវនាវចំពោះរដ្ឋាភិបាលខ្មែរឲ្យជំរុញធ្វើការកាត់ទោសមេខ្មែរក្រហមទាំងអស់ប្រកបដោយភាពយុត្តិធម៌។
លោក កោះ ប៊ុនកន ថ្លែងដូច្នេះថា ៖ «ថ្ងៃនេះចំថ្ងៃ១៧ មេសា ហ្នឹង ខ្ញុំមកចូលរួមជាមួយមិត្តភក្ដិបងប្អូនញាតិមិត្តខ្មែរទាំងអស់ដើម្បីរំឭកវិញ្ញាណក្ខន្ធបងប្អូនយើង ឪពុកម្ដាយខ្ញុំអីទាំងអស់ជំនាន់ ប៉ុល ពត ស្លាប់ ១លាន៧សែននាក់ហ្នឹង សូមឲ្យវិញ្ញាណក្ខន្ធអស់លោកអ្នកមានគុណទាំងអស់ ឬក៏បងប្អូនទាំងអស់មេត្តាមកសណ្ឋិតជាមួយពួកយើងខ្ញុំដើម្បីជំរុញតុលាការខ្មែរក្រហមកាត់បានរហ័ស។ ថ្ងៃនេះខ្ញុំរំភើបណាស់មកជួបជុំបងប្អូនយើងពេញហ្នឹង គឺថាច្រើន។ ទាំងគេទាំងខ្ញុំ ខ្ញុំធ្លាប់ជាប់របប ប៉ុល ពត ជិត៤ឆ្នាំ វាឈឺចាប់ហួសឈឺចាប់ អារម្មណ៍នៅនឹកឃើញតែរាល់ថ្ងៃហ្នឹង ព្រោះឪពុកម្ដាយខ្ញុំ បងប្អូនខ្ញុំ ក្មួយជីដូនមួយខ្ញុំស្លាប់រាប់រយនាក់។ ដូច្នេះថ្ងៃនេះសូមគោរពវិញ្ញាណក្ខន្ធប៉ុណ្ណឹង ហើយនិងសុំឲ្យរដ្ឋាភិបាលខ្មែរយើងហ្នឹងជំរុញរឿងកាត់ទោសខ្មែរក្រហមឲ្យបានចប់សព្វគ្រប់ដោយយុត្តិធម៌ដើម្បីឲ្យពួកយើងខ្ញុំស្ងប់ចិត្តខ្លះផង»។
លោក ទឹង យ៉ាប់ ប្រធានអង្គការខ្មែរអាមេរិកាំងដើម្បីសិទ្ធិមនុស្សនិងប្រជាធិបតេយ្យ បានមានប្រសាសន៍ថា ក្រៅពីការជួបជុំដើម្បីរំឭកដល់វិញ្ញាណក្ខន្ធជនរងគ្រោះនោះ អង្គការរបស់លោករួមជាមួយសហគមន៍អន្តរជាតិ ក៏បានធ្វើការអំពាវនាវឲ្យមានការទប់ស្កាត់ជាអន្តរជាតិកុំឲ្យមានរបបសម្លាប់មនុស្សកើតមានជាថ្មីលើពិភពលោកនេះឡើយ។
ទាក់ទងនឹងការនាំអ្នកទទួលខុសត្រូវចំពោះការសម្លាប់រង្គាលនៅកម្ពុជាដើម្បីយុត្តិធម៌ពិតមួយនោះ លោកឲ្យដឹងផងដែរ សម្ព័ន្ធក្រុមការងាររបស់លោកដែលដឹកនាំដោយបណ្ឌិត នូ លក្ខិណា នឹងធ្វើចលនាប្រមូលសាក្សីរស់នៃរបបខ្មែរក្រហមឲ្យបានច្រើនដែលអាចធ្វើទៅបាន ក្នុងប្រទេសអាមេរិកនេះដើម្បីផ្តល់ជាកសិណសាក្សីក្នុងការកាត់សេចក្តីពេញអង្គលើពួកមេខ្មែរក្រហមនានាក្នុងពេលខាងមុខនេះ។
លោក ទឹង យ៉ាប់ មានប្រសាសន៍ដូច្នេះថា ៖ «យើងខ្ញុំមានសេចក្ដីរីករាយនិងគាំទ្របណ្ឌិត នូ លក្ខិណា ដែលបានប្រមូលខ្មែរអាមេរិកាំងធ្វើជាសាក្សីដើម្បីកាត់ទោសពួកខ្មែរក្រហម»។
សូមរំឭកថា សហគមន៍អន្តរជាតិនៅឆ្នាំ២០០៩នេះ បានកំណត់យកខែមេសា ជាខែដែលក្រុមសកម្មជនអន្តរជាតិដើម្បីការការពារការវិលត្រឡប់នៃរបបសម្លាប់រង្គាល ធ្វើសកម្មភាពជាមួយគ្នា ដោយរំឭកដល់អំពើឃោរឃៅផ្សេងៗដែលបានកើតឡើងនៅប្រទេសអាល្លឺម៉ង់ ប្រទេសរ៉្វាន់ដា ប្រទេសបូស្នី ប្រទេស Armenia ប្រទេសកម្ពុជា និងទាំងដែលកំពុងកើតឡើងនៅជំរំ Darfur នៃប្រទេសស៊ូដង់។
អ្នកស្រាវជ្រាវនៃរបបឃោរឃៅឲ្យដឹងថា របបសម្លាប់រង្គាលក្នុងប្រទេសទាំង ៦នោះ បានឡើងកាន់កាប់ប្រទេសរបស់ខ្លួនតាមបែបឃោរឃៅនៅខែមេសាទាំងអស់៕