លោក ឌិន ស៊ីវុទ្ធី ជាចៅក្រមជម្រះក្តីបានអានសាលក្រមថា តុលាការសម្រេចផ្តន្ទាទោសលោក ហង្ស ចក្រា ឲ្យជាប់ទោស១២ខែ និងផាកពិន័យជាប្រាក់៩លានរៀល។ សាលក្រមនេះគឺកំបាំងមុខ ប៉ុន្តែចាត់ទុកថាជាចំពោះមុខជនជាប់ចោទ។
សវនាការរយៈពេលខ្លីនិងជាបន្ទាន់នោះបានធ្វើទ្បើងដោយគ្មានជនជាប់ចោទមកបង្ហាញមុខនោះទេ រីឯមេធាវីការពារក្តីលោក ហង្ស ចក្រា មិនបានចូលរួមផងដែរ ដោយសារតែតុលាការបានបដិសេធសំណើរបស់មេធាវីក្នុងការសុំពន្យារពេលសវនាការនោះទៅថៃ្ងក្រោយ។
លោក ជូង ជូងី ជាមេធាវីរបស់លោក ហង្ស ចក្រា ដែលជាចាងហ្វាងកាសែតខែ្មរម្ចាស់ស្រុកបានមានប្រសាសន៍ប្រតិកម្មថា ការផ្តន្ទាទោសនេះគ្មានយុត្តិធម៌ទេ ៖ «រឿងនេះជារឿងនយោបាយ ប៉ុន្តែបែរជាយកតុលាការជាឧបករណ៍ដើម្បីដាក់ទោសអ្នកសារព័ត៌មានទៅវិញ។ កាសែតចុះផ្សាយរឿងអ្នកនយោបាយ ហើយអ្នកប្ដឹងក៏ជាអ្នកនយោបាយ ដូច្នេះរឿងនេះជារឿងនយោបាយសុទ្ធសាធ»។
លោក ហង្ស ចក្រា ដែលអះអាងថា កំពុងស្ថិតនៅក្នុងប្រទេសកម្ពុជានៅទ្បើយ បានថែ្លងតាមទូរស័ព្ទថា ៖ «មានអីខ្ញុំនៅផ្ទះជាធម្មតា ខ្ញុំបានសម្រេចចិត្តរួចហើយ ខ្ញុំមិនរត់គេច តាមការគិតឃើញរបស់មនុស្សមួយចំនួននោះទេ»។
ទាក់ទងនឹងការផ្តន្ទាទោសខាងលើនេះ លោក សួង ចាន់ថន ជាមេធាវីតំណាងឲ្យរដ្ឋាភិបាលកម្ពុជា បានមានប្រសាសន៍ប្រាប់វិទ្យុអាស៊ីសេរីក្រោយការប្រកាសសាលក្រមនោះថា ៖ «ស្រុកដែលមានច្បាប់ យល់ដឹងអំពីច្បាប់ មានការអនុវត្តច្បាប់ ដូច្នេះការប្ដឹងរបស់យើង គឺយើងដើម្បីអនុវត្តច្បាប់ជៀសវាងកុំឲ្យមានភាពអនាធិបតេយ្យដោយសារចុះព័ត៌មានមិនពិតហ្នឹង។ ហើយចំពោះលទ្ធផលសម្រាប់ខ្ញុំតែម្ដង គឺខ្ញុំអាចទទួលយកបាន»។
តុលាការបានប្រើប្រាស់ច្បាប់ព្រហ្មទណ្ឌអន្តរកាលសម័យអ៊ុនតាក់ ក្នុងការចោទប្រកាន់និងផ្តន្ទាទោសនោះ។
លោក អំ សំអាត ជាប្រធានផែ្នកអង្កេតរបស់អង្គការសិទ្ធិមនុស្សលីកាដូ បានមានប្រសាសន៍អត្ថាធិប្បាយចំពោះការសម្រេចរបស់តុលាការនេះថា ៖ «នេះវាហាក់ដូចជាការមួយបំបិទសិទ្ធិសេរីភាពនៃសារព័ត៌មាន ក៏ដូចបំបិទសិទ្ធិសេរីភាពនៅក្នុងការបញ្ចេញមតិរបស់អ្នកសារព័ត៌មាននេះផងដែរ»។
កាសែតខែ្មរម្ចាស់ស្រុក ត្រូវបានមេធាវីតំណាងរដ្ឋាភិបាលកម្ពុជាបានប្តឹងកាលពីខែឧសភាកន្លងទៅថ្មីៗនេះ ក្រោមបទបរិហារកេរ្តិ៍ និងផ្សាយព័ត៌មានមិនពិត ក្រោយពីកាសែតនេះបានចេញផ្សាយអត្ថបទព័ត៌មានមួយចំនួនកាលពីខែមេសានិងខែឧសភាកន្លងទៅ ដោយបានចោទប្រកាន់ថា លោកនាយករដ្ឋមន្រ្តី ហ៊ុន សែន បានបំបែកសម្បុកមន្រ្តីអាក្រក់និងមន្រ្តីពុករលួយនៅជុំវិញលោក សុខ អាន និងអត្ថបទក្រោមចំណងជើងថា មន្រ្តីនិយមលោក សុខ អាន ប្រឈមមុខនឹងការដកចេញពីតំណែងជាច្រើននាក់។
លោកឧបនាយករដ្ឋមន្រ្តី សុខ អាន ជារដ្ឋមន្រ្តីនៃទីស្តីការគណៈរដ្ឋមន្រ្តីបានបដិសេធចំពោះការចោទប្រកាន់នេះ កាលពីសប្តាហ៍កន្លងទៅ នៅក្នុងសភាជាតិ។ រីឯក្រុមអង្គការសង្គមស៊ីវីលបានរិះគន់ថា ការដាក់ទោសអ្នកកាសែតនោះគឺជាការបំបិទមាត់និងមតិអ្នករិះគន់រដ្ឋាភិបាល៕