លោកនាយករដ្ឋមន្ត្រី ហ៊ុន សែន នៅថ្ងៃទី១៨ ឧសភា បានថ្លែងថា វាជាការមិនអាចទៅរួចទេ និងមិនមានឃ្លាណាមួយក្នុងកិច្ចព្រមព្រៀងក្រុងប៉ារីស ស្ដីពីកម្ពុជា ឆ្នាំ១៩៩១ ដែលអាចយកមកដោះស្រាយទំនាស់តាមព្រំដែនកម្ពុជា-ថៃ នៅតំបន់ប្រាសាទព្រះវិហារឡើយ។
លោកនាយករដ្ឋមន្ត្រីកម្ពុជា បានមានប្រសាសន៍ថា ទំនាស់ព្រំដែននៅតំបន់ប្រាសាទព្រះវិហារនោះ មានតែស្នើឲ្យតុលាការយុត្តិធម៌អន្តរជាតិក្រុងឡាអេ បកស្រាយសាលក្រមដើម្បីបញ្ចប់បញ្ហាទំនាស់ព្រំដែននោះ។
ចំពោះបញ្ហាទំនាស់ព្រំដែននៅតំបន់ប្រាសាទតាក្របី និងប្រាសាទតាមាន់ លោកនាយករដ្ឋមន្ត្រីកម្ពុជា បានមានប្រសាសន៍ថា មានតែការចរចាដោះស្រាយគ្នាប៉ុណ្ណោះ ហើយបើមិនមានការព្រមព្រៀងគ្នាទេ មានតែតំណាងប្រទេសទាំង២ នាំគ្នាប្ដឹងទៅតុលាការអន្តរជាតិឲ្យជួយកាត់សេចក្ដីឲ្យតែប៉ុណ្ណោះ។
លោក ហ៊ុន សែន បានមានប្រសាសន៍បន្ថែមឲ្យដឹងទៀតថា ការដោះស្រាយទំនាស់ព្រំដែនកម្ពុជា-ថៃនេះ មិនអាចពឹងប្រទេសជាមិត្តណាមួយឲ្យជួយអន្តរាគមន៍បានទេ ព្រោះប្រទេសនីមួយៗគេមានផលប្រយោជន៍របស់គេទាក់ទងជាមួយប្រទេសមានទំនាស់ទាំង២។
ប្រតិកម្មចំពោះការលើកឡើងរបស់លោកនាយករដ្ឋមន្រ្តី ហ៊ុន សែន នេះ លោក យឹម សុវណ្ណ អ្នកនាំពាក្យគណបក្ស សម រង្ស៊ី បានមានប្រសាសន៍ថា គណបក្ស សម រង្ស៊ី បានសិក្សាឃើញថា កិច្ចព្រមព្រៀងក្រុងប៉ារីស ស្ដីពីកម្ពុជា កាលពីឆ្នាំ១៩៩១ នេះ មានចំណុចលើកឡើងដើម្បីអាចយកមកប្រើប្រាស់ឲ្យប្រទេសថៃ និងវៀតណាម គោរពអធិបតេយ្យភាព និងបូរណភាពទឹកដីប្រទេសកម្ពុជាបាន។
លោក យឹម សុវណ្ណ បានបន្តមានប្រសាសន៍ទៀតថា ក្នុងកិច្ចព្រមព្រៀងក្រុងប៉ារីស និយាយអំពីកម្ពុជានោះ មានហត្ថលេខីជាប្រទេសមហាអំណាចមួយចំនួនផងដែរ។ ដូចនេះប្រទេសទាំងនោះមានកាតព្វកិច្ចត្រូវជួយកម្ពុជា ក្នុងការការពារបូរណភាពទឹកដីឲ្យផុតពីការឈ្លានពានពីសំណាក់ប្រទេសជិតខាងផងដែរ។
លោក យឹម សុវណ្ណ សមាជិកសភា និងជាអ្នកនាំពាក្យគណបក្ស សម រង្ស៊ី បានមានប្រសាសន៍ទៀតថា លោកនាយករដ្ឋមន្ត្រី ហ៊ុន សែន មានប្រសាសន៍ថា កិច្ចព្រមព្រៀងក្រុងប៉ារីស ស្ដីពីកម្ពុជា មិនអាចយកមកដោះស្រាយបញ្ហាព្រំដែនជាមួយថៃ បាននោះ មកពីលោកមានការខ្លាច។
ចំណែកលោក ប៉ុល ហំម អនុប្រធានគណៈកម្មការនាយកគណបក្សសិទ្ធិមនុស្ស និងជាអ្នកនាំពាក្យគណបក្សសិទ្ធិមនុស្ស បានមានប្រសាសន៍ថា លោកយល់ថា កិច្ចព្រមព្រៀងក្រុងប៉ារីស ស្ដីពីកម្ពុជា នៅតែអាចប្រើជាមូលដ្ឋានបង្អែកដើម្បីដោះស្រាយទំនាស់ព្រំដែនរបស់ប្រទេសកម្ពុជា ជាមួយប្រទេសជិតខាង។
លោក ប៉ុល ហំម បានមានប្រសាសន៍ទៀតថា ដើម្បីការពារបូរណភាពទឹកដីប្រទេសកម្ពុជា ឲ្យបានគង់វង្ស អ្នកដឹកនាំកម្ពុជា ត្រូវតែប្រើគ្រប់មធ្យោបាយក្នុងការស្វែងរកដំណោះស្រាយពាក់ព័ន្ធនឹងបញ្ហាព្រំដែននេះ។
កាលពីថ្ងៃទី២៧ ខែមេសា កន្លងទៅ លោក សម រង្ស៊ី បច្ចុប្បន្នរស់នៅនិរទេសខ្លួននៅប្រទេសបារាំង បានចេញផ្សាយលិខិតមួយទាមទារឲ្យរដ្ឋាភិបាលលោក ហ៊ុន សែន ត្រូវតែចុះចេញដើម្បីឲ្យប្រទេសកម្ពុជា ជៀសវាងសង្គ្រាម និងការបាត់បង់ទឹកដីទាំងខាងលិច និងខាងកើត។
លិខិតចំហនោះបានលើកឡើងមានខ្លឹមសារជាអាទិថា សម្រាប់ប្រទេសកម្ពុជា មធ្យោបាយត្រឹមត្រូវប្រកបដោយប្រសិទ្ធភាពដើម្បីទប់ស្កាត់បរទេសឈ្លានពានមានតែមួយគត់ គឺការទាមទារឲ្យអនុវត្តកិច្ចព្រមព្រៀងទីក្រុងប៉ារីស ស្ដីពីកម្ពុជា ឆ្នាំ១៩៩១។ ដោយសារអនុវត្តកិច្ចព្រមព្រៀងនោះ នឹងតម្រូវឲ្យទាំងប្រទេសថៃ និងវៀតណាម បញ្ឈប់ការឈ្លានពានរបស់ខ្លួនមកលើប្រទេសកម្ពុជា រដ្ឋាភិបាល ហ៊ុន សែន មិនហ៊ានលើកយកកិច្ចព្រមព្រៀងទីក្រុងប៉ារីសនេះមកសំអាងទេ ពីព្រោះខ្លាចប្រទេសវៀតណាមជំទាស់។
សូមជម្រាបថា កិច្ចព្រមព្រៀងក្រុងប៉ារីស ឆ្នាំ១៩៩១ ស្ដីពីកម្ពុជា មានប្រទេសចំនួន១៨ ជាហត្ថលេខី ក្នុងនោះមានប្រទេសថៃផងដែរ។ កិច្ចព្រមព្រៀងនោះមានចែកលម្អិតជាកិច្ចព្រមព្រៀង២ និងសេចក្ដីថ្លែងការណ៍១។ កិច្ចព្រមព្រៀងទី១ ស្ដីពីការដោះស្រាយជម្លោះនៅកម្ពុជា។ កិច្ចព្រមព្រៀងទី២ និយាយអំពីការគោរពឯករាជភាព អធិបតេយភាព បូរណភាព និងអព្យាក្រឹតរបស់កម្ពុជា។ ចំពោះសេចក្ដីថ្លែងការណ៍ គឺស្ដីពីការកសាងប្រទេសកម្ពុជាឡើងវិញ៕