ក្នុងចំណោមប្រជាពលរដ្ឋអ្នកធ្វើដំណើរដោយម៉ូតូនៅតាមដងផ្លូវក្នុងក្រុងភ្នំពេញ បុរសមួយរូបសុំមិនប្រាប់ឈ្មោះបានបញ្ជាក់ប្រាប់អ្នកយកព័ត៌មានវិទ្យុអាស៊ីសេរីថា ក្នុងអំឡុងប៉ុន្មានថ្ងៃនេះក្រុមមានសមត្ថកិច្ចខាងផ្នែកនគបាលត្រួតពិនិត្យចរាចរណ៍បានចាប់ផាកពិន័យទៅលើអ្នកបើកបរម៉ូតូជាច្រើននាក់នៅជិតស្តាតអូឡាំពិក ដែលការផាកនោះគេឃើញមានភាពច្របូកច្របល់ ពីព្រោះមិនប្រាប់ឲ្យចំមុខថាត្រូវផាកពិន័យទៅលើអ្វី ពីព្រោះម្តងគេថាមកពីអ្នកបើកម៉ូតូមិនដាក់កញ្ចក់ រីឯអ្នកមានដាក់កញ្ចក់ហើយ ប៉ុន្តែគេថាមកពីមិនមានពាក់មួកសុវត្ថិភាពទៅវិញ។
បុរសដដែលបានឲ្យដឹងថា ៖ «អ្នកខ្លះមានកញ្ចក់ ទាររកគ្នាពីរឿងពន្ធ ហើយអ្នកខ្លះគ្នាមានពន្ធ មានស្លាកលេខត្រឹមត្រូវ ទាររកកញ្ចក់ ថាឲ្យបង់ពិន័យត្រឹម៤ពាន់រៀល។ ខ្ញុំចង់សំណូមពរសូមឲ្យក្រសួងមានសមត្ថកិច្ចធ្វើការផ្សាយពីរឿងច្បាប់ចរាចរណ៍ឲ្យបានផុសផុល ថាឥឡូវត្រូវដាក់កញ្ចក់ពាក់មួកសុវត្ថិភាពនិងស្អីផ្សេងៗទៀត ដើម្បីឲ្យគេធ្វើតាម ព្រោះយើងម្ដងរាំង ម្ដងភ្លៀងអ៊ីចឹង ពិបាកគ្នាណាស់មិនដឹងយើងចង់បានន័យថាម៉េច?»។
បញ្ជាក់ប្រាប់ពីបញ្ហានេះដែរ អ្នកបើកបរម៉ូតូម្នាក់ទៀតបានឲ្យដឹងថា គាត់បានឃើញការផាកពិន័យរបស់នគរបាលចរាចរណ៍ហាក់មានភាពអយុត្តិធម៌ ពីព្រោះការផាកនោះគឺឃើញផាកតែប្រជាពលរដ្ឋតូចតាច ឯអ្នកមានឋានៈ ដូចជាមន្ត្រីរាជការផ្សេងៗដែលបើកបរម៉ូតូដោយមិនមានពាក់ស្លាកលេខមិនដាក់កញ្ចក់ ឬមិនពាក់មួកសុវត្ថិភាព គឺភាគច្រើននគរបាលលោកមិនបានធ្វើការផាកពិន័យអ្នកទាំងនោះឡើយ។
អ្នកបើកបរម៉ូតូដដែលបានមានប្រសាសន៍ថា ៖ «ឲ្យតែម៉ូតូមន្រ្តីរាជការអីមិនហ៊ានប៉ះពាល់ទេ...។ ដូចថារដ្ឋាភិបាលធ្វើឲ្យមានភាពតឹងរ៉ឹង បើថាយើងចាប់ ចាប់ទាំងអស់គ្នាតែម្ដង»។
ក្រៅពីមានការទិតៀនថា សមត្ថកិច្ចនគរបាលចរាចរណ៍ជើងគោកបានធ្វើការផាកពិន័យអ្នកបើកម៉ូតូមិនដាក់កញ្ចក់និងមិនពាក់មួកសុវត្ថិភាពនោះ អ្នកធ្វើដំណើរតាមដងផ្លូវក៏បានសម្ដែងការមិនពេញចិត្តផងដែរថា សមត្ថកិច្ចខ្លះនៅពេលដែលធ្វើការផាកពិន័យនោះគឺមិនបានចេញវិក្កយបត្រឲ្យដល់អ្នកដែលត្រូវបានពិន័យនោះទេ ហើយម្យ៉ាងទៀតការផាកនោះក៏តម្រូវឲ្យបង់ប្រាក់ច្រើនហួសកំណត់។
អ្នកធ្វើដំណើរតាមដងផ្លូវបានឲ្យដឹងថា ៖ «គេទារយើងបង់១២០០០រៀលអីឯណោះ។ ១២០០០រៀលហ្នឹង គឺយើងអត់ស្លាកលេខ ឬមួយក៏ម៉ូតូយើងអត់មានកញ្ចក់ ឬមួយក៏អត់មានមួក (មួកសុវត្ថិភាព) អ៊ីចឹង ។ ខ្ញុំចង់ឲ្យថា បើសិនជាប៉ូលិសផាកគួរតែឲ្យបង្កាន់ដៃអ៊ីចឹងទៅ។ ពេលដែលមានស្លាករថយន្តខ.ម ឬក៏ម៉ូតូស្លាកខ.ម អ៊ីចឹង អត់ចាប់ទេ ខ្ញុំឆ្ងល់ត្រង់បញ្ហាហ្នឹង»។
ចំពោះការចោទប្រកាន់ទាំងអម្បាលម៉ាណនេះ នាយរងទី១នៃការិយាល័យនគរបាលចរាចរណ៍ជើងគោកក្រុងភ្នំពេញ លោកអនុសេនីយ៍ឯក ចេវ ហាក់ បានមានប្រសាសន៍ថាអាចមានកំហុសខុសឆ្គងខ្លះរបស់សមត្ថកិច្ចចរាចរណ៍ ប៉ុន្តែមានតិចតួចជាលក្ខណៈបុគ្គលមួយចំនួនប៉ុណ្ណោះ។ លោកបានបន្តថាតាមច្បាប់ចរាចរណ៍ គឺការផាកពិន័យរបស់នគរបាលត្រូវតែមានចេញវិក្កយបត្រឲ្យអ្នកដែលត្រូវបានគេផាក។
លោកអនុសេនីយ៍ឯក ចេវ ហាក់ បានមានប្រសាសន៍ថា ៖ «ចេញជាគោលការណ៍គឺត្រូវមានចេញបង្កាន់ដៃនូវមួយកំហុសៗ គឺត្រូវសរសេរលើកំណត់ហេតុហ្នឹងឲ្យបានច្បាស់។ ប៉ុន្តែបើសិនជាគាត់មិនចេញបង្កាន់ដៃឲ្យទេ ថវិកានេះមិនបានចូលរដ្ឋទេ គឺចូលសមត្ថកិច្ចដែលអនុវត្តខុសហ្នឹងហើយ។ សូមឲ្យបងប្អូនមន្រ្តីរាជការទាំងអស់ដែលជាអ្នកអនុវត្តច្បាប់ ដែលជាអ្នកត្រូវធ្វើគំរូដល់ប្រជាពលរដ្ឋត្រូវគោរពច្បាប់ទាំងអស់គ្នា ព្រោះច្បាប់មានតម្លាភាព មានសិទ្ធិស្មើភាពគ្នា ចំពោះមុខច្បាប់ មិនមែនផាកតែបងប្អូនប្រជាពលរដ្ឋ មន្រ្តីរាជការអត់ផាកទេ»។
នាយរងទី១នៃការិយាល័យនគរបាលជើងគោកក្រុងភ្នំពេញ បានបញ្ជាក់ប្រាប់ទៀតដែរថា ទោះជាយ៉ាងណាក៏ដោយការអនុវត្តច្បាប់ចរាចរណ៍ជើងគោក នឹងត្រូវចាប់ផ្ដើមឲ្យបានតឹងរ៉ឹងចាប់ពីពេលនេះទៅហើយ ប៉ុន្តែមិនបានធ្វើឡើងដោយគំហុកតែម្ដងនោះទេ គឺធ្វើការផាកបណ្ដើរនិងអប់រំបណ្ដើរដើម្បីផ្សព្វផ្សាយជូនដំណឹងដល់ប្រជាពលរដ្ឋឲ្យបានកាន់តែច្បាស់អំពីការគោរពច្បាប់ចរាចរណ៍ជើងគោកនោះដើម្បីសុវត្ថិភាពទាំងអស់គ្នា។
ទាក់ទងនឹងបញ្ហានេះដែរ ប្រធាននាយកដ្ឋានសណ្ដាប់ធ្នាប់នៃក្រសួងមហាផ្ទៃ លោក ផូ ខន បានមានប្រសាសន៍ថា តាមពិតទៅរាជរដ្ឋាភិបាលបានចេញច្បាប់ចរាចរណ៍ដែលចូលជាធរមានចាប់តាំងពីថ្ងៃទី៨ ខែកុម្ភៈ ឆ្នាំ ២០០៧ មកម៉្លេះ ប៉ុន្តែដោយហេតុថាប្រជាពលរដ្ឋមិនទាន់បានយល់ដឹងពីច្បាប់នោះគ្រប់គ្នាទើបទាមទារឲ្យមានផ្សព្វផ្សាយឲ្យបានច្រើនជាងនេះ។
លោកបន្តថារហូតមកដល់ពេលនេះការតម្រូវឲ្យមានការអនុវត្ដច្បាប់ចរាចរណ៍ជើងគោកនោះ គឺមានរយៈពេលជាង១ឆ្នាំហើយ ដូច្នេះក្រុមមានសមត្ថកិច្ចត្រូវតែចាប់ផ្ដើមជំរុញឲ្យមានការអនុវត្ដច្បាប់នេះឲ្យបានតឹងរ៉ឹងបំផុត។
លោក ផូ ខន បានឲ្យដឹងថា ៖ «ព្រោះគ្រោះថ្នាក់វាមានកាន់តែច្រើន ហើយផ្សព្វផ្សាយអប់រំប្រជាពលរដ្ឋ ធ្វើយ៉ាងម៉េចក្នុងការបើកបរហ្នឹងទាំងពាក់មួកទាំងអីហ្នឹង។ ទម្លាប់របស់គាត់ពីមុនអត់ទេ ដល់អ៊ីចឹងវិធានការថ្មីអ៊ីចឹង យើងធ្វើម៉េចឲ្យការងារហ្នឹងឆ្លងទៅបន្តិចម្ដងៗ»។
ចំពោះការជំរុញឲ្យមានការអនុវត្ដច្បាប់ចរាចរណ៍ផ្លូវគោកនេះ អនុប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណការនិងដឹកជញ្ជូន លោក ព្រាប ចាន់វិបុល បានមានប្រសាសន៍ប្រាប់ផងដែរថា បើតាមការអង្កេតរបស់ក្រសួងសាធារណការនិងដឹកជញ្ជូនដែលមានតួនាទីក្នុងការផ្សព្វផ្សាយច្បាប់ចរាចរណ៍នោះ គឺបានឃើញថាបើនៅទីក្រុងភ្នំពេញប្រជាពលរដ្ឋអាចយល់បានច្រើនពីច្បាប់ចរាចរណ៍នោះប្រមាណ៦០% ប៉ុន្តែសម្រាប់ប្រជាពលរដ្ឋនៅតាមខេត្តនានាវិញ គេឃើញថា បានយល់ដឹងនៅមានកម្រិតទាបនៅឡើយ គឺមានប្រមាណតែពី២០%-៣០%ប៉ុណ្ណោះ។ លោកបានបន្តថាដូច្នេះគេត្រូវតែបង្កើនការអប់រំផ្សព្វផ្សាយនូវការអនុវត្ដច្បាប់ចរាចរណ៍ផ្លូវគោកឲ្យបានទូលំទូលាយដល់មូលដ្ឋានទើបការគោរពច្បាប់មានប្រសិទ្ធភាព។
លោក ព្រាប ចាន់វិបុល បានឲ្យដឹងថា ៖ «យើងនឹងជំរុញការផ្សព្វផ្សាយហ្នឹងឲ្យបានខ្លាំងក្លាថែមទៀត ដូចថាហៅខេត្តអីមក គឺយើងនឹងឲ្យខេត្តហ្នឹងចុះអប់រំនៅតាមភូមិឃុំ។ មានខេត្តខ្លះគេអនុវត្តហើយ គេមានលទ្ធភាពនឹងអាចចុះអប់រំតាមឃុំបាន»។
ប្រជាពលរដ្ឋអ្នកធ្វើចរាចរណ៍តាមដងផ្លូវសាធារណៈមួយចំនួននៅទីក្រុងភ្នំពេញ ជាពិសេសអ្នកបើកបរទោចក្រយានយន្ដឬម៉ូតូ បានបញ្ជាក់ប្រាប់ដែរថាតាមពិតទៅគេក៏ចង់ឲ្យមានការអនុវត្ដច្បាប់ចរាចរណ៍ផ្លូវគោកនេះឲ្យបានហ្មត់ចត់ផងដែរ ដើម្បីចៀសវាងនៅគ្រោះថ្នាក់ផងទាំងឡាយដែលកើតឡើងជាយថាហេតុតាមដងផ្លូវនេះ ប៉ុន្តែទន្ទឹមនោះគឺគេចង់ឲ្យមានការគោរពច្បាប់ទាំងអស់គ្នា ទាំងក្រុមមានសមត្ថកិច្ចនគរបាលត្រួតពិនិត្យចរាចរណ៍ ព្រមទាំងមន្ត្រីរាជការគ្រប់លំដាប់ថ្នាក់ទាំងអស់ ដោយកុំគប្បីសង្កត់ធ្ងន់តែមកលើប្រជាពលរដ្ឋតូចតាចដែលសមត្ថកិច្ចមួយចំនួនបានធ្វើកន្លងមកហើយនោះ៕