សាលាក្រុងភ្នំពេញ នៅថ្ងៃទី ៨ ខែសីហា ឆ្នាំ ២០១១ បានបញ្ជូនពលទាហានស្ម័គ្រចិត្ត ចំនួន ៨០០ នាក់ទៅហ្វឹកហាត់ នៅតាមបន្ទាយយោធានានា ដើម្បីរៀនសូត្រអំពីយុទ្ធសាស្ត្រធ្វើសង្គ្រាម ដើម្បីការពារបូរណភាពទឹកដី នៅគ្រាដែលកម្ពុជាលើកឡើងថា កងទ័ពថៃព្យាយាមឈ្លានពាន និងដណ្ដើមយកទឹកដីកម្ពុជា នៅខេត្តព្រះវិហារ និងខេត្តឧត្តរមានជ័យ មិនបានសម្រេចកន្លងមក។
ពិធីជាផ្លូវការ បានធ្វើឡើងនៅថ្ងៃទី ៨ ខែសីហា ឆ្នាំ ២០១១ នៅឯពហុកីឡាដ្ឋានជាតិអូឡាំពិក នាក្រុងភ្នំពេញ ក្រោមអធិបតីរបស់អភិបាលក្រុងភ្នំពេញ លោក កែប ជុតិមា និងមានប្រជាពលរដ្ឋ សិស្សសាលា និងពលទាហានស្ម័គ្រចិត្ត មកចូលរួមសរុប ៣.០០០ នាក់។
លោក កែប ជុតិមា និងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន បានកោតសរសើរទឹកចិត្តក្លាហានរបស់យុវជនស្ម័គ្រចិត្ត និងការលះបង់របស់ក្រុមគ្រួសារ ឲ្យចូលបម្រើក្នុងជួរកងទ័ព នៅពេលដែលប្រទេសជាតិត្រូវការ។
លោក កែប ជុតិមា ៖ «យើងត្រូវតែមានកងទ័ព ដែលអង់អាចក្លាហាន ក្នុងការការពារទឹកដីរបស់យើង។ ហើយនេះ គឺជាវីរភាព ជាកាតព្វកិច្ចដ៏ឧត្ដុង្គឧត្ដមរបស់យុវជន យុវនារី កម្ពុជាយើងទាំងអស់គ្នា»។
មេបញ្ជាការកងទ័ពជើងគោក លោកឧត្ដមសេនីយ៍ឯក ព្រំ ឌិន និងជាមេបញ្ជាការយោធភូមិភាគពិសេសទី ៣ នៃកងយោធពលខេមរភូមិន្ទកម្ពុជា និងជាប្រធានគណៈកម្មការជ្រើសរើសពលទាហាន មានប្រសាសន៍ថា ការជ្រើសរើសកន្លងមក គឺបានគ្រប់ចំនួនតាមផែនការរបស់រដ្ឋាភិបាលហើយ។
លោក ព្រំ ឌិន ៖ «ខ្ញុំសូមថ្លែងអំណរគុណចំពោះក្រុមគ្រួសារយុវជនស្ម័គ្រចិត្តទាំងអស់ ដែលបានឃើញច្បាស់ពីបុព្វហេតុការពារជាតិមាតុភូមិ បំផុស លះបង់ ជំរុញឲ្យប្ដីសីកូនចៅ ចូលបម្រើក្នុងជួរកងយោធពលខេមរភូមិន្ទ ដើម្បីការពារជាតិមាតុភូមិនៃយើង»។
ពលទាហានស្ម័គ្រចិត្តម្នាក់ នៅក្នុងចំណោម ៨០០ នាក់ ឈ្មោះ សាន សាម៉ាឌី អាយុ ២២ ឆ្នាំ នៅខណ្ឌដង្កោជាយក្រុងភ្នំពេញ ជាអតីតកម្មកររោងចក្រកាត់ដេរ បានថ្លែងថា លោកស្ម័គ្រចិត្តចូលបម្រើក្នុងជួរកងទ័ព និងមានការយល់ព្រមពីក្រុមគ្រួសារផងដែរ។
លោក សាន សាម៉ាឌី បញ្ជាក់បន្ថែម ៖ «បាទ! ខ្ញុំមានអារម្មណ៍សប្បាយ ដែលបានចូលបម្រើក្នុងកងទ័ព ដើម្បីបូរណភាពទឹកដីយើង។ ខ្ញុំនឹងតស៊ូហ្វឹកហាត់ឲ្យបាន ១០០% ដើម្បីបូរណភាពទឹកដីយើង»។
ក្រោយពីបានប្រកាស និងធ្វើពិធីស្វាគមន៍នោះមក ពលទាហានស្ម័គ្រចិត្ត ៨០០ នាក់នោះ គេបានដឹកពលទាហានទាំងនោះ តាមរថយន្តយោធាធំៗ ចេញពីទីក្រុងភ្នំពេញ ឆ្ពោះទៅកាន់បន្ទាយយោធា ដើម្បីរៀនសូត្រ និងហ្វឹកហាត់យុទ្ធសាស្ត្រធ្វើសង្គ្រាម ដើម្បីការពារទឹកដីនៅខេត្តព្រះវិហារ និងខេត្តឧត្តរមានជ័យ។
គេបានឃើញក្រុមគ្រួសារមួយចំនួន ដូចជាម្ដាយ និងភរិយាពលទាហាន បានអោបក្រសោបគ្នា និងសម្រក់ទឹកភ្នែក នៅមុនការឡើងរថយន្តបែកគ្នានោះ។
ការជ្រើសរើសពលទាហានស្ម័គ្រចិត្តនេះ គឺក្រោយពេល ដែលលោកនាយករដ្ឋមន្ត្រី ហ៊ុន សែន ប្រកាសជ្រើសរើសពលទាហាន ចំនួន ៥.០០០ នាក់ កាលពីថ្ងៃទី ១៩ ខែឧសភា ឆ្នាំ ២០១១ កន្លងទៅនេះ។
ពលទាហានស្ម័គ្រចិត្ត ៥.០០០ នាក់នោះ គឺ បីពាន់នាក់ សម្រាប់កងពលធំអន្តរាគមន៍លេខ ២, មួយពាន់នាក់សម្រាប់កងពលតូចថ្មើរជើងលេខ ៤១ និង មួយពាន់នាក់ទៀត សម្រាប់កងពលតូចអន្តរាគមន៍លេខ ៤២។
ក្រៅពីនេះ ក្រសួងការពារជាតិកម្ពុជា ជ្រើសរើសពលទាហាន ៣៥០ នាក់ទៀត សម្រាប់អង្គភាពបញ្ជាការដ្ឋានអង្គរក្ស នៃអគ្គបញ្ជាការដ្ឋាន៕