លោក ហ៊ុន សែន បានអះអាងយ៉ាងដូច្នេះ ក្នុងពិធីបើកសម្ពោធឲ្យប្រើប្រាស់ជាផ្លូវការទីស្នាក់ការក្រសួងទេសចរណ៍ ដែលមានទីតាំងក្នុងខណ្ឌ៧មករា រាជធានីភ្នំពេញ នៅព្រឹកថ្ងៃទី ២៨ កញ្ញា។
ថ្លែងក្នុងឱកាសនេះដែរ លោកនាយករដ្ឋមន្រ្តី ហ៊ុន សែន ក៏បានព្រមានក្រុមបាតុករអាវលឿងថៃ ដែលបាននាំគ្នាធ្វើបាតុកម្មទាមទារយកដីនៅតំបន់ប្រាសាទព្រះវិហាររបស់ខ្មែរនោះថា ៖ «ដោយសារអាបីនាក់បួននាក់ហ្នឹងហើយ បានជាកងទ័ពសៀមឈ្លានពានចូលមកវត្តកែវសិខាគិរីស្វរៈ។ ចូលមក ៣នាក់ លោកសង្ឃម្នាក់ យាយជីម្នាក់ អាចារ្យម្នាក់។ ដល់យើងចាប់ធ្វើកំណត់ហេតុ ឥឡូវយកហេតុផលបញ្ជូនទ័ពចូលបណ្ដោយ។ អ៊ីចឹងទេមិនបាច់ចាប់ទេ កុំឆ្ងល់ ដីខ្មែរទេតើ! មកដោយល្បិចកល ហើយមកនេះមិនមែនត្រឹមទាមទារដីទំនាស់ ៤,៦(គីឡូម៉ែត្រការ៉េ)ទេ គឺយកប្រាសាទ ហើយរឿងអីបានមានអាហ្នឹង? ដោយសារនាយករដ្ឋមន្រ្តីនិយាយអ៊ីចឹង ព្រោះនាយករដ្ឋមន្រ្តី គំនិតដើមរបស់គាត់ តាំងពីគាត់នៅធ្វើមេបក្សប្រឆាំង។ ឥឡូវលោកឯងតគ្នា តនៅហួរហ៊ិន ក៏ត តនៅវេទិកាណាក៏ត»។
គួរបញ្ជាក់ថា កាលពីថ្ងៃទី ១៥ កញ្ញា កន្លងទៅ ក្រុមបាតុករអាវលឿងថៃ គាំទ្រនាយករដ្ឋមន្រ្តីថៃ អាភិស៊ិត រាប់ពាន់នាក់ បាននាំគ្នាធ្វើដំណើរមកកាន់ព្រំដែនថៃ ក្នុងខេត្តស្រះកែវ ដែលមានព្រំដែនជាប់នឹងប្រាសាទព្រះវិហាររបស់ខ្មែរ ដោយទាមទារឲ្យប្រជាពលរដ្ឋនិងកងទ័ពខ្មែរចាកចេញពីតំបន់នេះ ដោយអះអាងថា ដីដែលមានទំហំ ៤,៦គីឡូម៉ែត្រការ៉េនៃតំបន់នេះ ជាកម្មសិទ្ធិរបស់ខ្លួន។
ជាមួយគ្នានេះដែរ លោកនាយករដ្ឋមន្រ្តី ហ៊ុន សែន ក៏បានព្រមានចំពោះភាគីថៃ អំពីលទ្ធភាពនៃការចរចានាពេលខាងមុខនឹងទទួលបរាជ័យ ប្រសិនបើពួកគេនៅតែប្រើប្រាស់ផែនទីដែលគូសវាសជាឯកតោភាគីក្នុងការចរចាទៀតនោះ។
លោក ហ៊ុន សែន មានប្រសាសន៍ដូច្នេះ ៖ «ដីខ្មែរគឺដីខ្មែរ ផែនទីដែលអន្តរជាតិទទួលស្គាល់ យើងមិនទទួលស្គាល់ផែនទីណាដែលគូរដោយឯកតោភាគីរបស់ថៃ យកមកចរចា គឺហែកគ្រវាត់ចោលទាំងអស់»។
នាយករដ្ឋមន្រ្តីស្ដីទីរបស់ថៃ កាលពីថ្ងៃទី ២៤ ខែកញ្ញា កន្លងទៅ បានថ្លែងថា ផ្លូវចាស់ប៉ែកខាងជើងដែលមានស្រាប់សម្រាប់ឡើងទៅកាន់ប្រាសាទព្រះវិហារ ជាផ្លូវរួមរវាងកម្ពុជានិងថៃ។
មួយថ្ងៃបន្ទាប់ការថ្លែងនេះ អ្នកនាំពាក្យនិងជារដ្ឋលេខាធិការទីស្ដីការគណៈរដ្ឋមន្រ្តីខ្មែរ គឺលោក ផៃ ស៊ីផាន បានប្រតិកម្មទៅវិញ ដោយចាត់ទុកថាការថ្លែងដែលមិនផ្អែកតាមប្រវត្តិសាស្រ្ដ និងមូលដ្ឋានច្បាប់នៃផែនទីដងរែក ដែលកើតចេញពីអនុសញ្ញាបារាំង-សៀម ឆ្នាំ១៩០៤ សន្ធិសញ្ញាឆ្នាំ ១៩០៧ និងសាលដីការបស់តុលាការយុត្តិធម៌អន្តរជាតិក្រុងឡាអេ ឆ្នាំ១៩៦២។
គួរបញ្ជាក់ថា ការប្រឈមមុខដាក់គ្នារវាងកម្ពុជានិងថៃ នៅតំបន់ប្រាសាទព្រះវិហារ បានចាប់ផ្ដើមឡើងកាលពីថ្ងៃទី ១៥ កក្កដា ឆ្នាំ ២០០៨ ក្រោយពីកម្ពុជាបានដាក់ប្រាសាទព្រះវិហារទៅក្នុងបញ្ជីបេតិកភណ្ឌពិភពលោកមកនោះ៕