ការបដិសេធរបស់លោក ហ៊ុន សែន ធ្វើឡើងក្រោយពីតំណាងរាស្ត្រគណបក្ស សម រង្ស៊ី ចំនួន ៤រូប បានសាកសួររដ្ឋាភិបាលថា តើមេដឹកនាំកំពូលរបស់រដ្ឋាភិបាលកម្ពុជា មានបានផ្សាយព័ត៌មានមិនពិតថ្វាយអតីតព្រះមហាក្សត្រ សម្ដេចព្រះ នរោត្តម សីហនុ ឬទេ នៅពេលដែលមេដឹកនាំរដ្ឋាភិបាលកម្ពុជា បានសរសេរថ្វាយសម្ដេចព្រះ នរោត្តម សីហនុ ថា ពុំមានប្រជាកសិករខ្មែរបាត់បង់ដីស្រែនោះ។
លោក ហ៊ុន សែន នាយករដ្ឋមន្ត្រីកម្ពុជា បានចាត់ទុកការចោទប្រកាន់ដែលបានលើកឡើងថា កសិករខ្មែរបាត់បង់ដីស្រែទៅឲ្យប្រទេសវៀតណាម គឺជាការមួលបង្កាច់ និងអាចបង្កឲ្យមានអរិភាពរវាងប្រទេសកម្ពុជា និងវៀតណាម។
លិខិតរបស់លោក ហ៊ុន សែន នាយករដ្ឋមន្ត្រីកម្ពុជា ចុះថ្ងៃទី៨ ខែវិច្ឆិកា ដែលវិទ្យុអាស៊ីសេរីទទួលបាននៅថ្ងៃច័ន្ទ ទី១៥ ខែវិច្ឆិកា បានសរសេរថា ក្រុមបច្ចេកទេសរបស់វៀតណាម និងកម្ពុជា កំពុងសិក្សាដើម្បីកំណត់បង្គោលតម្រុយព្រំដែនកម្ពុជា-វៀតណាម លេខ១៨៤, ១៨៥ និង ១៨៧ នៅខេត្តស្វាយរៀង។ ប៉ុន្តែរដ្ឋាភិបាលនៅមិនទាន់បានបោះបង្គោលព្រំដែនទាំងនោះនៅឡើយទេ។
លោក ហ៊ុន សែន បន្តទៀតថា ដូច្នោះប្រជាកសិករខ្មែរ ក៏ដូចជាប្រជាកសិករវៀតណាម នៅតំបន់ជិតបង្គោលតម្រុយព្រំដែន ត្រូវបានហាមឃាត់មិនឲ្យធ្វើស្រែចម្ការបន្តទៀតទេ ហើយគ្មានប្រជាកសិករណាម្នាក់បានបាត់បង់ដីស្រែចម្ការផងដែរ។
បង្គោលតម្រុយព្រំដែនកម្ពុជា-វៀតណាម បានបង្កឲ្យមានការចាប់អារម្មណ៍ជាខ្លាំង បន្ទាប់អ្នកស្រុករស់នៅក្បែរព្រំដែន ដែលជាម្ចាស់ដីបានឲ្យដឹងថា ពួកគាត់បានបាត់បង់ដីឲ្យប្រទេសវៀតណាម ដោយសារការបោះតម្រុយព្រំដែននេះ។
លោក សម រង្ស៊ី ប្រធានគណបក្ស សម រង្ស៊ី កាលពីខែតុលា ឆ្នាំ២០០៩ កន្លងទៅ បានដឹកនាំប្រជាកសិករទៅដកតម្រុយបង្គោលព្រំដែនលេខ១៨៥នេះ ទើបតុលាការខេត្តស្វាយរៀង កាត់ទោសលោក សម រង្ស៊ី និងកសិករពីរនាក់ទៀតឲ្យជាប់គុករយៈពេលមួយឆ្នាំដល់ពីរឆ្នាំ ក្រោយមកលោក សម រង្ស៊ី ត្រូវបានតុលាការទីក្រុងភ្នំពេញ កាត់ឲ្យជាប់គុក ១០ឆ្នាំបន្ថែមទៀតពីបទផ្សាយព័ត៌មានមិនពិត និងក្លែងបន្លំឯកសារសាធារណៈ បន្ទាប់ពីលោក សម រង្ស៊ី បានចោទប្រកាន់ថា ការបោះបង្គោលតម្រុយព្រំដែនកម្ពុជា និងវៀតណាម កន្លងមក បានធ្វើឲ្យកម្ពុជា បាត់បង់ដី។
លោក ហ៊ុន សែន បានចាត់ទុកការចោទប្រកាន់ថា កម្ពុជាបាត់ដីទៅឲ្យវៀតណាម ជាការចោទប្រកាន់គ្មានមូលដ្ឋាន និងមួលបង្កាច់ការពិតដើម្បីវាយប្រហាររដ្ឋាភិបាលកម្ពុជា ក្នុងបំណងចង់កេងចំណេញនយោបាយ។
នៅថ្ងៃច័ន្ទ ទី១៥ ខែវិច្ឆិកា ក្នុងជំនួបរវាងលោក ហ៊ុន សែន និងនាយករដ្ឋមន្ត្រីវៀតណាម លោក ង្វៀន តាន់យុង នៅភ្នំពេញ នាយករដ្ឋមន្ត្រីទាំងពីរបានឯកភាពគ្នានឹងធ្វើការបោះបង្គោលព្រំដែនឲ្យរួចរាល់នៅឆ្នាំ២០១២។
រដ្ឋាភិបាលកម្ពុជា បានព្រមានមន្ត្រីអង្គការសង្គមស៊ីវិល និងគណបក្សប្រឆាំងមិនឲ្យរំខានការបោះបង្គោលព្រំដែនកម្ពុជា និងវៀតណាមនោះទេ ប្រសិនមិនដូច្នោះទេ រដ្ឋាភិបាលនឹងចាត់វិធានការផ្លូវច្បាប់ប្រឆាំងអ្នកទាំងនោះ។
លោក សម រង្ស៊ី ដែលកំពុងរស់នៅនិរទេសខ្លួននៅប្រទេសបារាំង នៅថ្ងៃច័ន្ទ ទី១៥ ខែតុលា បានស្នើឲ្យរដ្ឋាភិបាលភ្នំពេញ បញ្ឈប់ការបោះបង្គោលព្រំដែនជាបន្ទាន់ ពីព្រោះលោកព្រួយបារម្ភពីការបាត់បង់ដី។
លោក សម រង្ស៊ី បន្តទៀតថា លោកមិនអាចទទួលយកបានការពន្យល់របស់លោក ហ៊ុន សែន ដែលថា កម្ពុជាគ្មានបាត់បង់ដីនោះទេ ពីព្រោះកសិករកម្ពុជាពិតជាបាត់បង់ដីមែន ៖ «ព្រោះបោះបង្គោលនេះអត់មានតម្លាភាព។ ប្រជាពលរដ្ឋដែលរស់នៅតាមព្រំដែន គឺមិនបានដឹងឮ មិនបានចូលរួម ផ្ទុយទៅវិញចាំតែរងគ្រោះ ចាំតែគេមកបោះបង្គោលលើដីស្រែដីចម្ការរបស់ពួកគាត់ ហើយពួកគាត់គឺបាត់បង់ដីធ្លី បាត់បង់ផ្ទះសម្បែង»។
ប្រទេសកម្ពុជា និងវៀតណាម បានចាប់ផ្ដើមបោះបង្គោលព្រំដែនជាមួយគ្នា តាំងពីឆ្នាំ២០០៦មក ក្រោយពីសភាជាតិកម្ពុជា បានផ្ដល់សច្ចាប័នលើសន្ធិសញ្ញាបំពេញបន្ថែមនៅឆ្នាំ២០០៥។ ប្រទេសទាំងពីរបានបោះបង្គោលចំនួន ២០០បង្គោល ក្នុងចំណោមបង្គោលចំនួន ៣៧៥បង្គោល នៅលើបន្ទាត់ព្រំដែនប្រវែងជាងមួយពាន់គីឡូម៉ែត្រ៕