រដ្ឋាភិបាលកម្ពុជា ចាត់ទុកថា ការសម្រេច (resolution) នោះ គឺខ្វះព័ត៌មាន និងខ្វះទំនាក់ទំនងជាមួយរដ្ឋាភិបាលនៃបណ្ដាប្រទេសសមាជិកសហភាពអឺរ៉ុប ដែលមានស្ថានទូតនៅកម្ពុជា ដូច្នេះរដ្ឋាភិបាលកម្ពុជា នៃរដ្ឋឯករាជ្យ អធិបតេយ្យ ពុំមានកាតព្វកិច្ចអ្វីដែលត្រូវចាត់វិធានការ ធ្វើតាមសភាអឺរ៉ុបនោះទេ។
លោកនាយករដ្ឋមន្ត្រី ហ៊ុន សែន បានបញ្ជាក់ដែរថា គោលជំហររបស់រដ្ឋាភិបាលកម្ពុជា ដើម្បីរក្សាជំនួយពីសហភាពអឺរ៉ុប ក៏ដូចជាបណ្ដាប្រទេសដទៃ គឺឈរលើការពង្រឹងជំនឿទុកចិត្ត ផ្អែកលើគោលការណ៍គោរពផលប្រយោជន៍គ្នាទៅវិញទៅមក ជាពិសេសសិទ្ធិស្វ័យសម្រេចរបស់ប្រជាជាតិនីមួយៗ។
នៅក្នុងកិច្ចការបំពេញជូនប្រជាជាតិ រដ្ឋាភិបាលកម្ពុជា ពុំបានចាត់ទុកថា ជាការធ្វើតម្រូវបរទេស ភ្លេចអធិបតេយ្យជាតិ និងសតិសម្បជញ្ញៈជាតិជាដាច់ខាត ហើយក៏ពុំបានចាត់ទុកថា កម្ពុជាស្ថិតនៅក្រោមការឃ្លាំមើលពីសហគមន៍អន្តរជាតិឡើយ។
ចំពោះការលើកឡើងខាងលើរបស់លោកនាយករដ្ឋមន្ត្រី ហ៊ុន សែន លោក សម រង្ស៊ី ប្រធានគណបក្ស សម រង្ស៊ី ដែលកំពុងនិរទេសខ្លួននៅក្រៅប្រទេស បានមានប្រតិកម្មតបមកវិញថា ទង្វើ និងការឆ្លើយតបរបស់លោក ហ៊ុន សែន នឹងនាំឲ្យកម្ពុជា បាត់បង់កិត្តិយស និងសេចក្ដីថ្លៃថ្នូររបស់ប្រទេសជាតិ។
លោក សម រង្ស៊ី មានប្រសាសន៍បន្ថែមថា ៖ «ចម្លើយរបស់រដ្ឋាភិបាលទីក្រុងភ្នំពេញ បង្ហាញឲ្យឃើញថា រដ្ឋាភិបាលមិនយល់ ហើយមិនគោរពគោលការណ៍លទ្ធិប្រជាធិបតេយ្យទាល់តែសោះ។ សភាអឺរ៉ុបគេបានធ្វើសំណើទៅរដ្ឋាភិបាលទីក្រុងភ្នំពេញ សព្វថ្ងៃ ឲ្យរកដំណោះស្រាយស្របតាមគោលការណ៍លទ្ធិប្រជាធិបតេយ្យ សេរី ពហុបក្ស ហើយរដ្ឋាភិបាលហ្នឹងគឺមិនយល់អ្វីទាល់តែសោះ បានឆ្លើយតបយ៉ាងកម្រោល។ ចម្លើយបែបនេះនឹងធ្វើឲ្យគេមើលងាយរដ្ឋាភិបាលលោក ហ៊ុន សែន កាន់តែខ្លាំងឡើងថែមទៀត ធ្វើឲ្យប្រទេសកម្ពុជាយើងបាត់បង់កិត្តិយស ពីព្រោះការឆ្លើយតបបែបនេះ គឺឆ្លើយតបមិនសមហេតុសមផលទាល់តែសោះ»៕