កម្ពុជាបានចាប់ផ្តើមបិទច្រករារាំងការចេញចូលមិនឲ្យមនុស្សពីក្នុងទឹកដីថៃធ្វើដំណើរចូលទៅក្នុងតំបន់បរិវេណប្រាសាទព្រះវិហារ បន្ទាប់ពីថៃបានបង្កហេតុ ដោយការដាក់ទ័ពនៅក្នុងបរិវេណជិតទីតាំងតំបន់ប្រាសាទព្រះវិហារ ក្រោយព្រឹត្តិការណ៍ខែកក្កដា ឆ្នាំ២០០៨ ដែលប្រាសាទព្រះវិហារខ្មែរ ត្រូវបានដាក់ចូលជាសម្បត្តិបេតិកភណ្ឌពិភពលោក។
មន្ត្រីអ្នកនាំពាក្យនៃទីស្តីការគណៈរដ្ឋមន្ត្រី លោករដ្ឋលេខាធិការ ផៃ ស៊ីផាន បានមានប្រសាសន៍នៅថ្ងៃនេះថា កម្ពុជានឹងពិចារណាការបើកច្រកចេញចូលនោះសាជាថ្មី បើស្ថានភាពនៅទីជិតប្រាសាទព្រះវិហារខ្មែរនោះ គ្មានការដាក់ពង្រាយកងទ័ពថៃដូចស្ថានការណ៍កាលពីមុន ៖ «នៅក្នុងកាលៈទេសៈនេះ យើងនៅតែទទូចទាមទារឲ្យតំបន់នោះក្លាយត្រឡប់ទៅវិញដូចសភាពការណ៍មុនថ្ងៃទី១៥ កក្កដា ២០០៨។ ហ្នឹងជាចំណុចដែលយើងទាមទារ ហើយយើងនៅតែនិយាយថា ដរាបណាដោះស្រាយនូវអ្វីដែលយើងនិយាយគ្នាចុងក្រោយនេះចប់ យើងនឹងរៀបចំតំបន់ហ្នឹងទៅជាតំបន់ទេសចរណ៍អន្តរជាតិមួយដែលអាចប្រើប្រាស់ពីច្រកខាងស្រុកថៃមកវិញ»។
ប្រសាសន៍របស់មន្ត្រីរដ្ឋាភិបាលខ្មែរ បានធ្វើឡើងមួយថ្ងៃបន្ទាប់ពីថៃបានបើកច្រកឧទ្យានជាតិ Pha Mor I Deng ក្នុងទឹកដីថៃ ដែលជាច្រកសំខាន់មួយអាចឲ្យក្រុមទេសចរណ៍ពីក្នុងទឹកដីថៃធ្វើដំណើរចូលទៅទស្សនកិច្ចប្រាសាទព្រះវិហារបាន បើសិនណាជាកម្ពុជាបើកច្រកចេញចូលដូចពីមុននោះ។
សេចក្តីរាយការណ៍បានឲ្យដឹងថា នៅក្នុងការបើកច្រកឧទ្យានជាតិ Pha Mor I Deng កាលពីថ្ងៃអង្គារនោះ មានភ្ញៀវទេសចរណ៍ច្រើនរយនាក់បាននាំគ្នា ឈរបន្តកន្ទុយគ្នា ប៉ុន្តែពួកគ្រាន់តែបានឈរគយគន់រូបភាពប្រាសាទបុរាណខ្មែរ តែពីចម្ងាយប៉ុណ្ណោះ។
ប្រសាសន៍បញ្ជាក់ជំហររាជរដ្ឋាភិបាលចំពោះការពិចារណាបើកច្រកប្រាសាទព្រះវិហារសាឡើងវិញនេះ នៅមិនទាន់មានការឆ្លើយតបណាមួយជាផ្លូវការពីមន្ត្រីថៃនៅឡើយទេ។
ទោះជាយ៉ាងណាក្តី កាលពីសប្តាហ៍មុន នៅក្នុងជំនួបមួយនៅភ្នំពេញរវាងថ្នាក់រដ្ឋមន្ត្រីក្រសួងការពារប្រទេសនៃប្រទេសទាំង២ កម្ពុជាថៃ សេចក្តីរាយការណ៍ពីមន្ត្រីយោធាថៃដែលចូលរួមបានឲ្យដឹងថា ថៃមិនបាននិយាយព្រមព្រៀងដល់ការចង់ដកកងទ័ពប្រឈមមុខគ្នាចេញពីតំបន់ជម្លោះនៃប្រាសាទព្រះវិហារនោះឡើយ។
សេចក្តីរាយការណ៍ពីមន្ត្រីយោធាជាន់ខ្ពស់ខ្មែរដែលបានចូលរួមជួបប្រជុំជាមួយនឹងគណៈប្រតិភូថ្នាក់រដ្ឋមន្ត្រីក្រសួងការពារប្រទេសថៃបានថ្លែងឲ្យដឹងដែរថា ចំណុចជជែកអំពីការដកកងទ័ពនោះ នឹងមានការគ្រោងលើកទៅនិយាយជាច្រើនទៀតនៅក្នុងកិច្ចប្រជុំលើកក្រោយៗ៕