ថ្លែងក្នុងសន្និសីទកាសែតបន្ទាន់មួយនារសៀលថ្ងៃទី១៥ ខែកុម្ភៈ នៅក្រសួងព័ត៌មាន លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាល មានប្រសាសន៍ថា នៅក្នុងដំណើរចុះសួរសុខទុក្ខកងទ័ពកម្ពុជានៅតាមព្រំដែនកម្ពុជា-ថៃកន្លងទៅនេះ លោកនាយករដ្ឋមន្ត្រី ហ៊ុន សែន បានប្រើពាក្យទៅលោក អាភីស៊ិត វេតឆាឈីវ៉ាក់ នាយករដ្ឋមន្ត្រីថៃ ថា ឲ្យអាភីស៊ិតស្បថ តើឈ្លានពានខ្មែរឬអត់? មិនមែនប្រើពាក្យដាក់បណ្តាសាទៅអាភីស៊ិត ដូចកាសែតបរទេសមួយចំនួនប្រើពាក្យខុសនោះទេ។
លោកស្នើឲ្យគ្រប់ប្រព័ន្ធផ្សព្វផ្សាយបរទេសទាំងអស់ត្រូវប្រើពាក្យឲ្យចំន័យ ដើម្បីកុំឲ្យស្ថានការណ៍ច្របូកច្របល់ ឬធ្វើឲ្យប៉ះពាល់ដល់កិត្តិយសថ្នាក់ដឹកនាំរដ្ឋាភិបាល។
លោក ខៀវ កាញារីទ្ធ បានបញ្ជាក់ថា ៖ «កន្លងមកដែលធ្វើឲ្យមានការភាន់ច្រឡំច្រើនណាស់! អ៊ីចឹងសូមមេត្តាធ្វើយ៉ាងណាជួយកែពាក្យហ្នឹង។ សម្ដេចនាយករដ្ឋមន្ត្រីមិនបានដាក់បណ្ដាសាទេ សម្ដេចនាយករដ្ឋមន្ត្រីគឺឲ្យអាភីស៊ិតស្បថ តើឈ្លានពានខ្មែរឬអត់? បើអត់ឈ្លានពានមែនឲ្យស្បថទៅ! អ៊ីចឹងការនេះវាធ្វើឲ្យមានសភាពការណ៍មួយដែលធ្វើឲ្យច្របូកច្របល់ ហើយវាប៉ះពាល់ដល់រូបភាពនៃប្រមុខរាជរដ្ឋាភិបាលរបស់កម្ពុជាយើង គឺជាបញ្ហាមួយដែលវាទាក់ទងធ្ងន់ណាស់»។
លោករដ្ឋមន្ត្រីបន្តថា ដោយមានកំហុសឆ្គងក្នុងការប្រើពាក្យមិនចំន័យធ្ងន់ធ្ងររបស់កាសែតបរទេសមួយចំនួនកន្លងមក បាននាំឲ្យកាសែតថៃ ឬអ្នកនយោបាយថៃ យកចំណុចអវិជ្ជាមាននៃការប្រើពាក្យមិនចំអត្ថន័យទៅធ្វើការវាយប្រហារមកលើថ្នាក់ដឹកនាំប្រទេសកម្ពុជា និងបានចោទកម្ពុជាថា បានលូកដៃចូលជ្រៅទៅក្នុងកិច្ចការផ្ទៃក្នុងប្រទេសថៃ។
លោក ខៀវ កាញារីទ្ធ បានថ្លែងថា ៖ «ដោយសារបញ្ហានេះកន្លងមកទៀតឃើញថា កាសែតថៃបានយកចំណុចមួយចំនួនដើម្បីធ្វើអត្ថាធិប្បាយជាច្រើន ទាំងអ្នកនយោបាយក្ដី ជាពិសេសគេបានសង្កត់ថា នៅក្នុងចំណោមប្រទេសអាស៊ានទាំង ១០ មានតែរដ្ឋាភិបាលកម្ពុជាទេបានប្រកាសលូកដៃឲ្យមានការផ្លាស់ប្ដូររដ្ឋាភិបាលនៅក្នុងប្រទេសមួយទៀតដែលជាសមាជិកអាស៊ានដូចគ្នា។ សូមជម្រាបថា មកដល់ពេលនេះសម្ដេចនាយករដ្ឋមន្ត្រីអត់មានបានមានប្រសាសន៍ថា ប្រជាជនថៃត្រូវតែដូរអាភីស៊ិត ឬត្រូវតែដូរស្អីនោះទេ! សម្ដេចនាយករដ្ឋមន្ត្រីមិនដែលនិយាយសោះ! លោកមានប្រសាសន៍ថា បញ្ហាការជជែករឿងព្រំដែនឥឡូវវាខ្ជិលនឹងជជែក ពីព្រោះអីចាំឲ្យរដ្ឋាភិបាលថ្មី ហេតុអីបានសម្ដេចមានប្រសាសន៍អ៊ីចឹង? បើរដ្ឋាភិបាលចាស់ប្ដូរនយោបាយអំពីបញ្ហាកម្ពុជា... បញ្ហាដោយសារអាភីស៊ិត រដ្ឋាភិបាលនេះបានផ្ដួលរដ្ឋាភិបាលសាម៉ាក់ ដោយយកមូលហេតុធំ រឿងបញ្ហាព្រះវិហារ។ រាជរដ្ឋាភិបាលដែលដឹកនាំដោយសម្ដេច ហ៊ុន សែន ខ្លួនឯងមិនអាចចរចាបានជាមួយក្រុមអាភីស៊ិត បើសិនជានៅតែយកបញ្ហាព្រះវិហារជាមូលហេតុធំ»។
នៅក្នុងសន្និសីទកាសែត លោករដ្ឋមន្ត្រី ខៀវ កាញារីទ្ធ បានលើកឈ្មោះកាសែតបរទេសក្នុងស្រុកមួយដែលកន្លងមកបានប្រើពាក្យក្នុងភាសាអង់គ្លេសខុសអត្ថន័យយកមកចុះផ្សាយដូច្នេះ ៖ «ជាការពិតហើយកាលណាយើងធ្វើកាសែត ទាំងវិទ្យុ ទាំងកាសែតបោះពុម្ព ទាំងទូរទស្សន៍ ដំណឹងវាមកផ្ទួនៗណាស់ ហើយវារហ័សណាស់ដែលវាទាមទារឲ្យយើងត្រូវតែបក(បកប្រែ)ភ្លាមៗ ប៉ុន្តែមានពេលខ្លះនៅពេលដែលយើងដាក់ខុស មានប្រតិកម្មអវិជ្ជមានច្រើនពេក... អ៊ីចឹងបានជាកន្លងមកខ្ញុំបានជួប ចក្រា នៅភ្នំពេញប៉ុស្តិ៍ គាត់បានបក "ក្រពើភ្នំ"... ពាក្យបច្ចេកទេស គាត់បកថា "ក្រពើសៀម" តាមពិតយើងមានពាក្យរបស់យើងគឺ "ក្រពើភ្នំ"»។
ទោះជាយ៉ាងនេះក្តី លោក ខៀវ កាញារីទ្ធ បានស្នើទៅស្ថាប័នព័ត៌មានបរទេសទាំងអស់ ប្រសិនបើស្រពិចស្រពិល ឬមិនច្បាស់ទៅលើពាក្យបច្ចេកទេសណាមួយ ត្រូវធ្វើទំនាក់ទំនងមកកាន់ក្រសួងព័ត៌មានដើម្បីចៀសវាងភាពច្របូកច្របល់ ឬធ្វើឲ្យបាត់បង់កិត្តិយសថ្នាក់ដឹកនាំរដ្ឋាភិបាល ដោយសារកំហុសឆ្គងក្នុងវិជ្ជាជីវៈសារព័ត៌មានរបស់ខ្លួនដោយខ្វះការទទួលខុសត្រូវ៕