ក្នុងចំណោមប្រមុខរដ្ឋ ប្រមុខរដ្ឋាភិបាលទាំងនោះ ប្រធានាធិបតីកូរ៉េខាងត្បូង ត្រូវបានគេមើលឃើញថា មានទំនាក់ទំនងពិសេសនឹងកម្ពុជា ជាងគេ ព្រោះថា លោក លី ម្យ៉ុងបាក់ បច្ចុប្បន្នធ្លាប់ធ្វើជាទីប្រឹក្សាសេដ្ឋកិច្ចរបស់លោកនាយករដ្ឋមន្ត្រី ហ៊ុន សែន។
តើលោក លី ម្យ៉ុងបាក់ មានប្រវត្តិនយោបាយ និងជីវិតឯកជនយ៉ាងណាខ្លះ?
ប្រធានាធិបតីទី១០ របស់ប្រទេសកូរ៉េខាងត្បូង លោក លី ម្យ៉ុងបាក់ (Lee Myong Bak) វ័យ ៧១ឆ្នាំ កើតនៅថ្ងៃទី១៩ ខែធ្នូ ឆ្នាំ១៩៤១ មានប្រវត្តិជាមនុស្សជោគជ័យក្នុងជីវិតជំនួញ និងនយោបាយ។
យោងតាមបណ្ដាញផ្សព្វផ្សាយកូរ៉េ ឲ្យដឹងថា លោក លី ម្យ៉ុងបាក់ ជាកូនទី៥ ក្នុងចំណោមបងប្អូនប្រុសស្រី ៦នាក់ របស់លោក លី ចុងអូ (Lee Choung-U) និងអ្នកស្រី ចេ តេវ៉ុន (Chae TeeWoon) មានមុខរបរជាកសិករចិញ្ចឹមសត្វពាហនៈ នៅក្នុងទីក្រុងអូសាកា (Osaka) ប្រទេសជប៉ុន។ ក្រោយសង្គ្រាមលោកលើកទី២ ក្រុមគ្រួសាររបស់លោក លី ម្យ៉ុងបាក់ បានត្រឡប់មករស់នៅទីក្រុងប៉ូហាំង (Pohang) ប្រទេសកូរ៉េ វិញ។
កាលពីនៅយុវវ័យ មេដឹកនាំកូរ៉េ រូបនេះ រៀនបណ្ដើរ ធ្វើការជាកម្មករបោសសំអាតបណ្ដើរ ជាអ្នករំដោះគ្រួសារឲ្យរួចផុតពីភាពក្រីក្រ។ លោកធ្លាប់មានប្រសាសន៍ថា "ភាពក្រីក្រមិនអាចបាត់សូន្យពីជីវិតយើងឡើយ វានៅតែតាមលងបន្លាចគ្រួសារធំរបស់ខ្ញុំ រហូតខ្ញុំមានអាយុ ២០ឆ្នាំ"។ ទោះជាយ៉ាងនេះក្តី លោកមិនដែលអស់សង្ឃឹមនោះឡើយ។
បន្ទាប់ពីបញ្ចប់បរិញ្ញាបត្រ យុវជន លី ម្យ៉ុងបាក់ បានចូលធ្វើការក្នុងក្រុមហ៊ុនវិស្វកម្ម និងសំណង់ឈ្មោះ ហីហាន់ដាយ (Hyundai) ជាបុគ្គលិកធម្មតា រហូតក្រុមហ៊ុនដំឡើងឋានៈជានាយកផ្នែក ក្នុងពេលដែលលោកធ្វើការបាន ៥ឆ្នាំ ហើយទទួលបានតំណែងជាប្រធានគ្រប់គ្រងទូទៅ នៅពេលដែលលោកធ្វើការបាន ១២ឆ្នាំ។
ក្នុងតំណែងជាអ្នកគ្រប់គ្រងចាត់ចែងទូទៅនៅក្រុមហ៊ុនហីហាន់ដាយ លោក លី ម្យ៉ុងបាក់ បានចងក្រងបណ្ដាញទំនាក់ទំនងតាមរយៈការផ្តល់កិត្តិប័ណ្ណសរសើរជូនមេដឹកនាំប្រទេសមួយចំនួន ដូចជា លោក លី ក្វាន់យូ ដែលកាលណោះជានាយករដ្ឋមន្ត្រីប្រទេសសិង្ហបុរី លោក មហាធៀ ប៊ីនមហាម៉ាត់ ជាប្រធានាធិបតីប្រទេសម៉ាឡេស៊ី លោក ហ្សាង ហ្សឺមីង ប្រធានាធិបតីចិន លោក មីហាល ហ្គោបេកឆូវ (Mikhail Gobachev) ប្រធានាធិបតីសហភាពសូវៀត។
លោក លី ម្យ៉ុងបាក់ ចូលប្រឡូកក្នុងវិស័យនយោបាយក្នុងវ័យ ៥១ឆ្នាំ ដោយជាប់ជាសមាជិកសភាមកពីគណបក្សកូរ៉េថ្មី (The New Korea Party)។ នៅឆ្នាំ២០០២ លោក លី ម្យ៉ុងបាក់ បានចូលរួមឈរឈ្មោះ និងជាប់ជាចៅហ្វាយក្រុងសេអ៊ូល ដោយលោកបានប្រកាសថា "ខ្ញុំនឹងធ្វើឲ្យសេអ៊ូល ប្រសើរគ្រប់យ៉ាង"។ កាសែតកូរ៉េ រាយការណ៍ថា មនុស្សជាច្រើនសង្ស័យនឹងសមត្ថភាពរបស់លោកអភិបាលក្រុងលី ប៉ុន្តែលោកបានធ្វើការងារដ៏ល្អក្នុងការអភិវឌ្ឍ និងការការពារបរិស្ថាននៅទីក្រុងសេអ៊ូល។
បន្ទាប់ពីលោកធ្វើការងារជាអភិបាលក្រុងបាន ២ឆ្នាំ ប្រព័ន្ធគ្រប់គ្រងរដ្ឋបាលក្រុងសេអ៊ូល ត្រូវបានជាប់ចំណាត់ថ្នាក់ជាទីក្រុងអភិវឌ្ឍន៍កំពូល ក្នុងពិភពលោក ហើយ ៣ឆ្នាំបន្ទាប់ទៀត គឺនៅខែតុលា ឆ្នាំ២០០៧ លោក លី ម្យ៉ុងបាក់ ត្រូវបានទស្សនាវដី្តល្បីឈ្មោះអាមេរិក ជ្រើសរើសជាវីរបុរសបរិស្ថានប្រចាំឆ្នាំ។
នៅខែធ្នូ ឆ្នាំ២០០៧ ក្នុងការបោះឆ្នោតជ្រើសរើសប្រធានាធិបតី លោក លី ម្យ៉ុងបាក់ ជាបេក្ខភាពប្រធានាធិបតីមកពីគណបក្សមហាជាតិ (Grand National Party) ហើយលោកត្រូវបានមហាជនជិត ៥០% បោះឆ្នោតគាំទ្រ។ លទ្ធផលនេះ ធ្វើឲ្យលោកមានសំឡេងគាំទ្រលើសគូប្រជែងជាង ២០%។ លោក លី ម្យ៉ុងបាក់ បានចូលកាន់តំណែងជាប្រធានាធិបតីទី១០ របស់កូរ៉េខាងត្បូង នៅឆ្នាំ២០០៨។
ក្នុងនាមជាប្រធានាធិបតីក្នុងតំណែង លោក លី ម្យ៉ុងបាក់ នៅតែបន្តអនុវត្តគោលនយោបាយចងសម្ព័ន្ធមិត្តជាមួយសហរដ្ឋអាមេរិក ដូចមេដឹកនាំមុនៗដដែល ហើយថែមទាំងបង្កើនទំនាក់ទំនងសេដ្ឋកិច្ច និងសហប្រតិបត្តិការក្នុងតំបន់ និងពិភពលោក។ សារព័ត៌មានអន្តរជាតិជាច្រើន រាយការណ៍ថា ក្នុងអាណត្តិរបស់លោក លី ម្យ៉ុងបាក់ កូរ៉េខាងត្បូង បានធ្វើការអត់ធ្មត់យ៉ាងច្រើនដើម្បីទប់ស្កាត់ការផ្ទុះអាវុធតបនឹងកូរ៉េខាងជើង ទោះបីជាប្រទេសមានការសង្ស័យថាកូរ៉េខាងជើង ជាអ្នកបាញ់ពន្លិចនាវារបស់ខ្លួន កាលពីខែតុលា ឆ្នាំ២០១០ ក៏ដោយ។
ទោះយ៉ាងណាក្តី ឥទ្ធិពលនយោបាយរបស់លោក លី ម្យ៉ុងបាក់ ត្រូវរងការវាយប្រហារដោយសាររឿងអាស្រូវរបស់សាច់ញាតិ។ កាលពីខែកក្កដា ឆ្នាំ២០១២ បងប្រុសបង្កើតរបស់លោក លី ម្យ៉ុងបាក់ ឈ្មោះលោក លី សាង ឌឹក (Lee Sang-Deuk) មានវ័យ ៧៦ឆ្នាំ ត្រូវបានប៉ូលិសចាប់ខ្លួន ដោយតុលាការរកឃើញថា រូបគាត់ទទួលសំណូកពីធនាគារប្រាក់សន្សំចំនួនពីរ ដែលមានទឹកប្រាក់ជាង ៥០ម៉ឺនដុល្លារ ពីចន្លោះឆ្នាំ២០០៧ ដល់ឆ្នាំ២០១១ ជាថ្នូរនឹងការមិនត្រួតពិនិត្យ និងមិនដាក់ពិន័យលើធនាគារទាំងនោះ។
ប៉ុន្តែ គេមិនទាន់អាចទស្សន៍ទាយបាននៅឡើយទេពីវាសនានយោបាយរបស់ប្រធានាធិបតីជិតផុតអាណត្តិរូបនេះ ព្រោះថា បច្ចុប្បន្ន កូរ៉េខាងត្បូង នៅតែរក្សាលំនឹងក្នុងវិស័យសេដ្ឋកិច្ចបានល្អប្រសើរ ហើយលោក លី ម្យ៉ុងបាក់ ក៏បានដឹកនាំកូរ៉េខាងត្បូង ជាប្រវត្តិសាស្ត្រឲ្យជាប់ជាសមាជិកក្រុមប្រឹក្សាសន្តិសុខមិនអចិន្ត្រៃយ៍របស់អង្គការសហប្រជាជាតិក្នុងឆ្នាំ២០១២ ទៀត។
លោក លី ម្យ៉ុងបាក់ បានទទួលសញ្ញាបត្របណ្ឌិតកិត្តិយសផ្នែកសេដ្ឋកិច្ចពីបណ្ដាសាកលវិទ្យាល័យមួយចំនួនក្នុងប្រទេសកូរ៉េ កាហ្សាក់ស្ថាន និងម៉ុងហ្គោលី។ លោកក៏ធ្លាប់ត្រូវបានស្ថាប័នមួយចំនួន ជ្រើសរើសជាវីរបុរសបរិស្ថាន មេដឹកនាំឆ្នើម និងរង្វាន់ជាច្រើនទៀត ក្នុងវិស័យជំនួញ។
ទស្សនវិស័យរបស់លោក លី ម្យ៉ុងបាក់ ដែលត្រូវបោះពុម្ពជាសៀវភៅនៅឆ្នាំ២០០២ មានចំណងជើងថា "ក្តីសង្ឃឹមកើតមានឡើងនៅពេលដែលអ្នកគ្រប់គ្នានិយាយថា បាត់បង់ក្តីសង្ឃឹម" ស្របពេលលោកជាប់ឆ្នោតជាចៅហ្វាយក្រុងសេអ៊ូល។
បច្ចុប្បន្ននេះ លោក លី ម្យ៉ុងបាក់ រស់នៅជាមួយភរិយាឈ្មោះ គីម យុនអ៊ុក (Kim yoon ok) ដែលមានកូនចំនួន ៤នាក់ ប្រុសម្នាក់ ស្រី ៣នាក់។ ប្រធានាធិបតីកូរ៉េខាងត្បូង ជិតផុតអាណត្តិរូបនេះ កំពុងចូលរួមក្នុងកិច្ចប្រជុំកំពូលអាស៊ានលើកទី២១ នៅប្រទេសកម្ពុជា ដើម្បីស្វែងរកគុណប្រយោជន៍ផ្នែកសេដ្ឋកិច្ច និងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។