នៅក្នុងការសួរចោទឆ្លើយជាសាធារណៈនៅក្នុងសវនាការថ្ងៃដំបូងនេះ ចៅក្រម និល ណុន មិនទាន់សួរ ឌុច អំពីមូលហេតុដែលនាំឲ្យមានឧក្រិដ្ឋកម្មនិងការសម្លាប់មនុស្សនៅឡើយទេ គឺសួរដេញដោលពីជីវប្រវត្តិសង្ខេបរបស់ ឌុច ប៉ុណ្ណោះ។
លោកចៅក្រម និល ណុន បានចាប់ផ្តើមសួរ ឌុច នៅបន្ទាប់ពីកងសន្តិសុខនាំ ឌុច ចូលទៅក្នុងអង្គសវនាការ ៖ «លោក កាំង ហ្កិចអ៊ាវ ក្រោកឈរឡើង នីតិវិធីបន្តនេះ គឺអង្គជំនុំជម្រះធ្វើការសាកសួរដើម្បីផ្ទៀតផ្ទាត់អំពីអត្តសញ្ញាណរបស់ជនជាប់ចោទ ដែលមានចំណុចមួយចំនួនដូចខាងក្រោមនេះ»។
Video by Uon Chhin
និល ណុន ៖ លោកឈ្មោះអីដែរ? ឌុច ៖ ខ្ញុំបាទឈ្មោះ កាំង ហ្កិចអ៊ាវ ហៅ ឌុច។ និល ណុន ៖ លោកប្រកបឈ្មោះរបស់លោក ហ្កិចអ៊ាវ ហ្នឹងសរសេររបៀបម៉េច? ឌុច ៖ អ៊ាវ សរសេរ អ ៊ ា និង វ ។ ចំណែកជាអក្សរឡាតាំងវិញ ហ្កិចអ៊ាវ សរសេរ Guek Eav ។ និល ណុន ៖ ក្រៅពីឈ្មោះទាំងពីរដូចខាងលើនេះ តើលោកធ្លាប់ប្រើប្រាស់នូវឈ្មោះអ្វីផ្សេងទៀតដែរ ឬទេ? ឌុច ៖ លោកប្រធានជាទីគោរព! នៅពេលដែលខ្ញុំបាទទើបកើតមក ឪពុកខ្ញុំបាទដាក់ឈ្មោះថា យន់ ជីវ នៅពេលដែលខ្ញុំបាទកើតមកបានប្រហែលជា ៣ខែ ឪពុកខ្ញុំបាទទៅចុះបញ្ជីជាតិ។ បញ្ជីជាតិពិតប្រាកដរបស់ខ្ញុំបាទឈ្មោះ កាំង ជីវ ។ ដល់ក្រោយមកមានគ្រូម្នាក់តាំងខ្លួនជាហោ សុំប្រែឈ្មោះខ្ញុំដាក់ឈ្មោះថា យឹម គាវ។ ខ្ញុំចូលទៅសាលារៀន ខ្ញុំដាក់ឈ្មោះថា កាំង គាវ។ ដល់ឆ្នាំ១៩៥៧ ខ្ញុំបាទត្រូវប្រឡងវិញ្ញាបនបត្របឋមសិក្សា ខ្ញុំបាទបានប្ដូរឈ្មោះពី កាំង គាវ ទៅជា កាំង ហ្កិចអ៊ាវ តាមការយល់ស្របរបស់ឪពុកខ្ញុំ។ ដល់ខ្ញុំបាទចូលបដិវត្តន៍ ខ្ញុំប្រើឈ្មោះ កាំង ហ្កិចអ៊ាវ ហៅ ឌុច។ ឈ្មោះ ឌុច នេះ ជាឈ្មោះបដិវត្តន៍ជំនាន់នោះគេហៅថាឈ្មោះបដិវត្តន៍។ នៅឆ្នាំ១៩៨៦ ខ្ញុំបាទទៅស្រុកចិន ខ្ញុំបាទប្រើឈ្មោះ ហង្ស ពិន។ នៅស្រុកចិន ខ្ញុំធ្វើការរហូតដល់ឆ្នាំ១៩៨៨ ខ្ញុំត្រឡប់មកវិញ ឈ្មោះ ហង្ស ពិន។
និល ណុន ៖ តើទីកន្លែងកំណើតរបស់លោកនៅឯណា? ឌុច ៖ នៅភូមិពៅវើយ ឃុំពាមបា ស្រុកស្ទោង ខេត្តកំពង់ធំ។ និល ណុន ៖ តើលោកមានមុខរបរអ្វីទៅមុនពេលត្រូវបានចាប់ខ្លួន? ឌុច ៖ ថ្មីៗ មុនពេលដែលខ្ញុំត្រូវតុលាការយោធាកោះហៅមកឃុំខ្លួន ខ្ញុំបាទជាគ្រូបង្រៀន ធ្វើការនៅស្រុកសំឡូត ខេត្តបាត់ដំបង។ និល ណុន ៖ តើឪពុករបស់លោកឈ្មោះអ្វីដែរ ហើយតើគាត់សព្វថ្ងៃនៅរស់ឬក៏មរណភាពហើយ? ឌុច ៖ លោកប្រធានជាទីគោរព! ឪពុកខ្ញុំបាទឈ្មោះ កាំង គី កើតនៅឆ្នាំ១៩១៥ ក៏ប៉ុន្តែឪពុកខ្ញុំបាទធ្វើអនិច្ចកម្មកាលពីឆ្នាំ១៩៩០ ផុតទៅហើយ។
និល ណុន ៖ ចុះម្ដាយលោកគាត់ឈ្មោះអីដែរ ហើយនៅរស់ឬក៏ទទួលមរណភាពហើយ? ឌុច ៖ កើតនៅឆ្នាំ ១៩២៣ សព្វថ្ងៃម្ដាយខ្ញុំបាទនៅរស់។ និល ណុន ៖ តើលោកមានប្រពន្ធទេ ហើយសព្វថ្ងៃ គាត់នៅរស់ឬក៏ទទួលមរណភាពហើយ? ឌុច ៖ ខ្ញុំបាទមានប្រពន្ធ រៀបការនៅថ្ងៃ២០ ធ្នូ ១៩៧៥ តែអនិចារប្រពន្ធខ្ញុំបាទស្លាប់បាត់ទៅហើយ នៅថ្ងៃ១១ ខែវិច្ឆិកា ១៩៩៥។ និល ណុន ៖ តើលោកមានកូនប៉ុន្មាននាក់ ស្រីប៉ុន្មាន ប្រុសប៉ុន្មាន? ឌុច ៖ កូនទី១ជាកូន ... កូនទី២ ជាកូនប្រុស ឈ្មោះ ហង្ស ស៊ីវផេង នៅរស់។ សព្វថ្ងៃនៅសំឡូតធ្វើគ្រូបង្រៀន។ កូនទី៣ ឈ្មោះ ហង្ស ស៊ីវម៉េង ជាកូនប្រុស សព្វថ្ងៃនៅសំឡូតដែរ រកស៊ីធ្វើគ្រូបង្រៀន កូនទី៤ គឺកូនពៅ ឈ្មោះ ហង្ស ថៃអាន នៅសំឡូតដែរ ធ្វើគ្រូបង្រៀន។
និល ណុន ៖ ក្នុងនាមលោកជាជនជាប់ចោទ នៅចំពោះមុខអង្គជំនុំជម្រះ ចាប់ពីពេលនេះតទៅ និងសវនាការជាបន្តបន្ទាប់លោកមានសិទ្ធិដូចខាងក្រោម ៖ សិទ្ធិមានមេធាវីការពារតាមការជ្រើសរើសរបស់លោក ក្នុងគ្រប់ដំណាក់កាលនៃកិច្ចដំណើរការនីតិវិធី។ សិទ្ធិនេះ អង្គជំនុំជម្រះកត់សម្គាល់ឃើញថា ចាប់តាំងពីដំណាក់កាលស៊ើបអង្កេតរហូតពេលនេះ លោកមានមេធាវីចំនួន២រូប មេធាវី១រូបជាមេធាវីជាតិ និងមេធាវីអន្តរជាតិមួយរូប គឺលោកមេធាវី កា សាវុធ និងលោកមេធាវី ហ្វ្រង់ស្វ័រ រូ។ នៅក្នុងដំណាក់កាលនៃដំណើរការនីតិវិធីពិភាក្សាដេញដោលរបស់តុលាការ លោកមានសិទ្ធិនៅស្ងៀមមិនឆ្លើយតប លោកមានសិទ្ធិមិនធ្វើសក្ខីកម្មប្រឆាំងនឹងខ្លួនឯង។ លោកមានសិទ្ធិទទួលដំណឹងពីបទល្មើសដែលចោទប្រកាន់ចំពោះរូបលោក។ លោក កាំង ហ្កិចអ៊ាវ តើលោកបានទទួលដំណឹងពីបទចោទប្រកាន់ចំពោះរូបលោកហើយ ឬនៅ?
ឌុច ៖ លោកប្រធានជាទីគោរព! ខ្ញុំបាទបានទទួលដំណឹងអំពីបទចោទប្រកាន់លើរូបខ្ញុំបាទហើយ។ និល ណុន ៖ លោកបានទទួលដំណឹងពីបទចោទប្រកាន់ហ្នឹងតាំងពីពេលណាមកដែរ? ឌុច ៖ តាំងពីពេលខ្ញុំបាទចូលមកដល់ អ.វ.ត.ក (អង្គជំនុំជម្រះវិសាមញ្ញក្នុងតុលាការកម្ពុជា) នេះ។
បន្ទាប់ពីសាកសួរអំពីជីវប្រវត្តិសង្ខេបរបស់ ឌុច ចៅក្រមសាលាដំបូង គឺលោក និល ណុល បានប្រកាសចាត់មន្ត្រីក្រឡាបញ្ជីសវនាការចំនួន២រូបឲ្យអាននូវខ្លឹមសារបទចោទប្រកាន់ប្រឆាំងនឹងជនជាប់ចោទ និងអាននូវផ្នែកវិភាគអង្គហេតុដែលមាននៅក្នុងដីកាបញ្ជូនរឿងជំនុំជម្រះ ដែលធ្វើឡើងដោយសហចៅក្រមស៊ើបអង្កេត។
សូមជម្រាបថា នៅក្នុងរបៀបវារៈនៃការកាត់ក្តីករណី កាំង ហ្កិចអ៊ាវ ហៅ ឌុច គឺសវនាការនាវេលាថ្ងៃបន្ទាប់នេះ កាំង ហ្កិចអ៊ាវ ហៅ ឌុច នឹងប្រឈមការសួរឆ្លើយសំណួរមួយចំនួនទាក់ទិននឹងការបង្កើតឡើងនូវមន្ទីរសន្តិសុខ ម-១៣ នៅឯខេត្តកំពង់ស្ពឺ ការបង្កើតមន្ទីរស-២១ នៅក្រុងភ្នំពេញ និងការបង្កើតឡើងនូវមន្ទីរសន្តិសុខនៅតាខ្មៅ ខេត្តកណ្តាល ការអនុវត្តគោលនយោបាយនៃបក្សកុម្មុយនីស្តកម្ពុជានៅឯមន្ទីរស-២១ រួមទាំងតួនាទីរបស់ជើងឯក តួនាទីនៃមន្ទីរស-២៤ ឬគុកព្រៃស ព្រមទាំងបញ្ហាមួយចំនួនដែលទាក់ទិនអត្តចរិតរបស់ កាំង ហ្កិចអ៊ាវ ហៅ ឌុច ផងដែរ៕