ជាមួយគ្នានេះប្រធានគណបក្សប្រឆាំងគឺលោក សម រង្ស៊ី បានថ្លែងនៅថ្ងៃនេះថា ទោះបីជាការបោះឆ្នោតនៅថ្ងៃអាទិត្យខាងមុខនេះជាការបោះឆ្នោតអសកលក៏ដោយ លោកថា នេះជាឱកាសមួយដែលបើកឲ្យសមាជិកគណបក្សរបស់លោកចូលបម្រើការក្នុងស្ថាប័នថ្នាក់ជាតិកាន់តែច្រើនឡើង។
លោក សម រង្ស៊ី បានបញ្ជាក់ថា ៖ «អ្វីដែលផ្ដល់ឱកាសឲ្យអ្នកដែលស្រឡាញ់យុត្តិធម៌មានឱកាសងើបឈរដើម្បីការពារប្រជារាស្រ្ដដែលរងគ្រោះដោយសារអំពើអយុត្តិធម៌វាគ្រាន់បើ វាជាជាងអត់ដែរ។ យើងចង់ឲ្យមានការបោះឆ្នោតសកល បោះឆ្នោតរើសតាំងពីមេភូមិឡើងទៅ គ្រប់ជាន់ថ្នាក់ យើងត្រូវតែរៀបចំការបោះឆ្នោតសកល គឺប្រជាពលរដ្ឋបោះឆ្នោតផ្ទាល់ រើសតំណាងខ្លួនឯង តំណាងខ្លួនគឺថ្នាក់ភូមិ ថ្នាក់ឃុំ ថ្នាក់ស្រុក ថ្នាក់ខេត្ត ថ្នាក់ជាតិ ប៉ុន្តែឥឡូវយើងមិនទាន់បានដូចក្ដីប្រាថ្នារបស់យើង តែអ្វីដែលគេមានរៀបចំមកទល់នឹងសព្វថ្ងៃ យើងត្រូវតែឆ្លៀតយកឱកាសហ្នឹង ដើម្បីធ្វើម៉េចឲ្យតំណាងប្រជារាស្រ្ដដែលមានគោលជំហរច្បាស់លាស់ ចូលកាន់តំណែងនៅថ្នាក់រាជធានី ថ្នាក់ក្រុង ថ្នាក់ខេត្ត និងថ្នាក់ស្រុក»។
នេះជាលើកដំបូងហើយដែលប្រទេសកម្ពុជារៀបចំការបោះឆ្នោតអសកលជ្រើសរើសក្រុមប្រឹក្សារាជធានី ខេត្ត ក្រុង ខណ្ឌ ស្រុក។ អគ្គលេខាធិការគណៈកម្មាធិការជាតិរៀបចំការបោះឆ្នោត គឺលោក ទេព នីថា បានឲ្យដឹងថា ការបោះឆ្នោតអសកលនេះមានមណ្ឌលបោះឆ្នោតសរុប២១៧មណ្ឌល និងមាន៤គណបក្សចូលរួម ដែលក្នុងនោះរួមមានគណបក្សប្រជាជនកម្ពុជា គណបក្សសមសង្ស៊ី គណបក្សហ៊្វុនស៊ីនប៉ិច និងគណបក្ស នរោត្តម រណឫទ្ធិ។
ការបោះឆ្នោតអសកលខាងមុខនេះនឹងមានតែសមាជិកក្រុមប្រឹក្សាឃុំសង្កាត់ប៉ុណ្ណោះដែលជាអ្នកបោះឆ្នោតគឺប្រជាជនទូទៅនឹងមិនបានចូលរួមបោះឆ្នោតរើសតំណាងរបស់ខ្លួននោះទេ។ ហេតុដូច្នេះហើយមន្ត្រីអង្គការសង្គមស៊ីវិលថ្លែងថា គេបានដឹងលទ្ធផលមុនរួចទៅហើយ គឺគណបក្សប្រជាជនកម្ពុជា ដែលមានសមាជិកក្រុមប្រឹក្សាឃុំសង្កាត់ច្រើននោះនឹងឈ្នះបានសំឡេងឆ្នោតច្រើនដែរ។
ប៉ុន្តែ លោក សម រង្ស៊ី នៅតែអះអាងថា គណបក្សលោកក៏នឹងអាចឈ្នះបានសំឡេងដែរ ៖ «ខ្ញុំមិនត្រឹមតែមានសង្ឃឹមទេ ខ្ញុំមានជំនឿ ពីព្រោះគណបក្សកាន់អំណាចគេប្រើទឹកលុយ តែចំពោះគណបក្សសមរង្ស៊ីរំពឹងលើទឹកចិត្ត។ ហើយខ្ញុំជឿថា កម្លាំងចិត្តឈ្នះកម្លាំងលុយ ដូច្នេះគណបក្សសមរង្ស៊ីនឹងទទួលលទ្ធផលបានល្អ លទ្ធផលដែលឆ្លុះបញ្ចាំងទឹកចិត្តស្នេហាជាតិ ទឹកចិត្តស្រឡាញ់យុត្តិធម៌របស់ក្រុមប្រឹក្សាឃុំសង្កាត់ទូទាំងប្រទេសកម្ពុជា»។
សូមជម្រាបថា ចំនួនបេក្ខជនឈរឈ្មោះបោះឆ្នោតទាំង៤គណបក្សទាំងបេក្ខជនពេញសិទ្ធិនិងបេក្ខជនបម្រុងមានសរុប១៧,២៩០នាក់៕