ប្រជាពលរដ្ឋរស់នៅក្នុងឃុំចំនួនពីរ គឺឃុំស្រែគរ និងឃុំក្បាលរមាស ស្រុកសេសាន ខេត្តស្ទឹងត្រែង បានអំពាវនាវឲ្យក្រុមអាជ្ញាធរពាក់ព័ន្ធឆ្លើយតបសំណូមពរប្រជាពលរដ្ឋសុំប្ដូរទីតាំងសង់លំនៅឋាន ដើម្បីឆ្លើយតបទៅនឹងគម្រោងជម្លៀសប្រជាពលរដ្ឋពីតំបន់អាងទឹកនៃគម្រោងសាងសង់ទំនប់វារីអគ្គិសនីសេសានក្រោម២។
សេចក្ដីអំពាវនាវនេះធ្វើឡើងបន្ទាប់ពីអ្នកភូមិបានឃើញក្រុមកម្មករវៀតណាមអមដោយកងប៉ូលិស និងមន្ត្រីព្រៃឈើចុះបាញ់ថ្នាំពណ៌ និងកាប់រានព្រៃឈើនៅក្នុងឃុំស្រែគរ កាលពីចុងខែធ្នូ ឆ្នាំ២០១១ រហូតមកហើយ ក្រុមកម្មករ និងក្រុមប៉ូលិសបានប្រាប់អ្នកភូមិថា នេះជាសកម្មភាពសំអាតផ្ទៃអាងស្តុកទឹក ជាផ្នែកមួយនៃផែនការសាងសង់ទំនប់វារីអគ្គិសនីនៅតំបន់នោះ ហើយប្រជាពលរដ្ឋនឹងត្រូវជម្លៀសចេញពីភូមិ។
អាជ្ញាធរខេត្តស្ទឹងត្រែងមានគម្រោងផ្ដល់ដីនៅតំបន់ទួលគ្រួសដល់ប្រជាពលរដ្ឋឃុំស្រែគរជាង ៣០០គ្រួសារ និងផ្ដល់ដីនៅតំបន់ទួលត្រពាំងថ្លង់ ជូនប្រជាពលរដ្ឋជាង ៤០០គ្រួសារ នៅឃុំក្បាលរមាស សម្រាប់ទៅតាំងទីលំនៅថ្មី។
តំណាងប្រជាពលរដ្ឋក្នុងឃុំក្បាលរមាស គឺលោក ថង សាម៉ន។ លោកបានបញ្ជាក់ថា តំបន់ដីទូលត្រពាំងថ្លង់ មិនអំណោយផលសម្រាប់ការធ្វើកសិកម្ម និងរស់នៅរបស់ប្រជាពលរដ្ឋបានទេ ហេតុនេះប្រជាពលរដ្ឋបានស្នើសុំទៅអាជ្ញាធរស្រុកខេត្ត រកដីនៅជាប់នឹងផ្លូវជាតិលេខ៧៨ ជាផ្លូវទើបអភិវឌ្ឍន៍ថ្មី ងាយស្រួលប្រជាពលរដ្ឋរស់នៅធ្វើដំណើរចិញ្ចឹមជីវិត និងកូនចៅងាយស្រួលទៅសាលារៀន។
លោកបន្តថា ប្រជាពលរដ្ឋបានដាក់សំណើនេះពីរលើកហើយ ដើម្បីសុំឲ្យអាជ្ញាធរពាក់ព័ន្ធសម្រេចមុននឹងអនុវត្តផែនការជម្លៀសប្រជាពលរដ្ឋពីភូមិចាស់ធ្លាប់រស់នៅ ក៏ប៉ុន្តែមិនទាន់ឃើញមានដំណោះស្រាយនៅឡើយ ៖ "ផ្លូវក៏ឆ្ងាយមកផ្លូវខាងនេះក៏ឆ្ងាយ ទៅផ្លូវខាងនោះក៏ឆ្ងាយ។ អ៊ីចឹងបានប្រជាពលរដ្ឋគាត់ដាក់គម្រោងសុំទៅអភិបាលខេត្តរស់នៅតាមដងផ្លូវអាស៊ាន។ ពីរលើកហើយគេធ្វើតាំងពី២០០៨ មួយលើក ហើយនៅក្នុងខែ៩ ២០១១ នេះមួយលើក"។
ចំណែកតំណាងប្រជាពលរដ្ឋក្នុងឃុំស្រែគរ លោក សៀក មេគង្គ ឲ្យដឹងដែរថា ប្រជាពលរដ្ឋបានសម្រេចចិត្តថាមិនទៅតាំងទីលំនៅនៅតំបន់ទួលគ្រួសនោះទេ ពីព្រោះទីនោះមិនអំណោយផលសម្រាប់ប្រជាពលរដ្ឋរស់បាន ដីមានទំហំតូចសុទ្ធតែថ្មគ្រួស ឆ្ងាយពីទន្លេ មិនដូចភូមិចាស់របស់ពួកគាត់នោះឡើយ។ លោកបន្តថា ប្រសិនក្រុមអាជ្ញាធរមិនដោះស្រាយសំណើប្រជាពលរដ្ឋនោះទេ ពូកគាត់មិនរុះរើលំនៅឋានចាកចេញឡើយ ៖ "ផ្លូវអាស៊ាននោះវាស្រួល អនុវិទ្យាល័យក៏មាន ផ្សារក៏មាន បើអ៊ីចឹង អនាគតកូនចៅជំនាន់ក្រោយ ធនធានមនុស្សវាអាចរីកចំរើន។ ឥឡូវនេះទៅនៅត្រើយម្ខាងដូចអត់កោះត្រើយអ៊ីចឹង ដូចឲ្យស្លាប់អ៊ីចឹង ប្រជុំថ្ងៃ២៣ ប្រជុំឃុំបញ្ជាក់មេឃុំគាត់ថា ការផ្លាស់ទីលំនៅហ្នឹង អត់ដឹងសោះ"។
ទិន្នន័យប៉ាន់ប្រមាណក្នុងរបាយការណ៍វាយតម្លៃហេតុប៉ះពាល់បរិស្ថានចុងក្រោយនឹងបញ្ចប់នៃគម្រោងសាងសង់ទំនប់វារីអគ្គិសនីសេសានក្រោមពីរ មានប្រជាពលរដ្ឋជាង ១៥០០គ្រួសារ ក្នុងភូមិចំនួនប្រាំពីរ ក្នុងឃុំចំនួន៤ ក្នុងស្រុកសេសាន ត្រូវផ្លាស់ប្ដូរទីលំនៅទៅទីតាំងផ្សេង។
មេឃុំស្រែគរ លោក ធី ញ៉ឺង បានបញ្ជាក់ថា លោកគាំទ្រសំណើប្រជាពលរដ្ឋក្នុងឃុំរបស់លោក ពីព្រោះទីតាំងថ្មីពិតជាមិនសមស្របធានាការរស់នៅរបស់ប្រជាពលរដ្ឋបានងាយស្រួលដូចភូមិចាស់នោះទេ។ លោកបន្តថា ប្រជាពលរដ្ឋសហគមន៍បានប្រជុំឯកភាពគ្នារួចហើយថានឹងបញ្ឈប់ មិនឲ្យកម្មករកាប់រានព្រៃឈើសម្រាប់សំអាតអាងស្តុកទឹកនោះទៀតទេ ពីព្រោះក្រុមប្រឹក្សាឃុំ និងប្រជាពលរដ្ឋមិនបានទទួលព័ត៌មានស្ដីពីការអនុញ្ញាតឲ្យសំអាតព្រៃក្នុងអាងស្តុកទឹក និងដំណោះស្រាយផលប៉ះពាល់ជាក់លាក់ដល់ប្រជាពលរដ្ឋនៅឡើយ ៖ "មិនឲ្យយើងទៅឆ្ងាយពីទន្លេពេក គេថាអ៊ីចឹង។ ស្រែវាមានមួយចំនួន តែវាអត់មានច្រើន។ ស្រែនៅភូមិវានៅក្បែរគ្នាសោះហ្នឹង វាស្រួល ឥឡូវផ្លូវវាពិបាកមកស្រែ"។
កំណត់ហេតុនៅក្នុងសិក្ខាសាលាស្តីអំពីរបាយការណ៍វាយតម្លៃហេតុប៉ះពាល់បរិស្ថានពេញលេញ លើគម្រោងអភិវឌ្ឍទំនប់វារីអគ្គិសនីសេសានក្រោមពីរ និងច្បាប់ស្ដីពីសិទ្ធិមនុស្សកាលពីខែធ្នូ ឆ្នាំ២០១០ រៀបចំឡើងដោយ សម្ព័ន្ធទន្លេកម្ពុជានៅសណ្ឋាគារសេកុង ខេត្តស្ទឹងត្រែង ប្រជាពលរដ្ឋសហគមន៍អ្នករងផលប៉ះពាល់បានសំណូមពរប្ដូរទីតាំងសង់លំនៅឋានមានចំណុចសំខាន់រួមមាន ជ្រើសរើសទីតាំងលំនៅថ្មី សូមឲ្យពិភាក្សាជាមួយសហគមន៍ ហើយសហគមន៍ជាអ្នកសម្រេចផ្ទាល់ និងពង្រីកភូមិថ្មីមានស្ថានភាពដូចភូមិចាស់ ឬល្អជាងមុន មានហេដ្ឋារចនាសម្ព័ន្ធគ្រប់គ្រាន់ ដូចជាសាងសង់មន្ទីរពេទ្យ សាលារៀន វត្តអារាម បង្គន់អនាម័យ ផ្លូវថ្នល់ ដីមានជីវជាតិ និងរៀបចំទីផ្សារលក់ដូរ សម្រាប់ប្រជាពលរដ្ឋ និងជាពិសេសសុំឲ្យផ្ដល់សំណងមុននឹងផ្លាស់ប្ដូរទីលំនៅ។
វិទ្យុអាស៊ីសេរីនៅថ្ងៃព្រហស្បតិ៍ ទី២៦ ខែមករា ឆ្នាំ២០១២ មិនអាចទាក់ទងអភិបាលខេត្តស្ទឹងត្រែង គឺលោក ឡូយ សូផាត ដើម្បីអធិប្បាយបញ្ហានេះបានទេ ក៏ប៉ុន្តែកាលពីដើមសប្ដាហ៍នេះ មន្ត្រីក្រសួងឧស្សាហកម្មសុំមិនបញ្ចេញឈ្មោះបានបញ្ជាក់ថា គម្រោងសាងសង់ទំនប់វារីអគ្គិសនីសេសានក្រោមពីរ ឋិតក្នុងការពិភាក្សាថ្នាក់ជាតិ មិនទាន់មានការសម្រេចណាមួយនៃជំហានសាងសង់នោះទេ។
របាយការណ៍វាយតម្លៃហេតុប៉ះពាល់បរិស្ថានចុងក្រោយនឹងបញ្ចប់នៃគម្រោងសាងសង់ទំនប់វារីអគ្គិសនីសេសានក្រោមពីរ បានដាក់ចេញវិធានការកាត់បន្ថយសំខាន់ៗ ដែលម្ចាស់គម្រោងត្រូវអនុវត្ត រួមមាន ត្រូវកាត់បន្ថយផ្ទៃដីរងផលប៉ះពាល់ដោយសារអាងស្តុកទឹក។ ការផ្ដល់វិភាគទានសម្រាប់អភិរក្សសត្វព្រៃ រៀបចំស្ថានីយស្រាវជ្រាវភ្ញាស់កូនត្រី ពិនិត្យផលត្រី និងធនធានជលផល។
ការតាំងទីលំនៅសារជាថ្មី ត្រូវធ្វើឡើងអនុលោមទៅតាមផែនគ្រប់គ្រងការតាំងទីលំនៅឡើងវិញ ហើយដី និងហេដ្ឋារចនាសម្ព័ន្ធដែលផ្ដល់ឲ្យ ត្រូវតែដូចទៅនឹងអ្វីដែលអ្នកភូមិមានពីមុន ឬប្រសើរជាងមុន។ ការទូទាត់សងត្រូវមានការចរចាជាមួយអ្នកភូមិដែលរងផលប៉ះពាល់ និងយោងទម្រង់តាំងទីលំនៅសារជាថ្មី។ ផ្ដល់កម្មវិធីទ្រទ្រង់កសិកម្មដល់អ្នកភូមិ មណ្ឌលសុខភាពត្រូវផ្ដល់ឲ្យនៅតំបន់គម្រោង។ល។
អ្នកសម្របសម្រួលអង្គការទន្លេបី គឺ លោក មៀច មាន លោកបានបញ្ជាក់ថា តំបន់ដីដែលគេគ្រោងនឹងផ្ដល់ជូនប្រជាពលរដ្ឋមានប្រាំទីតាំង ក៏ប៉ុន្តែដីបីទីតាំងមានភូមិសាស្ត្រឆ្ងាយពីផ្លូវជាតិលេខ៧៨ ប្រមាណ៣គីឡូម៉ែត្រ។ ចំណែកដីមួយទីតាំងត្រូវឆ្លងទន្លេសេសាន្ត។ លោកបន្តថា រាជរដ្ឋាភិបាលគួរជំរុញឲ្យម្ចាស់គម្រោងអនុវត្តវិធានការបានដាក់ចេញក្នុងរបាយការណ៍សិក្សាហេតុប៉ះពាល់ផ្នែកបរិស្ថាន និងពិនិត្យឡើងវិញសំណូមពរប្រជាពលរដ្ឋផ្សេងទៀត ដែលមិនមានបញ្ចូលក្នុងគម្រោង ៖ "គាត់ចង់រស់នៅក្បែរផ្លូវធំ ផ្លូវដែលធ្វើល្អ ហើយខ្ញុំគិតថា គួរតែសម្របសម្រួលជូនគាត់។ មានតែរដ្ឋរួមសហការនឹងប្រជាជនខ្លូងឯងបានអាចធ្វើទៅបាន ព្រោះដីតម្រូវការទាំងដីភូមិទាំងដីបង្កបង្កើតផលចំពោះភូមិមួយៗ យ៉ាងតិចណាស់ក៏មានប្រមាណ ៤០០ហិកតារដែរ"។
ក្រុមហ៊ុនចំនួនពីរ គឺក្រុមហ៊ុនអេឡិចទ្រិចស៊ីធី វៀតណាម (Electricity Vietnam) និងក្រុមហ៊ុនរ៉ូយ៉ាល់ហ្គ្រូប (Royal Group) នៃប្រទេសកម្ពុជា កាលពីចុងខែមេសា ឆ្នាំ២០១១ បានចុះកិច្ចព្រមព្រាងសាងសង់ទំនប់វារីអគ្គិសនីសេសានក្រោមពីរ និងផលិតបានបរិមាណថាមពលអគ្គិសនីជាងពីរពាន់ ហ្សីវ៉ាត់ម៉ោងក្នុងមួយឆ្នាំៗ សម្រាប់ប្រើប្រាស់ក្នុងខេត្តភាគឦសានប្រទេស និងនាំចេញទៅប្រទេសវៀតណាម ប្រសិនសល់ពីតម្រូវការប្រើប្រាស់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។