លោក កុយ គង់ មន្ត្រីនាំពាក្យក្រសួងការបរទេសខ្មែរ មានប្រសាសន៍ប្រាប់វិទ្យុអាស៊ីសេរី នៅថ្ងៃទី០៤ មេសានេះ ថា ៖ «ការលើកឡើងតាមកំណត់ទូត របស់ក្រសួងការបរទេសថៃ ផ្ញើជួនស្ថានទូតកម្ពុជានៅទីក្រុងបាងកកនោះ គឺថាការលើកឡើងទាំងបំពាន មិនមានមូលដ្ឋានអ្វីច្បាស់លាស់ទេ។ ចេះតែលើកឡើងទាំងងងើល ដែលភាគីកម្ពុជាមិនអានទទួលយកបានទេ ហើយស្ថានទូតកម្ពុជា នៅក្រុងបាងកក ក៏បានបញ្ជូនកំណត់ទូតរបស់ខ្លួនវិញដែរ ចុះថ្ងៃ៣០ ខែមេសានេះ ទៅក្រសួងការបរទេសថៃបញ្ជាក់អំពី ដែលថាទីតាំងប្រាសាទតាក្របី ក៏ដូចជាការកសាងខ្សែរ៉កនេះ គឺពិតជាស្ថិតនៅក្នុងប្រទេសកម្ពុជាមែន សម្អាងលើសន្ធិសញ្ញា អនុសញ្ញាផែនទី ដែលអន្តរជាតិគេទទួលស្គាល់ ហើយសូមបញ្ជាក់ថា សូម្បីតែផែនទីដែលថៃគូរជាឯកតោភាគីនោះ ក៏បញ្ជាក់ថា ប្រាសាទតាក្របីនោះ នៅតែស្ថិតនៅក្នុងដែនដីនៃប្រទេសកម្ពុជាផងដែរ»។
ការឆ្លើយតបនេះ ធ្វើឡើងបន្ទាប់ពីក្រសួងការបរទេសថៃបានផ្ញើលិខិតមួយច្បាប់ កាលពីថ្ងៃទី២៩ មេសា ឆ្នាំ២០០១០ ថា ប្រាសាទតាក្របីជារបស់ថៃ ហើយតំបន់សាងសង់ខ្សែរ៉ករបស់កងទ័ពខ្មែរនៅក្បែរនោះ ក៏ស្ថិតនៅក្នុងទឹកដីថៃដែរ៕