យុវជន ប៊ុន ថាត នៅភូមិ៨ ក្រុម៤៦អា ក្នុងសហគមន៍រីករាយ ឲ្យដឹងថា ធនាគារបានកំណត់តម្លៃដីនិងផ្ទះតែ ២ម៉ឺនដុល្លារ ឬឲ្យផ្ទះផ្ទាល់ដី១ល្វែង ទំហំ ៤ គុណ ១០ម៉ែត្រ នៅខណ្ឌដង្កោ និងប្រាក់១ម៉ឺនដុល្លារឲ្យចាកចេញ បើមិនព្រម គេមកបង្ខំរុះរើផ្ទះនិងបង្ខំបិទរបងស័ង្កសីនៅពីមុខផ្ទះ មិនឲ្យចេញចូលចំពោះផ្ទះប្រជាជនណា ដែលមិនព្រមលក់ផ្ទះឲ្យធនាគារ។ ដូចថ្ងៃនេះ គេបង្ខំរុះអស់ផ្ទះ៩ខ្នងហើយ។
យុវជន ប៊ុន ថាត រៀបរាប់ដូច្នេះថា ៖ «ខាងក្រុមហ៊ុនកាណាឌីយ៉ា គេត្រូវហ៊ុមព័ទ្ធយកដីរបស់យើងតែម្ដង ឲ្យតែយើងជាប់មានទំនាក់ទំនងធ្វើការលក់ដូរជាមួយនឹងបុគ្គលផ្សេងទៀត»។
សាស្រ្តាចារ្យវិទ្យាល័យព្រះស៊ីសុវត្ថិ លោក ចាន់ ប៊ុនថុល ដែលកំពុងការពារផ្ទះរបស់គាត់ មានប្រសាសន៍ថា ក្រុមកម្មកររបស់ធនាគារកាណាឌីយ៉ា ហាក់ដូចជាចោរប្លន់មកសម្រុករុះផ្ទះ នៅថ្ងៃឈប់សម្រាក ៖ «ខ្ញុំអត់មានពេលទៅបង្រៀនទៀតទេឥឡូវហ្នឹង ដោយសារតែខ្លាចគេរុះផ្ទះរបស់ខ្ញុំ»។
ប្រធានសហគមន៍រីករាយ លោក ហេង សម្ផស្ស មានប្រសាសន៍ថា មកទល់ពេលនេះ អ្នករស់នៅសហគមន៍រីករាយមួយចំនួនបានយល់ព្រមលក់ផ្ទះឲ្យធនគារកាណាឌីយ៉ា ៖ «វ៉ៃផ្ទះវ៉ៃអីអ៊ីចឹង យើងអ្នកនៅជិតៗមិនទាន់បានលក់ យើងមានការភ័យខ្លាច ហើយគេថាឲ្យទៅចរចាទៅ។ គេថា ថ្ងៃនេះគេបិទការចរចា ថ្ងៃនោះគេបិទការចរចាអីអ៊ីចឹង»។
មេភូមិ៨ ក្រុម៤៦អា ក្នុងសហគមន៍រីករាយ លោក ហោ វណ្ណៈ មានប្រសាសន៍ថា ក្នុងភូមិនោះមានប្រជាជនជាង២០០គ្រួសារ ផ្ទះជាង២០០ខ្នងដែរ ពួកគេភាគច្រើនជាមន្រ្តីរាជការ។ លោកថា ភូមិនោះបានជាប់ពាក់ព័ន្ធផ្លូវនិងសួនច្បារតំបន់អភិវឌ្ឍន៍កោះពេជ្រ។ ក្រោយមកមានការចរចាទិញដីផ្ទះពីអ្នកស្រុកដោយធនាគារកាណាឌីយ៉ា និងឯកជនមួយចំនួន។
លោកថា អ្នកលក់ដូរដីផ្ទះឲ្យធនាគារកាណាឌីយ៉ា និងអ្នកដទៃទៀត មានចំនួនប៉ុន្មានគ្រួសារនោះ លោកមិនច្បាស់លាស់ទេ ៖ «តំបន់លើទំនប់រីករាយនេះ វាចំផ្លូវរបស់សាលាក្រុង ហើយនិងស្ពានឆ្លងទៅកោះពេជ្រទៀត ស្ពានទី២»។
ចៅសង្កាត់រងនៃសង្កាត់ទន្លេបាសាក់ លោក ផល ស៊ីថុន មានប្រសាសន៍ថា តាមស.ជ.ណ. ទីស្តីការគណៈរដ្ឋមន្រ្តីលេខ១៥៧ ចុះថ្ងៃ៣០ ខែមករា ឆ្នាំ២០០៩ សម្រេចឲ្យមានការអភិវឌ្ឍសហគមន៍រីករាយនៅកន្លែងក៏បាន តាមចំនួនគ្រួសារ ឬផ្តល់ផ្ទះ ១ល្វែង ទំហំ ៤ គុណ ១០ម៉ែត្រ នៅជាយក្រុងភ្នំពេញនិងប្រាក់១ម៉ឺនដុល្លារ។
លោក ផល ស៊ីថុន មានប្រសាសន៍ដូច្នេះថា ៖ «ពីព្រោះដីមួយចំណែកស្ថិតនៅក្នុងដីលោកជំទាវ ហ៊ុន ណេង រួចមួយផ្នែកទៅពលរដ្ឋតាំងទីលំនៅ កាណាឌីយ៉ា ថាហ្នឹងដីរបស់គេ ប៉ុន្តែខ្ញុំបានឃើញគម្រោងអភិវឌ្ឍន៍ កែប ជុតិមា ស៊ីញ៉េ ក្នុងឆ្នាំ២០០៦ ប៉ុន្តែអ្វីដែលប្រជាពលរដ្ឋតាំងទីលំនៅហ្នឹង គឺថាអ្នកខ្លះតាំងទីលំនៅតាំងពីឆ្នាំ ៩០»។
ពាក់ព័ន្ធបញ្ហានេះ វិទ្យុអាស៊ីសេរីមិនអាចទាក់ទងសុំការពន្យល់ពីតំណាងធនាគារកាណាឌីយ៉ាបានក្នុងថ្ងៃអាទិត្យឈប់សម្រាក៕