លោក សម រង្ស៊ី បានឲ្យដឹងតាមទូរស័ព្ទពីប្រទេសបារាំង មកថា នៅព្រឹកថ្ងៃទី១៨ តុលា លោកបានផ្ញើលិខិតថ្វាយទៅព្រះមហាក្សត្រ នរោត្តម សហមុនី និងលោកនាយករដ្ឋមន្ត្រី ហ៊ុន សែន ដែលលិខិតទាំងពីរនោះ មានខ្លឹមសារដូចគ្នា គឺសុំព្រះរាជអន្តរាគមន៍ពីព្រះមហាក្សត្រ និងសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ដើម្បីឲ្យលោកមានឱកាសមកចូលរួមគោរពព្រះវិញ្ញាណក្ខន្ធ និងចង់ឃើញព្រះភ័ក្ដ្រអតីតព្រះមហាក្សត្រជាលើកចុងក្រោយ។
លោក សម រង្ស៊ី បានបញ្ជាក់អំពីកាលបរិច្ឆេទការអញ្ជើញមកចូលរួមគោរពព្រះវិញ្ញាណក្ខន្ធ ព្រះមហាវីរក្សត្រ នោះ អាស្រ័យលើព្រះរាជានុញ្ញាត និងការអន្តរាគមន៍របស់លោកនាយករដ្ឋមន្ត្រី ហ៊ុន សែន នៅក្នុងឱកាសតម្កល់ព្រះបរមសពរបស់អតីតព្រះមហាក្សត្រនៅក្នុងព្រះបរមរាជវាំងនេះ។
វិទ្យុអាស៊ីសេរី មិនអាចទាក់ទងជំនួយការផ្ទាល់លោកនាយករដ្ឋមន្ត្រី ហ៊ុន សែន លោក អ៊ាង សុផល្លែត ដើម្បីសួរអំពីបញ្ហានេះបាននៅឡើយទេ នៅថ្ងៃទី១៨ តុលា ឆ្នាំ២០១២។
រីឯទីប្រឹក្សាអមព្រះរាជខុទ្ទកាល័យ ព្រះមហាក្សត្រ ព្រះអង្គម្ចាស់ ស៊ីសុវត្ថិ ធម្មិកោ មានព្រះរាជបន្ទូលថា ករណីស្នើសុំនេះជាសិទ្ធិរបស់លោក សម រង្ស៊ី ព្រះអង្គមិនអាចមានបន្ទូលថាយ៉ាងណាទេ។ ទោះបីជាយ៉ាងណាក៏ដោយ ព្រះអង្គម្ចាស់ ស៊ីសុវត្ថិ ធម្មិកោ មានបន្ទូលបញ្ជាក់ថា លោក សម រង្ស៊ី ធ្លាប់បានដង្ហែតាមអតីតព្រះមហាវីរក្សត្រពីមុនមក ពិសេសលោកធ្លាប់បម្រើនយោបាយគណបក្សហ៊្វុនស៊ិនប៉ិច។
រីឯអ្នកវិភាគឯករាជ្យ អ្នកស្រី ជា វណ្ណាត បានសម្ដែងសុទិដ្ឋិនិយមថា រដ្ឋាភិបាលនឹងបន្ទន់ឥរិយាបថផ្នែកនយោបាយ ដើម្បីបើកឱកាសឲ្យលោក សម រង្ស៊ី វិលមកចូលរួមគោរពព្រះវិញ្ញាណក្ខន្ធអតីតព្រះមហាក្សត្រ ពីព្រោះថា គោលនយោបាយដ៏សំខាន់របស់ព្រះករុណា ព្រះបាទសម្ដេចព្រះ នរោត្តម សីហនុ គឺបង្រួមបង្រួម និងផ្សះផ្សាជាតិ។
លោក សម រង្ស៊ី ត្រូវបានតុលាការកាត់ទោសឲ្យជាប់ពន្ធនាគារចំនួន ១២ឆ្នាំ ពីបទបំផ្លាញតម្រុយបង្គោលព្រំដែនកម្ពុជា-វៀតណាម និងបទក្លែងបន្លំឯកសារពាក់ព័ន្ធនឹងផែនទីព្រំដែនកម្ពុជា-វៀតណាម។ ប៉ុន្តែ ការកាត់ទោសនេះ ត្រូវបានគណបក្សប្រឆាំងច្រានចោល និងអះអាងថា តុលាការមិនឯករាជ្យ តុលាការស្ថិតនៅក្រោមឥទ្ធិពលអ្នកនយោបាយ។ រីឯក្រុមមន្ត្រីសិទ្ធិមនុស្សជាតិ និងអន្តរជាតិ បានចាត់ទុកថា ការកាត់ទោសលោក សម រង្ស៊ី ជារឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។