តុលាការ​កាត់​ទោស សម រង្ស៊ី ឲ្យ​ជាប់​គុក​១០​ឆ្នាំ

តុលាការ​សាលា​ដំបូង​រាជធានី​ភ្នំពេញ នៅ​ថ្ងៃ​២៣ កញ្ញា​នេះ បាន​ប្រកាស​សាលក្រម​ផ្ដន្ទា​ទោស​កំបាំង​មុខ​ឲ្យ​លោក សម រង្ស៊ី មេ​ដឹក​នាំ​គណបក្ស​ប្រឆាំង ជាប់​គុក​រយៈពេល ១០​ឆ្នាំ ក្រោម​បទ​ផ្សាយ​ព័ត៌មាន​មិន​ពិត និង​ក្លែង​បន្លំ​ឯកសារ​សាធារណៈ​ផែនទី កាល​ពី​ដើម​ឆ្នាំ​២០១០។

0:00 / 0:00

លោក កែ សាខន ចៅក្រម​តុលាការ​សាលា​ដំបូង​រាជធានី​ភ្នំពេញ នៅ​ថ្ងៃ​ទី​២៣ ខែ​កញ្ញា បាន​ប្រកាស​សាលក្រម​ផ្ដន្ទា​ទោស​កំបាំង​មុខ​ឲ្យ​មេ​ដឹក​នាំ​គណបក្ស​ប្រឆាំង លោក សម រង្ស៊ី ជាប់​គុក​រយៈពេល ១០​ឆ្នាំ ក្រោម​បទ​ផ្សាយ​ព័ត៌មាន​មិន​ពិត និង​បទ​ក្លែង​បន្លំ​ឯកសារ​សាធារណៈ​ផែនទី ដែល​បាន​ចោទ​ថា ប្រទេស​កម្ពុជា បាត់​បង់​ទឹក​ដី​ទៅ​ប្រទេស​ប្រទេស​វៀតណាម រវាង​ពី ២០០​ម៉ែត្រ ទៅ​ជាង ៥០០​ម៉ែត្រ តាម​រយៈ​ការ​បោះ​តម្រុយ​បង្គោល​ព្រំដែន​រវាង​ប្រទេស​ទាំង​ពីរ​នៅ​ស្រុក​ចន្ទ្រា ខេត្ត​ស្វាយរៀង កន្លង​មក។

តុលាការ​ដដែល​បាន​បង្គាប់​ឲ្យ​លោក សម រង្ស៊ី បង់​ប្រាក់​ផាក​ពិន័យ​ចំនួន ៥​លាន​រៀល ស្មើ​នឹង ១.២៥០​ដុល្លារ​អាមេរិក ចូល​ថវិកា​រដ្ឋ និង​ប្រាក់​សំណង​ជំងឺ​ចិត្ត​ដល់​រដ្ឋាភិបាល​កម្ពុជា ចំនួន ៦០​លាន​រៀល​ទៀត ស្មើ​នឹង ១៥.០០០​ដុល្លារ​អាមេរិក ចូល​ថវិកា​រដ្ឋ​ដែរ។

តុលាការ​បាន​បញ្ជា​ឲ្យ​អាជ្ញាធរ​រដ្ឋាភិបាល​កម្ពុជា តាម​ចាប់​ខ្លួន​លោក សម រង្ស៊ី តាម​មាត្រា​ទី ៣៥៣ នៃ​ក្រម​ព្រហ្មទណ្ឌ។ ដើម​បណ្ដឹង​នៃ​សំណុំ​រឿង​នេះ គឺ​រដ្ឋាភិបាល​កម្ពុជា។

លោក កែ សាខន បាន​អាន​សាលក្រម​បន្ត​ថា លោក សម រង្ស៊ី បាន​ធ្វើ​ឲ្យ​មតិ​ជាតិ និង​អន្តរជាតិ​យល់​ច្រឡំ​មក​លើ​រដ្ឋាភិបាល​កម្ពុជា និង​ធ្វើ​ឲ្យ​​ប៉ះ​ពាល់​ទំនាក់​ទំនង​រវាង​កម្ពុជា និង​វៀតណាម ៖ «ជន​ជាប់​ចោទ (សម រង្ស៊ី) បាន​ផ្សាយ​ព័ត៌មាន​មិន​ពិត ដោយ​ទម្លាក់​កំហុស​ដោយ​អសុទ្ធចិត្ត​មក​លើ​រាជ​រដ្ឋាភិបាល​នៃ​ព្រះរាជាណាចក្រ​កម្ពុជា ក្នុង​បំណង​បំផ្លិចបំផ្លាញ​កិត្តិយស​របស់​រាជ​រដ្ឋាភិបាល និង​ធ្វើ​ឲ្យ​កើត​មាន​កោលាហល​ដល់​សន្តិសុខ​សាធារណៈ​ទៀត​ផង»

មេធាវី​ការពារ​ក្ដី​ឲ្យ​លោក សម រង្ស៊ី គឺ​លោក ជូង ជូងី បាន​មាន​ប្រសាសន៍​ខ្លី​ក្រោយ​ពី​ការ​ប្រកាស​សាលក្រម​នោះ​ថា លោក​គ្មាន​អ្វី​ធ្វើ​អត្ថាធិប្បាយ​ជា​ពិស្ដារ​ទេ ៖ «ចាំ​ខ្ញុំ​ពិចារណា​ជាមួយ​កូន​ក្តី​របស់​ខ្ញុំ​សិន​ថា តើ​ត្រូវ​ធ្វើ​យ៉ាង​ម៉េច​ត​ទៅ​ទៀត»

ទាក់ទង​នឹង​ការ​ប្រកាស​សាលក្រម​ខាង​លើ​នេះ មេធាវី​របស់​រដ្ឋាភិបាល​កម្ពុជា គឺ​លោក គី តិច បាន​មាន​ប្រសាសន៍​ថា សាលក្រម​នេះ​យុត្តិធម៌​ហើយ ៖ «ប្រាក់​ពិន័យ ក៏​ដូច​ជា​សំណង​ជំងឺ​ចិត្ត និង​ការ​ខូចខាត​ហ្នឹង ខ្ញុំ​បាន​ទាមទារ​ជំនួស​រាជ​រដ្ឋាភិបាល​ហ្នឹង​ចំនួន ១០០​លាន​រៀល ប៉ុន្តែ​តុលាការ​បាន​សម្រេច​បាន​តែ ៦០​លាន​រៀល​ទេ។ ប៉ុន្តែ​ខ្ញុំ​យល់​ថា នេះ​ក៏​ជា​ការ​ត្រឹមត្រូវ​ដែរ។ ចំពោះ​ការ​ចាប់​ខ្លួន​នេះ នេះ​ជា​សិទ្ធិ​របស់​តុលាការ»

គេ​បាន​ឃើញ​មាន​តំណាង​រាស្ត្រ​គណបក្ស​ប្រឆាំង សម រង្ស៊ី ចំនួន ៣ ឬ ៤​នាក់​ប៉ុណ្ណោះ បាន​ចូល​ស្ដាប់​ការ​ប្រកាស​សាលក្រម​នេះ នៅ​គ្រា​ដែល​រដ្ឋាភិបាល​បាន​ដាក់​ពង្រាយ​កម្លាំង​អន្តរាគមន៍​រាប់​សិប​នាក់ និង​បិទ​ផ្លូវ​នានា​នៅ​ជុំវិញ​តុលាការ​នោះ។

ការ​ផ្ដន្ទា​ទោស​ឲ្យ​លោក សម រង្ស៊ី ជាប់​គុក​រយៈ​ពេល ១០​ឆ្នាំ​ខាង​លើ​នេះ គឺ​ជា​សំណុំ​រឿង​ព្រហ្មទណ្ឌ​ទី​២​ហើយ ក្រោម​បទ​ផ្សាយ​ព័ត៌មាន​មិន​ពិត និង​ក្លែង​បន្លំ​ឯកសារ​សាធារណៈ​ផែនទី ដែល​បាន​ចោទ​ថា ការ​បោះ​តម្រុយ​បង្គោល​ព្រំដែន​រវាង​កម្ពុជា និង​វៀតណាម លេខ​១៨៤ លេខ​១៨៥ លេខ​១៨៦ និង​លេខ​១៨៧ នៅ​ភូមិ​កោះក្បានកណ្តាល ឃុំ​សំរោង ស្រុក​ចន្ទ្រា ខេត្ត​ស្វាយរៀង បាន​ធ្វើ​ឲ្យ​កម្ពុជា បាត់​បង​ទឹក​ដី​រវាង​ពី ២០០​ម៉ែត្រ ទៅ​ជាង ៥០០​ម៉ែត្រ ទៅ​ប្រទេស​វៀតណាម។

តុលាការ​ខេត្ត​ស្វាយរៀង បាន​កាត់​ទោស​កំបាំង​មុខ​រួច​ម្ដង​ទៅ​ហើយ​លើ​សំណុំ​ទី​១ ឲ្យ​លោក សម រង្ស៊ី ជាប់​គុក​រយៈ​ពេល ២​ឆ្នាំ កាល​ពី​ថ្ងៃ​ទី​២៧ ខែ​មករា ឆ្នាំ​២០១០ កន្លង​ទៅ ក្រោម​បទ​បំផ្លាញ​ទ្រព្យ​សម្បត្តិ​សាធារណៈ និង​បទ​ញុះញង់​ឲ្យ​មាន​ការ​រើស​អើង​ជាតិ​សាសន៍ ដោយសារ​តែ​លោក​បាន​ទៅ​ដក​តម្រុយ​បង្គោល​ព្រំដែន​លេខ ១៨៥ នៅ​ក្នុង​ភូមិ​កោះក្បានកណ្តាល ឃុំ​សំរោង ស្រុក​ចន្ទ្រា ខេត្ត​ស្វាយរៀង កាល​ពី​ថ្ងៃ​ទី​២៩ ខែ​តុលា ឆ្នាំ​២០០៩ កន្លង​ទៅ នៅ​គ្រា​ដែល​កសិករ​បាន​អះអាង​ថា តម្រុយ​បង្គោល​ព្រំដែន​នោះ​បាន​បោះ​លើ​ដី​ស្រែ​របស់​ពួក​គាត់។

កាល​ពី​ថ្ងៃ​ទី​៩ ខែ​កញ្ញា កន្លង​ទៅ​នេះ តុលាការ​សាលា​ដំបូង​រាជ​ធានី​ភ្នំពេញ បាន​ចេញ​ដីកា​កោះ​ហៅ​លោក សម រង្ស៊ី មក​ឆ្លើយ​បំភ្លឺ​លើ​សំណុំ​រឿង​ថ្មី​មួយ​ទៀត គឺ​ជា​សំណុំ​រឿង​ទី​៣ ក្រោម​បទ​បរិហារ​កេរ្ដិ៍ និង​បទ​ផ្សាយ​ព័ត៌មាន​មិន​ពិត ដែល​លោក​បាន​ចោទ​ថា រដ្ឋមន្ត្រី​ក្រសួង​ការបរទេស​កម្ពុជា លោក ហោ ណាំហុង ជា​អតីត​មេ​គុក​បឹង​ត្របែក​សម័យ​ខ្មែរ​ក្រហម។

លោក សម រង្ស៊ី បាន​ចាញ់​ក្ដី​នៅ​ឯ​តុលាការ​ប្រទេស​បារាំង កាល​ពី​ឆ្នាំ​២០០៨ និង​ឆ្នាំ​២០០៩ ប្ដឹង​ដោយ​លោក ហោ ណាំហុង រដ្ឋមន្ត្រី​ក្រសួង​ការបរទេស​កម្ពុជា៕