មេដឹកនាំគណបក្សប្រឆាំង លោក សម រង្ស៊ី នៅថៃ្ងទី២៤ ខែកញ្ញា បានប្រកាសប្តឹងលោកនាយករដ្ឋមន្ត្រី ហ៊ុន សែន ជាផ្លូវការហើយ ទៅតុលាការនៅក្នុងទីក្រុងញូវយ៉ក (New York) សហរដ្ឋអាមេរិក ដោយបានចោទប្រកាន់ថា លោកនាយករដ្ឋមន្ត្រី ហ៊ុន សែន មានការពាក់ព័ន្ធក្នុងអំពើវាយប្រហារដោយគ្រាប់បែកដៃ កាលពីថ្ងៃទី៣០ ខែមីនា ឆ្នាំ១៩៩៧ កន្លងទៅ ដែលបានសម្លាប់មនុស្សចំនួនជិត ២០នាក់ និងរងរបួសជាង ១០០នាក់។
លោកក៏បានប្តឹងសំណុំរឿងព្រហ្មទណ្ឌដដែលនេះទៅតុលាការនៅក្នុងប្រទេសអេស្ប៉ាញ (Spain) ផងដែរ នៅថៃ្ងទី២៣ ខែកញ្ញា។
ជនជាតិអាមេរិកាំងម្នាក់ គឺលោក រ៉ុន អាបនី (Ron Abney) ដែលបានរងរបួសនៅក្នុងព្រឹត្តិការណ៍នោះដែរ ត្រូវបានលោក សម រង្ស៊ី បានឲ្យដឹងថា បានដាក់ពាក្យបណ្ដឹងផងដែរទៅតុលាការក្រុងញូវយ៉កនោះ។
ការប្រកាសប្តឹងនេះ បានធ្វើទ្បើងនៅក្នុងសន្និសីទកាសែតមួយតាមរយៈវីដេអូ ខនហ្វើរេនស៍ (Video Conference) ពីទីក្រុងប៉ារីស (Paris) ប្រទេសបារាំង មកទីស្នាក់ការគណបក្សនេះនៅក្នុងទីក្រុងភ្នំពេញ នៅថៃ្ងទី២៤ ខែកញ្ញា។
មេដឹកនាំគណបក្សប្រឆាំង លោក សម រង្ស៊ី ដែលកំពុងតែរស់នៅនិរទេសខ្លួននៅក្នុងប្រទេសបារាំង បានមានប្រសាសន៍ថា លោកមិនចង់បានសំណងជំងឺចិត្តអ្វីទេក្រៅពីការផ្ដន្ទាទោស ៖ «ថាចង់សម្លាប់តែខ្ញុំ សម រង្ស៊ី ម្នាក់ឯងណា? ធ្វើបែបហ្នឹងសម្លាប់គេ ស្លាប់គេស្លាប់ឯងច្រើន។ អាហ្នឹងចូលទៅក្នុងបទឧក្រិដ្ឋប្រឆាំងមនុស្សជាតិ។ ហ្នឹងទោះជាធ្វើប្រមុខរដ្ឋ ធ្វើស្ដេច ធ្វើស្អីក៏ដោយ ធ្វើហ្លួង ធ្វើប្រធានាធិបតី នាយករដ្ឋមន្ត្រីដល់ណាក៏ដោយ តែគេតាមចាប់ បទឧក្រិដ្ឋបែបហ្នឹងគេអាចចាប់បាន។ អ៊ីចឹងខ្ញុំជឿជាក់ថា តុលាការនៅសហរដ្ឋអាមេរិក ពេលដែលយើងកំពុងតែនិយាយគ្នានេះ គឺគេចាំទទួលលោក ហ៊ុន សែន នៅទីក្រុងញូវយ៉កដែរ»។
លោក សម រង្ស៊ី បានផ្អែកលើរបាយការណ៍ស៊ើបអង្កេតរបស់ការិយាល័យសហព័ន្ធស៊ើបអង្កេតសម្ងាត់របស់សហរដ្ឋអាមេរិកកន្លងមក ឬហាត់ថា អេហ្វ.ប៊ី.អាយ (FBI)។ គេបានចែកចាយពាក្យបណ្ដឹងនៃសំណុំរឿងចោទប្រកាន់នោះឲ្យអ្នកសារព័ត៌មាននានា នៅក្នុងសន្និសីទកាសែតនោះ អំពីរបាយការណ៍របស់អេហ្វ.ប៊ី.អាយ និងឈ្មោះមេធាវីរបស់លោក។
ការប្តឹងរបស់លោក សម រង្ស៊ី ប្រឆាំងលោកនាយករដ្ឋមន្ត្រី ហ៊ុន សែន នៅពេលនេះ គឺនៅគ្រាដែលលោកនាយករដ្ឋមន្ត្រី ហ៊ុន សែន និងប្រតិភូជាន់ខ្ពស់របស់រដ្ឋាភិបាលកម្ពុជា កំពុងតែបំពេញទស្សនកិច្ចនៅក្នុងសហរដ្ឋអាមេរិក តាមការអញ្ជើញរបស់ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) ដើម្បីចូលរួមនៅក្នុងកិច្ចប្រជុំថ្នាក់ដឹកនាំអាស៊ាន-សហរដ្ឋអាមេរិក លើកទី២ នៅក្នុងទីក្រុងញូវយ៉ក សហរដ្ឋអាមេរិក និងការចូលរួមក្នុងមហាសន្និបាតរបស់អង្គការសហប្រជាជាតិផងដែរ។
មន្ត្រីអ្នកនាំពាក្យរបស់អគ្គស្នងការដ្ឋាននគរបាលជាតិកម្ពុជា លោកឧត្ដមសេនីយ៍ឯក គៀត ចន្ថារិទ្ធ បានមានប្រសាសន៍ថា សំណុំរឿងឃាតកម្មនេះមិនទាន់បានបិទនៅឡើយទេ ៖ «បើសិនជារឿងហ្នឹងចប់ចុងចប់ដើម បានវាចប់។ បើវាអត់ចប់ទេ យើងអត់បញ្ចប់ទេ។ មនុស្សមួយចំនួនគេចខ្លួន ឧទាហរណ៍អ៊ីចឹងណា! រឿងហ្នឹងចប់ចុងចប់ដើមមានន័យថា មុខសញ្ញាពាក់ព័ន្ធប៉ុន្មានត្រូវបានរកឃើញ និងឃាត់ខ្លួនទាំងអស់ អាហ្នឹងវាចប់ហើយ»។
កាលពី ១៣ឆ្នាំកន្លងទៅ នៅថៃ្ងទី៣០ ខែមីនា ឆ្នាំ១៩៩៧ លោក សម រង្ស៊ី មេដឹកនាំគណបក្សជាតិខែ្មរ បច្ចុប្បន្នជាគណបក្ស សម រង្ស៊ី) បានដឹកនាំបាតុកម្មនៃកម្មករជាច្រើនរយនាក់នៅខាងសភាជាតិ នៅក្នុងទីក្រុងភ្នំពេញ ដើម្បីទាមទារឲ្យកែទម្រង់ប្រព័ន្ធតុលាការយុត្តិធម៌ និងប្រឆាំងអំពើពុករលួយ ប៉ុន្តែមានជនមិនស្គាល់មុខបានគប់គ្រាប់បែកដៃចំនួន ៤គ្រាប់ មកលើហ្វូងបាតុករ បណ្ដាលឲ្យស្លាប់ចំនួនជិត ២០នាក់ និងរងរបួសជាង ១០០នាក់។
មកដល់ពេលនេះ គេមិនទាន់បានឃើញជនសង្ស័យណាម្នាក់ត្រូវបានចាប់ខ្លួនផ្ដន្ទាទោសនៅឡើយទេ។
លោក សម រង្ស៊ី បានរងការប្ដឹងរួចម្ដងទៅហើយ ដោយលោកនាយករដ្ឋមន្ត្រី ហ៊ុន សែន កាលពីឆ្នាំ២០០៤ កន្លងទៅ ក្រោមបទបរិហារកេរ្តិ៍ និងជេរប្រមាថ ដោយសារតែការចោទប្រកាន់រឿងនេះកន្លងមក៕