ព្រឹទ្ធសភា និងរដ្ឋសភាប្រទេសកម្ពុជា នៅពីថ្ងៃអង្គារ ទី៨ ខែមិថុនានេះ បានបោះឆ្នោតផ្ដល់សេចក្ដីទុកចិត្តដល់បេក្ខភាពពីររូបជាសមាជិកក្រុមប្រឹក្សាជាតិប្រឆាំងអំពើពុករលួយ ដែលជាតំណាងរបស់អង្គសភាទាំងពីរនេះ ដើម្បីបង្កើតក្រុមប្រឹក្សាជាតិប្រឆាំងអំពើពុករលួយនៅពេលឆាប់ៗ។
គណបក្សប្រឆាំងបានសម្ដែងការមិនគាំទ្រចំពោះការជ្រើសរើសបេក្ខជនទាំងពីរនេះទេ ដោយនិយាយថា ពួកគេជាសមាជិករបស់គណបក្សប្រជាជនកម្ពុជា។
លោក ប្រាក់ សុខ និងលោក តុប សំ ជាអតីតសមាជិកក្រុមប្រឹក្សាធម្មនុញ្ញមកពីគណបក្សកាន់អំណាច ត្រូវបានព្រឹទ្ធសភា និងរដ្ឋសភាផ្ដល់ការទុកចិត្តដោយសំឡេងឆ្នោតភាគច្រើន កាលពីព្រឹកថ្ងៃអង្គារ ទី៨ ខែមិថុនានេះ។
លោក ប្រាក់ សុខ ត្រូវបានសមាជិកព្រឹទ្ធសភាចំនួន ៤៥រូប ក្នុងចំណោមសមាជិក ៥៣រូប បោះឆ្នោតគាំទ្រ ហើយលោក តុប សំ ត្រូវបានសមាជិកសភាចំនួន ៨៣រូប ក្នុងចំណោមសមាជិកសភា ១០៦រូប បានបោះឆ្នោតគាំទ្រ។
ក្រុមប្រឹក្សាជាតិប្រឆាំងអំពើពុករលួយមានតួនាទីពិគ្រោះយោបល់ និងផ្ដល់អនុសាសន៍លើការងារប្រយុទ្ធប្រឆាំងអំពើពុករលួយ ឃ្លាំមើលដំណើរការការងារនៃអង្គភាពប្រឆាំងអំពើពុករលួយ និងធ្វើរបាយការណ៍ជូននាយករដ្ឋមន្ត្រីអំពីដំណើរការរបស់អង្គភាពប្រឆាំងអំពើពុករលួយ។ ក្រុមប្រឹក្សានេះមានសមាជិក ១១រូប។ ឥស្សរជនទាំង ១១រូបនេះត្រូវមានសញ្ជាតិខ្មែរ មានសញ្ញាបត្រចាប់ពីឧត្ដមសិក្សា មានបទពិសោធន៍ការងារក្នុងសង្គមយ៉ាងតិច ១០ឆ្នាំ និងមានអាយុយ៉ាងតិច ៤៥ឆ្នាំ។
ក្នុងចំណោមឥស្សរជនទាំង ១១រូបនេះ ឥស្សរជនបីរូបត្រូវតែងតាំងពីសំណាក់ព្រះមហាក្សត្រ ព្រឹទ្ធសភា និងរដ្ឋសភា។
សមាជិករដ្ឋសភា និងជាសមាជិកជាន់ខ្ពស់គណបក្សប្រជាជនកម្ពុជា លោក ជាម យៀប បានប្រសាសន៍កាលពីថ្ងៃអង្គារ ទី៨ ខែមិថុនានេះថា សភាទាំងពីរផ្ដល់សេចក្ដីទុកចិត្តលើបេក្ខភាពទាំងពីរនេះ ដោយផ្អែកទៅលើបទពិសោធន៍របស់ពួកគេកន្លងមក ហើយអ្នកទាំងពីរមានកេរ្តិ៍ឈ្មោះស្អាតស្អំ មិនដែលជាប់ពាក់ព័ន្ធនឹងអំពើពុករលួយឡើយ។
លោកបន្ថែមថា ទោះបីជាបេក្ខជនទាំងពីររូបនេះជាសមាជិករបស់គណបក្សកាន់អំណាចក៏ដោយ ប៉ុន្តែពួកគេនឹងអនុវត្តការប្រយុទ្ធប្រឆាំងអំពើពុករលួយដោយប្រសិទ្ធភាព ដោយសារពួកគេអនុវត្តតាមច្បាប់ដែលបានកំណត់ ដោយមិនផ្អែកទៅលើនិន្នាការនយោបាយ។
លោក ជាម យៀប មានប្រសាសន៍ដូច្នេះ ៖ «...ទៅលើការគោរពតាមច្បាប់ ច្បាប់បញ្ញត្តិយ៉ាងម៉េចគោរពច្បាប់ហ្នឹងទៅ គឺថា ឯករាជ្យទៅតាមហ្នុងហើយ»។
អ្នកនាំពាក្យគណបក្សសមរង្ស៊ី លោក យឹម សុវណ្ណ បានមានប្រសាសន៍កាលពីថ្ងៃអង្គារ ទី៨ ខែមិថុនានេះថា គណបក្សប្រឆាំងមិនមានជំនឿថា អង្គភាពប្រយុទ្ធប្រឆាំងអំពើពុករលួយនេះអាចធ្វើការមានប្រសិទ្ធភាពទេ ពីព្រោះអ្នកប្រព្រឹត្តអំពើពុករលួយ ភាគច្រើនគឺមកពីគណបក្សកាន់អំណាច។ លោកថា សមាជិកអង្គភាពប្រឆាំងអំពើពុករលួយនេះត្រូវតែជ្រើសរើសមកពីសង្គមស៊ីវិលដើម្បីធានាឯករាជភាព។
លោកស្រី អេលីណា នីកូល (Eleanor Nichol) ជាមន្ត្រីអង្កេតកិច្ចការកម្ពុជា របស់អង្គការ Global Witness បានមានប្រសាសន៍នៅថ្ងៃអង្គារ ទី៨ ខែមិថុនា ថា ការជ្រើសរើសសមាជិកទាំងពីររូបនេះ គឺជាសញ្ញាវិជ្ជមានក្នុងដំណើរប្រឆាំងអំពើពុករលួយ ប៉ុន្តែលោកស្រីបានសម្ដែងការព្រួយបារម្ភ ដោយសារកន្លងមកអ្នកប្រព្រឹត្តអំពើពុករលួយដែលមានលក្ខណៈធ្ងន់ធ្ងរទាក់ទិនទៅនឹងធនធានធម្មជាតិ ភាគច្រើនជាមន្ត្រីដែលមានទំនាក់ទំនងនឹងគណបក្សប្រជាជនកម្ពុជា។
លោកស្រីបន្ថែមថា ដោយសារមន្ត្រីរបស់គណបក្សប្រជាជនកម្ពុជា ត្រូវបានផ្ដល់តួនាទីដឹកនាំការប្រយុទ្ធប្រឆាំងអំពើពុករលួយ ការនាំខ្លួនមន្ត្រីពុករលួយទាំងនោះមកកាត់ទោសនឹងមានការលំបាក។
លោកស្រី អេលីណា នីកូល មានប្រសាសន៍ថា ៖ "ការស៊ើបអង្កេតក្នុងរយៈពេល ១៥ឆ្នាំ ដែលទាក់ទងទៅនឹងអំពើពុករលួយមានលក្ខណៈទ្រង់ទ្រាយធំ យើងរកឃើញថា អ្នកគ្រប់គ្រងព្រៃឈើ និងដី គឺជាអ្នកគាំទ្រ ឬអ្នកពាក់ព័ន្ធទៅនឹងគណបក្សប្រជាជនកម្ពុជា។ ដូច្នេះការនាំមន្ត្រីទាំងនោះមកកាត់ទោសនឹងមានភាពលំបាក នៅពេលមន្ត្រីអង្គភាពពុករលួយនោះ ភាគច្រើនមកពីគណបក្សប្រជាជនកម្ពុជា"។
កាលពីខែឧសភា ឆ្នាំ២០១០ រដ្ឋាភិបាលបានតែងតាំងលោក ឱម យ៉ិនទៀង ដែលជាទីប្រឹក្សាជាន់ខ្ពស់លោកនាយករដ្ឋមន្ត្រី ហ៊ុន សែន ជាប្រធានអង្គភាពប្រឆាំងអំពើពុករលួយ ដែលមានតួនាទីទប់ស្កាត់ និងបង្ក្រាបអំពើពុករលួយ។ ការតែងតាំងនេះបណ្ដាលឲ្យមានការរិះគន់យ៉ាងខ្លាំងពីសំណាក់សង្គមស៊ីវិល និងបក្សប្រឆាំង ចំពោះប្រសិទ្ធភាពការទប់ស្កាត់ និងប្រឆាំងអំពើពុករលួយ ដោយសារលោក ឱម យ៉ិនទៀង ដែលជាអតីតប្រធានគណៈកម្មការប្រឆាំងអំពើពុករលួយចាស់របស់រដ្ឋាភិបាល មិនបានអនុវត្តវិធានការប្រឆាំងអំពីពុករលួយឲ្យមានប្រសិទ្ធភាពនៅឡើយទេ៕