មន្ត្រីសិទ្ធិមនុស្សនៃអង្គការលីកាដូ ប្រចាំខែត្រកំពង់ស្ពឺ បានថ្លែងឲ្យដឹងថា កាលពីថ្ងៃទី១០ ឧសភា មន្ត្រីនៃគណៈកម្មការសិទ្ធិមនុស្សទទួលពាក្យបណ្ដឹង និងអង្កេតនៃព្រឹទ្ធសភា បានចុះទៅជួបតំណាងអង្គការសិទ្ធិមនុស្សចំនួនបី រួមមានមន្ត្រីសមាគមសិទ្ធិមនុស្សអាដហុក លីកាដូ អង្គការវីជីលែន និងតំណាងអ្នកភូមិដែលមានបញ្ហាជម្លោះដីធ្លីនៅខែត្រកំពង់ស្ពឺ។
លោក សែម ចៅសុខ ជាមន្ត្រីស៊ើបអង្កេតនៃអង្គការសិទ្ធិមនុស្សលីកាដូ បានឲ្យដឹងថា គោលបំណងដែលប្រធានគណៈកម្មការសិទ្ធិមនុស្សទទួលពាក្យបណ្ដឹង និងអង្កេតនៃព្រឹទ្ធសភា បានចុះទៅជួបមន្ត្រីសិទ្ធិមនុស្ស និងតំណាងអ្នកភូមិ ដែលមានបញ្ហាជម្លោះដីនៅស្នាក់ការសមាគមសិទ្ធិមនុស្សអាដហុក ក្នុងគោលបំណងរកដំណោះស្រាយជួនប្រជាពលរដ្ឋ ដើម្បីបញ្ចប់បញ្ហាជម្លោះដី នៅក្នុងខែត្រកំពង់ស្ពឺ។
លោក សែម ចៅសុខ មានប្រសាសន៍ថា ៖ «ជំនួបគ្នាព្រឹកមិញ ខ្ញុំឃើញថា មានផលល្អច្រើន ដោយសារគណៈកម្មការគាត់បានប្រមូលព័ត៌មានទាំងអស់ហ្នឹង គឺទៅឲ្យសម្ដេចប្រធានព្រឹទ្ធសភា ដើម្បីប្រធានព្រឹទ្ធសភាយករឿងទាំងអស់ ទៅពិភាក្សាជាមួយសមត្ថកិច្ចដែលពាក់ព័ន្ធ»។
លោក សែម ចៅសុខ បានបញ្ជាក់ទៀតថា លោកស្រី ម៉ែន ម៉ាលី ដែលជាប្រធានគណៈកម្មការសិទ្ធិមនុស្ស ទទួលពាក្យបណ្ដឹង និងអង្កេតនៃព្រឹទ្ធសភា បានសាកសួរទាក់ទងនឹងករណីជម្លោះដីអ្នកភូមិអមលាំងស្រុកថ្ពង ជាមួយក្រុមហ៊ុនរបស់លោក លី យ៉ុងផាត់ ឈ្មោះ ភ្នំពេញស៊ូហ្គើរ ករណីជម្លោះអ្នកភូមិវាលធំ ស្រុកភ្នំស្រួច ជាមួយសមាគមសង្គ្រោះជនពិការកម្ពុជា និងករណីអាជ្ញាធរខណ្ឌច្បារមន ដែលបានរុះរើផ្ទះអ្នកភូមិរស់នៅតាមដងស្ទឹង នៅក្បែរផ្សារខែត្រកំពង់ស្ពឺ។
លោក យូ ថូ ជាតំណាងប្រជាពលរដ្ឋនៅឃុំអមលាំង និងជាក្រុមប្រឹក្សាឃុំផងនោះ បានមានប្រសាសន៍ថា លោកបានរៀបរាប់ប្រាប់អំពីតួនាទីរបស់គាត់ ជាក្រុមប្រឹក្សាឃុំធ្វើការដើម្បីបម្រើប្រជាពលរដ្ឋ ការពារប្រជាពលរដ្ឋអំពីក្រុមហ៊ុន ភ្នំពេញស៊ូហ្គើរ រំលោភយកដីអ្នកភូមិ តែត្រូវបានតុលាការខែត្រ ចាប់ខ្លួនដាក់ពន្ធនាគារ កាលពីខែមិនាទៅវិញ។
លោកបន្តថា ៖ «ឯកឧត្ដម សាយ ឈុំ គាត់ប្រាប់ខ្ញុំថា ល្គឹកណាអ្នកមានអំណាច អ្នកមានលុយទៅធ្វើបាបប្រជាពលរដ្ឋ បើលោកចង់ធ្វើក្រុមប្រឹក្សាល្អ លោកត្រូវការពារផលប្រយោជន៍ឲ្យគាត់ តែបើលោកចង់ធ្វើក្រុមប្រឹក្សាពុករលួយ លោកទៅការពារជនពុករលួយទៅ អាហ្នឹងវាពុករលួយហើយ អ៊ីចឹងខ្ញុំក្ដាប់បានត្រង់ហ្នឹងហើយ។ ចុះបើក្រុមទៅឈូសដីស្រែប្រជាពលរដ្ឋមែន ទៅយកដីប្រជាពលរដ្ឋមែន ចុះហេតុអ្វីខ្ញុំការពារពួកគាត់មិនបាន?»
តំណាងអ្នកភូមិមកពីភូមិត្រែងត្រយឹង ស្រុកភ្នំស្រួច និងជានាយកសាលាវាលធំ លោក ហុយ សាមើឌី បានមានប្រសាសន៍ថា លោកបានប្រគល់ឯកសារជួនលោកស្រី ម៉ែន ម៉ាលី អស់ហើយ អំពីប្រធានសមាគមសង្គ្រោះជនពិការកម្ពុជា លោក ទួច សឿលី បានយកដីរបស់ពួកគាត់លក់ឲ្យអ្នកភូមិ ផ្សេងទៀត។
តំណាងអ្នកភូមមានប្រសាសន៍បន្ថែមថា ៖ «ហេតុអីបានជាខ្ញុំហ៊ាននិយាយអ៊ីចឹង ព្រោះផ្លាកសមាគមនេះ គឺជាខែលសម្រាប់លោក ទួច សឿលី ធ្វើអាជីវកម្មសម្រាប់ផលប្រយោជន៍ខ្លួនឯងតែប៉ុណ្ណោះ»។
ប្រធានសមាគមសង្គ្រោះជនពិការកម្ពុជា លោក ទូច សឿលី បានបញ្ជាក់ថា លោកបានយកដីពីប្រជាពលរដ្ឋវិញនោះ ដោយសារតែប្រជាពលរដ្ឋទាំងនោះ មិនគោរពតាមគោលការណ៍របស់សមាគម ៖ «ខ្ញុំសុខចិត្តទទួលខុសត្រូវចំពោះមុខច្បាប់ តែមិនស៊ុមគ្រលុំជាមួយជនខិលខួចទេ ព្រោះបញ្ហានេះធ្វើឲ្យគោលការណ៍របស់យើងនាំមកនូវបរាជ័យ»។
ប្រធានគណៈកម្មការសិទ្ធិមនុស្សទទួលពាក្យបណ្ដឹង និងអង្កេតនៃព្រឹទ្ធសភា លោកស្រី ម៉ែន ម៉ាលី មិនបានធ្វើអធិប្បាយអំពីករណីចុះសាកសួរព័ត៌មាន ទាក់ទងនឹងរឿងជម្លោះដីធ្លីនៅខែត្រកំពង់ស្ពឺទេ នៅថ្ងៃទី១១ ឧសភា ដោយបញ្ជាក់ថា លោកស្រីជាប់ប្រជុំ។
ទោះជាយ៉ាងណា មន្ត្រីអង្គការសិទ្ធិមនុស្សទាំងបី ប្រចាំខែត្រកំពង់ស្ពឺ គឺមន្ត្រីអង្គការលីកាដូ អាដហុក និងវីជីលែន បានទទូចសុំទៅលោកស្រី ម៉ែន ម៉ាលី ក៏ដូចជារដ្ឋាភិបាល សុំឲ្យដោះស្រាយបញ្ហាទំនាស់ដីធ្លីនៅខែត្រកំពង់ស្ពឺឲ្យបានឆាប់។ ពិសេស ទំនាស់ដីប្រជាពលរដ្ឋនៅឃុំអមលាំង ជាមួយក្រុមហ៊ុនភ្នំពេញស៊ូហ្គើរ ដើម្បីបញ្ចប់ជម្លោះដែលអូសបន្លាយអស់រយៈពេលជាច្រើនខែមកហើយនោះ៕