តុលាការក្រុងភ្នំពេញ នៅថ្ងៃទី១ ខែកុម្ភៈ បានកាត់ទោសជនជាប់ចោទថៃ ឈ្មោះ វីរៈ ស៊ុំក្វាមឃីត (Veera Somkwamkid) ភេទប្រុស ឲ្យជាប់គុករយៈពេល ៨ឆ្នាំ និងផាកពិន័យចំនួន ១,៨លានរៀលចូលថវិការដ្ឋ និងបានកាត់ទោសជនជាប់ចោទថៃម្នាក់ទៀតឈ្មោះ រ៉ាត់ទ្រី ប៉ៃប៉ូតាណាប៉ៃប៉ូន (Ratree Paiputanapaiboon) ភេទស្រី ឲ្យចាប់គុករយៈពេល ៦ឆ្នាំ និងផាកពិន័យចំនួន ១,២លានរៀលចូលថវិការដ្ឋ។
ការកាត់ទោសនេះ គឺតុលាការបានផ្អែកលើមាត្រាទី២៩ នៃច្បាប់អន្តោប្រវេសន៍ ក្រោមបទចូលក្នុងទឹកដីប្រទេសកម្ពុជា ខុសច្បាប់ និងផ្អែកតាមមាត្រាទី២៧ មាត្រាទី៤៧៣ មាត្រាទី៤៣៩ និងមាត្រាទី៤៤៦ នៃក្រមព្រហ្មទណ្ឌនៃប្រទេសកម្ពុជា ក្រោមបទចូលក្នុងទីលានយោធាកម្ពុជា ក្នុងបំណងទុច្ចរិត និងបទប្រមូលផ្ដុំព័ត៌មានសម្ងាត់ប៉ះពាល់ដល់សន្តិសុខជាតិកម្ពុជា។
សាលក្រមនេះត្រូវបានអានប្រកាសដោយចៅក្រមជម្រះក្ដី លោក សួស សំអាត នៅថ្ងៃទី១ ខែកុម្ភៈ ក្រោយពីបានបើកសវនាការជម្រះក្ដីរយៈពេលជាង ១០ម៉ោង ចំពោះមុខជនជាប់ចោទចំនួន ២នាក់នោះ ៖ «ពីបទលបលួចចូលក្នុងទឹកដីនៃព្រះរាជាណាចក្រកម្ពុជា ដោយគ្មានការអនុញ្ញាត។ ចូលដោយទុច្ចរិតក្នុងទីលានយោធា និងប៉ុនប៉ងប្រមូលផ្ដុំព័ត៌មានដែលអាចធ្វើឲ្យអន្តរាយដល់ការពារជាតិ»។
តុលាការក្រុងភ្នំពេញ បានបើកផ្លូវឲ្យប្ដឹងទាស់ចំពោះសាលក្រមនេះទៅតុលាការសាលាឧទ្ធរណ៍ក្នុងរយៈពេល ៣០ថ្ងៃ។
មេធាវីការពារក្ដីឲ្យអ្នកស្រី រ៉ាត់ទ្រី ប៉ៃប៉ូតាណាប៉ៃប៉ូន គឺលោក រស់ អូន បានមានប្រសាសន៍យ៉ាងខ្លីថា ៖ «ផ្លូវច្បាប់គេឲ្យប្ដឹងឧទ្ធរណ៍ គឺប្ដឹងឧទ្ធរណ៍ទៀត»។
តុលាការក្រុងភ្នំពេញ បានបង្គាប់ឲ្យអាជ្ញាធរកម្ពុជា នាំខ្លួនអ្នកស្រី រ៉ាត់ទ្រី ប៉ៃប៉ូតាណាប៉ៃប៉ូន ទៅឃុំខ្លួននៅក្នុងគុកព្រៃសវិញ ក្រោយពីតុលាការសាលាឧទ្ធរណ៍បានសម្រេចកាលពីថ្ងៃទី១៨ ខែមករា ឆ្នាំ២០១១ ឲ្យនៅក្រៅឃុំបណ្ដោះអាសន្ន។
នៅក្នុងសវនាការរយៈពេលជាង ១០ម៉ោងនោះ តុលាការក្រុងភ្នំពេញ បានសាកសួរសាក្សីចំនួន ៧នាក់ គឺ ៥នាក់ជាមន្ត្រីយោធាកម្ពុជា មន្ត្រីសន្តិសុខនៃក្រសួងមហាផ្ទៃ មន្ត្រីជំនាញការផែនទី មន្ត្រីនាយកដ្ឋានអន្តោប្រវេសន៍ និងមន្ត្រីក្រសួងការពារជាតិកម្ពុជា។ តុលាការបានសាកសួរសាក្សីថៃចំនួន ២នាក់ទៀត។
តុលាការបានបង្ហាញឯកសារ និងវត្ថុតាងមានដូចជាវីដេអូ ម៉ាស៊ីនថតរូបភាពសម្ងាត់ បញ្ចាំងរូបភាពវីដេអូ និងភូមិសាស្ត្រផែនទីបារាំង-សៀម ឆ្នាំ១៩០៧។
ជនជាតិថៃចំនួន ៧នាក់ បានចូលមកក្នុងទឹកដីប្រទេសកម្ពុជា ត្រូវបានយោធាកម្ពុជា បានចាប់ខ្លួនកាលពីថ្ងៃទី២៩ ខែធ្នូ ឆ្នាំ២០១០ កន្លងទៅ នៅក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ជនជាប់ចោទចំនួន ២នាក់ចុងក្រោយ បានបដិសេធនៅក្នុងសវនាការថា ទឹកដីនោះជារបស់ថៃ ហើយគេបានចូលមកតាមសំណើរបស់ប្រជាជនថៃ ដើម្បីមកពិនិត្យបង្គោលព្រំដែនលេខ៤៦ ដោយបានបង្ហាញឯកសារផែនទីចម្លងចេញពីគេហទំព័រឈ្មោះ Google ដើម្បីជាការអះអាង។
ចៅក្រម និងព្រះរាជអាជ្ញានៃតុលាការក្រុងភ្នំពេញ បានបដិសេធថា ផែនទីនោះមិនបានទទួលស្គាល់ក្នុងសន្ធិសញ្ញាបារាំង-សៀម ឆ្នាំ១៩០៧ទេ៕