ឯកសារទាំងនោះបានត្រូវគេរៀបជាបញ្ជីរាយឈ្មោះតាមលំដាប់លំដោយក្រោយពេលបានត្រូវដឹកចេញពីក្រុងប៉េកាំងប្រទេសចិនកាលពី២ឆ្នាំកន្លងមកហើយ។
កាសែតភ្នំពេញប៉ុស្តិ៍បានស្រង់ប្រសាសន៍ លោក OLIVIER DE BERNON នាយកសិក្សាបារាំងនៅសាលាចុងបូព៌ាថា ព្រះបាទ នរោត្តម សីហនុ គឺជាប្រមុខរដ្ឋបរទេសទី១ ដែលប្រគល់ឯកសាររបស់ព្រះអង្គដល់ប្រទេសបារាំង។
ព្រះរាជឯកសារដែលមានចំនួន ៥០ប្រអប់ ក្នុងនោះមានបណ្ណសារស្តីពីយុគសម័យក្រោយពេលរដ្ឋប្រហារទម្លាក់ព្រះអង្គពីប្រមុខរាជរដ្ឋាភិបាល នាខែមីនា ឆ្នាំ១៩៧០។
នៅក្នុងប្រអប់ទាំងនោះដែរ គេមិនបានឃើញឯកសារស្តីពីសម័យព្រះអង្គនៅជាកុមារភាព ឬរជ្ជកាលនៃការឡើងគ្រងរាជសម្បត្តិរបស់ព្រះអង្គនោះទេ ពីព្រោះថា ឯកសារទាំងនោះត្រូវបំផ្លាញនាសម័យសង្គ្រាមក្នុងអំឡុងឆ្នាំ១៩៧០។
លោក BERNON មានប្រសាសន៍ថា តាមការប៉ាន់ប្រមាណឯកសារដែលមានប្រភេទខុសគ្នា មានចំនួន ១លានឯកសារ គឺមានព្រះសារលិខិតរាប់ពាន់ចំណារ ព្រមទាំងរូបថតចំនួន ១០ពាន់សន្លឹក ដែលនឹងរក្សាទុកនៅក្នុងសណ្ឋាគារSoubise នៅក្នុងទីក្រុងប៉ារីស ដែលជាវិទ្យាស្ថានមួយនៃបណ្ណសារដ្ឋានជាតិបារាំង។
បន្ថែមពីលើនោះទៀត នៅក្នុងចំណោមបញ្ជីបណ្ណសារទាំងនោះក៏មានសារលិខិតនានាដែលមានហត្ថលេខារបស់អតីតនាយករដ្ឋមន្ត្រីចិន លោក ជូ អេនឡាយ លោក Andre Malraux លោក Yasser Arafat ប្រធានចលនាតស៊ូប៉ាឡេស្ទីន លោក Nelson Mandela អ្នកតស៊ូប្រឆាំងការប្រកាន់ពូជសាសន៍អាហ្វ្រិកខាងត្បូង និងអតីតប្រធានាធិបតីសហរដ្ឋអាមេរិក លោក Ronald Reagan ផងដែរ។
សូមជម្រាបថា ឯកសារទាំងអស់នេះមិនដែលធ្លាប់បានតម្កល់ទុកនៅប្រទេសកម្ពុជាឡើយ។ ឯកសារទាំងនោះត្រូវគេដឹកចេញពីព្រះរាជនិវេសនដ្ឋានរបស់ព្រះអង្គពីក្រុងប៉េកាំងផ្ទាល់តែម្តង៕