លោក ស ចំរុង អភិបាលរងខេត្តបន្ទាយមានជ័យ បានមានប្រសាសន៍ពីម្តុំច្រកប៉ោយប៉ែត កាលពីជិតអធ្រាត្រថ្ងៃសៅរ៍ថា សភាពការណ៍នៅធម្មតាទេ។
លោក ស ចំរុង បានបញ្ជាក់ថា ៖ «នៅតាមបណ្ដោយព្រំដែនកម្ពុជាថៃ ជាពិសេសនៅខេត្តបន្ទាយមានជ័យយើង គឺថាសភាពការណ៍តាមព្រំដែននៅធម្មតា។ ប្រជាពលរដ្ឋចេញចូល ឆ្លងដែនអីធម្មតា ហើយទំនាក់ទំនងរវាងសមត្ថកិច្ចអាជ្ញាធរមូលដ្ឋានកម្ពុជាយើងជាមួយថៃហ្នឹង បានជជែកគ្នាថា រឿងនយោបាយទុកឲ្យថ្នាក់លើដោះទៅ រឿងយើងនៅព្រំដែន រក្សាមិត្តភាព សុវត្ថិភាព កុំឲ្យមានការប៉ះពាល់គ្នា។ និយាយរួមសភាពការណ៍នៅតាមព្រំដែនល្អ ហើយនៅជាធម្មតា ដោយសារប្រជាពលរដ្ឋនៅព្រំដែនគាត់ធ្លាប់នឹងសភាពការណ៍អ៊ីចឹង អ៊ីចឹងគាត់អត់ភ្ញាក់ផ្អើលអីទេ ហើយទំនាក់ទំនងក៏នៅធម្មតា ការចេញចូលរកស៊ី ដឹកជញ្ជូនអីវ៉ាន់អីធម្មតា»។
ឃឹម សារ៉ង ៖ តើលោកមានជ្រាបទេថា សភាពការណ៍ប្រជាជនថៃទៅវិញដែលនៅជាប់ទល់ដែនហ្នឹងគេយ៉ាងម៉េចដែរ?
ស ចំរុង ៖ សភាពការណ៍ប្រជាជននៅទល់ដែនគាត់អត់ចង់មានជម្លោះមានអីដែរ ព្រោះប្រជាជនថៃហ្នឹងដូចជាចែកជាពីរក្រុមហើយ មួយអាវលឿងគាំទ្ររដ្ឋាភិបាល មួយអាវក្រហមគាំទ្រថាក់ស៊ីន ហើយយើងប៉ាន់ស្មានទៅប្រជាពលរដ្ឋច្រើនណាស់ដែលគាត់គាំទ្រថាក់ស៊ីន ហើយអ៊ីចឹងគាត់អត់ភ្ញាក់ផ្អើលនឹងសភាពការណ៍អ៊ីចឹងទេ។ គាត់មានតែបន្ទោលរដ្ឋាភិបាលថៃគាត់ រឿងបន្តិចបន្តួចធ្វើឲ្យទៅជារឿងធំអីអ៊ីចឹងណា៎! អាហ្នឹងតាមព័ត៌មានអ្នកជាយដែនថៃដែលយើងស្គាល់។
ថៃមិនទាន់មានគម្រោងការបិទច្រកព្រំដែនជាមួយកម្ពុជា
ប្រទេសថៃឲ្យដឹងពីថ្ងៃសៅរ៍ ទី៧ វិច្ឆិកា ថា ថៃមិនទាន់មានផែនការបិទព្រំដែនខ្លួនជាមួយកម្ពុជានោះនៅឡើយទេ ថ្វីបើមានទំនាស់ផ្នែកការទូតក្តី ក៏ប៉ុន្តែថៃនឹងស្វែងរកការធ្វើបត្យាប័នអតីតនាយករដ្ឋមន្ត្រីថៃ លោក ថាក់ស៊ីន ឈីនណាវ៉ាត្រ ប្រសិនបើលោក ថាក់ស៊ីន ទៅស្រុកខ្មែរដើម្បីធ្វើជាទីប្រឹក្សានៃរដ្ឋាភិបាលនោះ។
លោកនាយករដ្ឋមន្ត្រី អាភីស៊ិត វេតឆាឈីវ៉ាក់ មានប្រសាសន៍ប្រាប់ទីភ្នាក់ងារព័ត៌មាន រ៉យទ័រ (Reuters) ដែរថា លោកមិនទទួលយកទស្សនៈដែលថា ករណីលោក ថាក់ស៊ីន ជាបញ្ហានយោបាយនោះឡើយ ហើយនោះគឺជាការអនុវត្តដោយត្រង់ៗចំៗនូវច្បាប់របស់ថៃ។
ប្រធានសមាគមអាស៊ានជំរុញឲ្យកម្ពុជានិងថៃខិតខំប្រឹងប្រែងទប់ស្ថានការណ៍
នៅចំពោះមុខទំនាស់រវាងកម្ពុជានិងថៃនេះ ប្រធានរបស់សមាគមអាស៊ានបានជំរុញឲ្យប្រទេសថៃនិងកម្ពុជាខំទប់ឲ្យបានជាអតិបរិមានៅចំពោះមុខភាពតានតឹងដែលកើតមានឡើងក្នុងបញ្ហាដែលរដ្ឋាភិបាលក្រុងភ្នំពេញផ្តល់តំណែងដល់អតីតនាយករដ្ឋមន្ត្រីថៃដែលកំពុងគេចខ្លួននោះ។
លោក ស៉ូរិន ពិតស៊ូវ៉ាន់ (Surin Pitsuvan) អគ្គលេខាធិការរបស់សមាគមអាស៊ានមានប្រសាសន៍ពីថ្ងៃសៅរ៍ថា សមាគមអាស៊ានដែលមានសមាជិក១០ប្រទេសមិនត្រូវបង្ហាញឲ្យឃើញថា មានទំនាស់បែកបាក់គ្នាឡើយនៅមុនកិច្ចប្រជុំជាប្រវត្តិសាស្ត្រក្នុងខែវិច្ឆិកានេះ រវាងប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) ជាមួយនឹងមេដឹកនាំនៅតំបន់នោះ៕