មន្ត្រីទំនាក់ទំនងការងារព្រំដែនថៃកម្ពុជាប្រចាំខេត្តស៊ីសាកេតមួយរូបដែលសុំមិនបញ្ចេញឈ្មោះបានមានប្រសាសន៍តាមទូរស័ព្ទឲ្យដឹងកាលពីព្រឹកថ្ងៃអាទិត្យ ទី១២ ខែមេសា ថា ភាគីថៃបានស្នើសុំទៅភាគីកម្ពុជាកាលពីពេលថ្មីៗដើម្បីឲ្យមានធ្វើពិធីរាំកម្សាន្តសប្បាយរវាងទាហានខ្មែរនិងថៃរួមគ្នានៅក្នុងទីវត្តកែវសិក្ខាគិរីស្វៈរៈ ជិតប្រាសាទព្រះវិហារ ក៏ប៉ុន្តែភាគីខ្មែរមិនទាន់បានឆ្លើយតបនិងកំណត់ពេលវេលាណាមួយនៅឡើយទេ។
មន្ត្រីដដែលបានឲ្យដឹងថា ៖ "យើងធ្លាប់បានអញ្ជើញភាគីខ្មែរដើម្បីធ្វើពិធីរាំកម្សាន្តរួមគ្នានៅថ្ងៃទី១២ ខែមេសា ក្នុងបរិវេណវត្តកែវសិក្ខាគិរីស្វៈរៈ ក៏ប៉ុន្តែភាគីខ្មែរបានប្រាប់ទៅភាគីថៃវិញថា មិនទាន់បានកំណត់ពេលវេលាច្បាស់លាស់ណាមួយដើម្បីប្រារព្ធធ្វើពិធីនេះនៅឡើយទេ"។
ទោះយ៉ាងណាកាលពីរសៀលថ្ងៃអាទិត្យ មេបញ្ជាការកងយោធពលខេមរភូមិន្ទនៃកងពលធំលេខ៣ដែលគ្រប់គ្រងកម្លាំងយោធាខ្មែររួមនៅតំបន់នោះ លោកឧត្តមសេនីយ៍ទោ ស្រី ឌឹក បានមានប្រសាសន៍ថា លោកពុំបានដឹងពីការស្នើសុំរបស់មន្ត្រីយោធាថៃដែលមានបំណងធ្វើឲ្យមានពិធីរាំកម្សាន្តរួមគ្នារវាងទាហានខ្មែរថៃក្នុងថ្ងៃចូលឆ្នាំថ្មីនោះទេ។
លោកឧត្តមសេនីយ៍ទោ ស្រី ឌឹក បានបញ្ជាក់ថា ៖ «អត់ដឹងផង គ្នាមកដល់ភ្នំពេញហើយ មកចូលឆ្នាំនៅភ្នំពេញ»។
តាមកងយោធាខ្មែរបានឲ្យដឹងថា ការប្រឈមមុខដាក់គ្នាដែលធ្លាប់តានតឹងដោយអាវុធរវាងទាហានខ្មែរនិងថៃនៅតំបន់វាលឥន្ទ្រីនិងភ្នំទ្រព្យរយៈពេលបីថ្ងៃមកនេះបានស្ងប់ស្ងាត់ ក៏ប៉ុន្តែទោះយ៉ាងណាកងទាហានទាំងអស់មិនត្រូវបានអនុញ្ញាតឲ្យចេញដើរចោលកន្លែងដែលត្រៀមប្រយុទ្ធទាំងនោះទេ។
មន្ត្រីប៉ូលិសវរការពារព្រំដែន៧៩៥មួយរូបដែលកំពុងប្រចាំការក្នុងខ្សែត្រៀមជួរមុខជិតប្រាសាទព្រះវិហារបានមានប្រសាសន៍ថា មុនថ្ងៃបុណ្យចូលឆ្នាំនេះការប្រឈមមុខដាក់គ្នារវាងទាហានខ្មែរថៃនៅតាមតំបន់ជម្លោះជិតប្រាសាទព្រះវិហារបានធូរស្រាលបន្តិច ក៏ប៉ុន្តែទោះយ៉ាងណាកងការពារព្រំដែនខ្មែរទាំងអស់មិនត្រូវបានអនុញ្ញាតច្បាប់ឲ្យដើរលេងកម្សាន្តចោលខ្សែត្រៀមទេ។
មន្ត្រីប៉ូលិសដដែលបានឲ្យដឹងថា ៖ «លក្ខណៈត្រៀមប្រយុទ្ធ កន្លែងណាដឹងថាប្រជាជនសប្បាយ យើងបង្កលក្ខណៈប្រុងប្រយ័ត្ន។ មុនពេលចូលឆ្នាំនេះឮថា វាអាចធូរស្រាលមួយចំនួនដែរ»។
តាមកងរក្សាព្រំដែនខ្មែរនៅតាមចំណុចព្រំដែនខ្មែរថៃជាច្រើនកន្លែងចាប់ពីច្រកជាំសាង៉ាំ អូរស្មាច់ ប្រាសាទតាមាន់ ប្រាសាទតាក្របី ច្រកជប់គគីរ ខេត្តឧត្តរមានជ័យ រហូតដល់តំបន់ព្រំដែននៃភូមិរំដួលចំណុច៨៨ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ គឺថាកងទាហានព្រំដែនខ្មែរទាំងអស់មិនអនុញ្ញាតឲ្យដើរលេងបុណ្យចូលឆ្នាំខ្មែរចោលខ្សែត្រៀមនៃបន្ទាត់ព្រំដែនទេ៕