សំ បូរិន្ទ ៖ ឯកឧត្ដមរដ្ឋលេខាធិការ ខ្ញុំបាទសូមអញ្ជើញឯកឧត្ដមមានប្រសាសន៍ថា តើមកដល់ព្រឹកថ្ងៃសុក្រនេះហើយ ព្រឹត្តិការណ៍ជាពិសេសតំបន់ព្រះវិហារហ្នឹងយ៉ាងម៉េចហើយ?
ផៃ ស៊ីផាន ៖ ពីថ្ងៃព្រហស្បតិ៍យើងដឹងទាំងអស់គ្នាហើយរឿងហ្នឹងកើតជាថ្មីម្ដងទៀត ថាមានកងទ័ពថៃចំនួន៣០នាក់ចូលមកក្នុងតំបន់វាលឥន្រ្ទី គឺចូលមកនៅម៉ោង៩:១៥នាទី ហើយបន្ទាប់មកកងយោធពលខេមរភូមិន្ទបានបណ្ដេញចេញទៅវិញគឺនៅម៉ោង១០។ បានសេចក្ដីថា ការជជែកគ្នាសម្រាប់បញ្ជាការចលនាទ័ពសាជាថ្មីម្ដងទៀតបន្ទាប់ពីម្សិលម៉្ងៃហ្នឹងដែលទ័ពថៃបានចូលមកចំនួនជិត១០០នាក់ ចូលមកក្នុងដីកម្ពុជាជម្រៅ៩០០ម៉ែត្រ ដែលជាតំបន់ដែលបានប៉ះទង្គិចអាវុធគ្នាកាលពីថ្ងៃទី១៥ តុលា ២០០៨កន្លងមក។
នេះជាលើកទី៣ហើយដែលកងទ័ពថៃចល័តកងទ័ពមកតំបន់នោះ ហើយជាតំបន់យុទ្ធសាស្រ្ដមួយ តំបន់ភ្នំទ្រព្យ ទិសខាងជើងឆៀងខាងលិចនៃប្រាសាទព្រះវិហារមណ្ឌលបេតិកភណ្ឌពិភពលោក។
សំ បូរិន្ទ ៖ បើតាមប្រសាសន៍ឯកឧត្ដមអម្បាញ់មិញគឺការជ្រៀតចូលរបស់កងយោធាថៃមកកន្លែងដដែលហ្នឹងលើកទី៣ហើយ។ តើជាចេតនារបៀបម៉េចរបស់ខាងមួយចំហៀងទៀតហ្នឹង?
ផៃ ស៊ីផាន ៖ កាលពីថ្ងៃម្សិលមិញ ថ្ងៃព្រហស្បតិ៍ហ្នឹងគេនិយាយថា ទី១ មេបញ្ជាការនៅនឹងកន្លែង គេបានប្រាប់សារព័ត៌មានអន្តរជាតិហ្នឹងថា គ្មានទ័ពចល័តនៅតំបន់នោះទេ បើសិនជាមានក៏គេសុំការអនុញ្ញាតពីកម្ពុជាដែរ។ បន្ទាប់មកទៀតការឆ្លើយតបរបស់គេចំពោះអ្នកសារព័ត៌មានដដែលហ្នឹង គេនិយាយថា កងទ័ពគេកំពុងតែស្រាវជ្រាវរកប្រភពទឹកពីព្រោះឥឡូវនេះខ្វះទឹកផឹក ប៉ុន្តែទោះជាយ៉ាងណាក៏ដោយកាលពីម្សិលមិញឃើញថា ៣០នាក់មកទៀតដែលមានឯកសណ្ឋានជាប៉ារ៉ា ដូច្នេះមេបញ្ជាការព្រំដែនរបស់ថៃនិយាយហ្នឹងមិនសមស្របទេ។
សំ បូរិន្ទ ៖ ទាក់ទងនឹងតំបន់វាលឥន្រ្ទី ខ្ញុំបាទធ្លាប់ឮមេដឹកនាំរដ្ឋាភិបាល លោកមានប្រសាសន៍ថា បើគ្រាន់តែស្ទាបជើង ស្ទាបចង្កេះ ស្ទាបខ្លួនអីហ្នឹងមិនជាស្អីទេ ប៉ុន្តែឥឡូវមកស្ទាបដល់ក ស្ទាបដល់ក្បាល ដែលជាការមិនអាចអត់ធ្មត់បានតទៅទៀត នៅថ្ងៃទី១៥ ខែតុលា ឆ្នាំ២០០៨ ហើយលើកទី២ លើកទី៣ហ្នឹងទៅជាអត់ធ្មត់បាន។ តើឯកឧត្ដមអាចជម្រាបអ្នកស្ដាប់យើងអំពីការអត់ធ្មត់នោះ?
ផៃ ស៊ីផាន ៖ ជម្រាបថាដំណោះស្រាយរបស់យើង យើងយកតាមរយៈការងារទូត។ បន្ទាប់ការងារផ្ទុះឡើងហ្នឹង ខ្ញុំបានទទួលទូរស័ព្ទពីសំណាក់ទូតបស្ចិមប្រទេសមួយចំនួនដែលសុំកោតសរសើរសណ្ដាប់ធ្នាប់កងយោធពលខេមរភូមិន្ទតាមបញ្ជារបស់សម្ដេចតេជោ។ ជម្រាបហើយថា កម្ពុជាមិនអង្គុយរហូតដល់គេជាន់ជើងជាន់ដៃនោះទេ។
សំ បូរិន្ទ ៖ ក៏ប៉ុន្តែនៅក្នុងឱកាសនេះ តើរដ្ឋាភិបាលកម្ពុជាត្រូវធ្វើយ៉ាងម៉េចក្នុងរឿងហ្នឹង?
ផៃ ស៊ីផាន ៖ ខ្ញុំជឿថានឹងមានកំណត់ការទូតព្រមានសាជាថ្មី យើងនៅតែបន្តការជជែកគ្នា ជាពិសេសនៅតំបន់ហ្នឹង ក្នុងការងារព្រំដែនខណ្ឌសីមាហ្នឹង គឺគេនឹងចាប់ផ្ដើមថ្ងៃទី៦ ថ្ងៃទី៧ នៃខែមេសាខាងមុខនេះ។ យើងចង់បង្ហាញសុឆន្ទៈសាជាថ្មីម្ដងទៀត យើងនៅតែចង់និយាយគ្នាដោះស្រាយតាមអ្វីដែលហៅថាប្រជាជាតិមានអរិយធម៌ទំនើប។
មន្ត្រីថៃ៖ ការចល័តទ័ពចុះឡើងមិនមែនជាការគំរាមចង់បង្ករឿងទេ
តាមទីភា្នក់ងារព័ត៌មាន Reuters នៅថ្ងៃ២៦ មីនា មន្រ្តីថៃថ្លែងថា ការធ្វើចលនាទ័ពចុះឡើងមិនមែនជាការគំរាមចង់បង្ករឿងអ្វីនោះទេ តែវាជាការប្តូរវេនកម្លាំងទ័ពធម្មតាប៉ុណ្ណោះនៅតាមព្រំដែន។
កាសែតថៃឈ្មោះ The Nation ផ្សាយថ្ងៃព្រហស្បតិ៍ ដោយរំឭកពលរដ្ឋថៃ ជាពិសេសក្រុមអ្នកជាតិនិយមពាក់អាវលឿងថា ការយករឿងព្រំដែនមានរឿងប្រាសាទព្រះវិហារជាដើមធ្វើជានយោបាយសម្រាប់ប្រយោជន៍បក្សរបស់ខ្លួនគឺជារឿងនាំទៅរកវិនាសកម្ម។
មន្រ្តីខ្មែរនិងថៃគ្រោងជួបពិភាក្សាគ្នាពីបញ្ហាព្រំដែននៅខែមេសាខាងមុខនេះ
ក្នុងរឿងមិនទាន់ចុះសម្រុងគ្នាលើបញ្ហាព្រំប្រទល់ដែនរវាងកម្ពុជានិងថៃ មន្រ្តីរដ្ឋាភិបាលខ្មែរនិងមន្រ្តីរដ្ឋាភិបាលថៃគ្រោងជួបពិភាក្សាគ្នានៅសប្តាហ៍ទីមួយ ខែមេសាខាងមុខនេះ ពីថ្ងៃ៥ដល់ថ្ងៃ៧ ដើម្បីជជែករឿងបោះបង្គោលខណ្ឌសីមា។
តាមកាសែតភ្នំពេញប៉ុស្តិ៍នៅថ្ងៃ២៦ មីនា ថា វិវាទរឿងព្រំប្រទល់ដែនសមុទ្រនឹងមិនលើកយកទៅចរចាគ្នាទេ។ ប្រទេសទាំងពីរទាមទារសិទ្ធិគ្រប់គ្រងលើផ្ទៃដីបាតសមុទ្រទំហំ២៧.០០០គីឡូម៉ែត្រក្រឡាដែលភាគីទាំងពីរគិតថា សំបូរទៅដោយប្រេងកាតនិងឧស្ម័នធម្មជាតិ៕