គ្រួសារប្រជាពលរដ្ឋចំនួន៨៣គ្រួសារនៅក្នុងភូមិស្ពានឆេះ សង្កាត់លេខ៤ ក្រុងមិត្តភាព ខេត្តព្រះសីហនុ ដែលរងការរឹបអូសយកដីធ្លីតាំងពីឆ្នាំ២០០៧មកនោះ បានទទូចសុំឲ្យអាជ្ញាធរខេត្តនិងរដ្ឋាភិបាលកម្ពុជា ជួយផ្តល់ទីជម្រកឲ្យពួកគាត់ឲ្យបានឆាប់តាមតែអាចធ្វើទៅបាននៅពេលខាងមុខនេះ ដោយសារគ្រួសារទាំងនោះកំពុងតែរស់នៅក្នុងស្ថានការណ៍លំបាកប្រចាំថៃ្ង គ្មានទឹកស្អាតប្រើប្រាស់ គ្មានសាសារៀននិងគ្មានភ្លើងអគ្គិសនីប្រើប្រាស់។
ប្រជាពលរដ្ឋឈ្មោះ ស៊ុត ឌីម អាយុ៤៩ឆ្នាំ នៅក្នុងចំណោមគ្រួសារគ្មានទីជម្រក៨៣គ្រួសារនោះ បានថែ្លងប្រាប់វិទ្យុអាស៊ីសេរី នៅក្នុងខ្ទមរបស់គាត់នៅក្បែរឆ្នេរសមុទ្ទថា អាជ្ញាធរខេត្តព្រះសីហនុបានសន្យាថា នឹងរកដីធ្លីនិងទីជម្រកឲ្យ ប៉ុន្តែគ្មានដំណោះស្រាយទេរយៈពេលជាង៣ឆ្នាំមកនេះ។
អ្នកស្រី ស៊ុត ឌីម បានឲ្យដឹងថា ៖ «ឈឺក៏ឈឺ ណាមួយបើខែវស្សាភ្លៀងមកប៉ើងតង់ យប់ឡើងម៉ែកូនហ្នឹងអត់បានដេកទេ។ ឥឡូវអន់ភ្លៀងមកក្ដៅ។ ក្ដៅមិនដឹងជ្រកកន្លែងទេ ណាហុយទៀត ទឹកក៏គ្មានហូប។ សំណូមពរគេដែរ ប៉ុន្តែទៅម្ដងណាក៏គេថា មីងឯងកុំព្រួយគង់តែដោះស្រាយឲ្យទេ ហើយកុំបាច់ជឿអ្នកណាអ្នកណីអី គេកំពុងតែដោះស្រាយឲ្យហើយ ទៅម្ដងណាក៏គេថាអ៊ីចឹងដែរ ប៉ុន្តែគេអត់កំណង់ថាខែឆ្នាំណាទេ»។
គ្រួសារប្រជាពលរដ្ឋម្នាក់ទៀតឈ្មោះ ឯក វិធាន អាយុ៣៩ឆ្នាំ បានថែ្លងថា មានប្រជាពលរដ្ឋចំនួន៣នាក់ហើយបានស្លាប់តាំងពីឆ្នាំ២០០៧មក ដោយសារតែគ្មានថ្នាំព្យាបាលនិងការឈឺថ្កាត់ ដោយសារតែគ្មានអនាម័យនិងអាហារហូបគ្រប់គ្រាន់។
លោក ឯក វិធាន មានប្រសាសន៍ដូច្នេះ ៖ «ខ្ញុំបានរំឭកទៅគេហើយអំពីផលវិបាករបស់ប្រជាជន ក៏ដូចជារូបខ្ញុំជាតំណាង។ ...គេថា គេកំពុងតែដោះស្រាយជួយ ប៉ុន្តែគេអត់បានកំណត់ថាថ្ងៃណាឆ្នាំណាទេ គេនិយាយដដែលៗអ៊ីចឹង»។
វិទ្យុអាស៊ីសេរីនៅមិនទាន់បានទទួលការបំភ្លឺនៅទ្បើយទេ អំពីការដោះស្រាយដីធ្លីនិងទីជម្រកដល់គ្រួសារប្រជាពលរដ្ឋចំនួន៨៣គ្រួសារនោះ ដោយលោក មាស វុទ្ធី ជាអភិបាលរងខេត្តព្រះសីហនុ បានមានប្រសាសន៍ថា ៖ «ខ្ញុំសូមទោស! ខ្ញុំអត់មានទទួលខាងហ្នឹងទេ ខ្ញុំទទួលផ្នែកផ្សេង»។
លោកស្រី ជៀប សុធារី ជាមន្រ្តីសម្របសម្រួលនៃអង្គការការពារសិទ្ធិមនុស្សក្រៅរដ្ឋាភិបាលដែលបានតាមដានសំណុំរឿងនេះកន្លងមក បានមានប្រសាសន៍ថា ៖ «ខ្ញុំសំណូមពរឲ្យខេត្តថា បើសិនជាខេត្តមានគម្រោងថានឹងផ្ដល់ដីសម្បទានសង្គមកិច្ចដែលបានទៅសន្យាប្រាប់ប្រជាពលរដ្ឋជាញឹកញាប់ហ្នឹង សូមមេត្តាទៅអនុវត្តគម្រោងហ្នឹងឲ្យបានឆាប់រហ័ស ព្រោះប្រជាពលរដ្ឋបើសិនជាឲ្យគាត់រស់នៅក្នុងតំបន់ហ្នឹងតទៅទៀត គាត់នឹងមានគ្រោះថ្នាក់ដោយសារបញ្ហាជីវភាព»។
តាមការទៅសង្កេតដោយផ្ទាល់ គ្រួសារប្រជាពលរដ្ឋទាំងនោះកំពុងតែរស់នៅក្នុងខ្ទមតូចៗ គ្មានទឹកស្អាតប្រើប្រាស់ គ្មានសាលារៀន គ្មានអគ្គិសនីប្រើប្រាស់និងគ្មានអនាម័យ។
គ្រួសារប្រជាពលរដ្ឋចំនួន៨៣គ្រួសារនោះ គឺនៅក្នុងចំណោមគ្រួសារសរុប១០៧គ្រួសារ ដែលរងការរឹបអូសយកដីធ្លីកាលពីថៃ្ងទី២០ ខែមេសា ឆ្នាំ២០០៧ កន្លងទៅ បានរងការបង្រ្កាបដោយហិង្សា ដើម្បីរឹបយកដីចំនួន១៥ហិកតារនៅទីនោះ។ ប្រជាពលរដ្ឋចំនួន១៣នាក់ បានរងការចាប់ខ្លួនដាក់គុកនៅក្នុងព្រឹតិ្តការណ៍បង្រ្កាបដោយហិង្សានោះ៕