មន្ត្រី​ស.រ.អា.៖ មូរ សុខហួរ ជួប ហ៊ិលឡារី គ្លិនតុន ជា​ផ្លូវការ

មន្ត្រី​ម្នាក់​នៃ​ក្រសួង​ការបរទេស​សហរដ្ឋ​អាមេរិក (ស.រ.អា.) បាន​បញ្ជាក់​ប្រាប់​វិទ្យុ​អាស៊ីសេរី​ថា ជំនួប​រវាង​លោកស្រី មូរ សុខហួរ តំណាង​រាស្ត្រ​បក្ស​សមរង្ស៊ី ជាមួយ​លោកស្រី ហ៊ិលឡារី គ្លីនតុន រដ្ឋមន្រ្តី​ការបរទេស​ស.រ.អា. គឺ​ជា​ជំនួប​ផ្លូវការ។

លោក អ៊ុច បូររិទ្ធ រដ្ឋលេខាធិការ​ក្រសួង​ការបរទេស​និង​សហប្រតិបត្តិការ​អន្តរជាតិ​នៃ​ព្រះរាជាណាចក្រ​កម្ពុជា បាន​ថ្លែង​ថា ការ​ជួប​គ្នា​រវាង​លោកស្រី មូរ សុខហួរ ជាមួយ​លោកស្រី ហ៊ិលឡារី គ្លិនតុន រដ្ឋ​មន្រ្តី​ការបរទេស​អាមេរិក​នៅ​រដ្ឋធានី​វ៉ាស៊ីនតោន​នោះ​គឺ​មិន​មែន​ជា​ផ្លូវការ​នោះ​ទេ។

នៅ​ក្នុង​សន្និសីទ​កាសែត​មួយ​នា​ល្ងាច​ថ្ងៃ​ទី​១៦ ខែ​កញ្ញា ឆ្នាំ​២០០៩ លោក​រដ្ឋលេខាធិការ អ៊ុច បូររិទ្ធ ដែល​បាន​មាន​ប្រសាសន៍​អះអាង​ថា យោង​តាម​ការ​បញ្ជាក់​របស់​លោកស្រី​អគ្គរដ្ឋទូត​សហរដ្ឋ​អាមេរិក បាន​ឲ្យ​ដឹង​ដូច្នេះ ៖ «លោកស្រី​ឯកអគ្គរដ្ឋទូត​បាន​បញ្ជាក់​យ៉ាង​ច្បាស់​ថា ជា​ការ​ពិត​មែន​ដែល​លោក​ជំទាវ ហ៊ិលឡារី គ្លិនតុន បាន​ជួប​ជាមួយ​នឹង​លោកស្រី មូរ សុខហួរ ក៏​ប៉ុន្តែ​ជំនួប​នេះ​គឺ​ជួប​នៅ​តាម គេ​ហៅ​ថា មិន​មែន​នៅ​ក្នុង​ការិយាល័យ​របស់​លោកស្រី​ទេ ជួប​នៅ​តាម​ផ្លូវ​ដើរ មុខ​ការិយាល័យ នៅ​ខាង​ក្រៅ​ការិយាល័យ របៀប​ដើរ​ទៅ​ជួប​គ្នា​ចាប់​ដៃ គ្មាន​ការ​ព្រៀង​ទុក​ទេ ហើយ​ក៏​មិន​មែន​ជា​ការ​ជួប​គ្នា​ជា​ទ្វេ​ភាគី​អ្វី​នោះ​ដែរ»

ទោះ​ជា​យ៉ាង​ណា​ក៏​ដោយ មន្ត្រី​មួយ​រូប​នៃ​ក្រសួង​ការបរទេស​សហរដ្ឋ​អាមេរិក​បាន​បញ្ជាក់​ប្រាប់​វិទ្យុ​អាស៊ីសេរី​កាល​ពី​ថ្ងៃ​ម្សិលមិញ​ថា ជំនួប​រវាង​លោកស្រី មូរ សុខហួរ អ្នក​តំណាង​រាស្ត្រ​ពី​គណបក្ស​សមរង្ស៊ី ជាមួយ​លោកស្រី ហ៊ិលឡារី គ្លីនតុន រដ្ឋមន្រ្តី​ការបរទេស​អាមេរិក​នៅ​រដ្ឋធានី​វ៉ាស៊ីនតោន​នោះ​គឺ​ជា​ជំនួប​ផ្លូវការ ពីព្រោះ​ឈ្មោះ​របស់​លោកស្រី មូរ សុខហួរ មាន​ចុះ​នៅ​ក្នុង​សៀវភៅ​បញ្ជី​ឈ្មោះ​ភ្ញៀវ​ផ្លូវការ​របស់​ក្រសួង​ការបរទេស​សហរដ្ឋ​អាមេរិក៕