សេចក្ដីជូនដំណឹងរបស់អគ្គនាយកដ្ឋានរតនាគារជាតិ ចេញផ្សាយថ្ងៃទី១៧ ខែមិថុនា ឆ្នាំ២០១០ ដែលវិទ្យុអាស៊ីសេរី ទទួលបាននៅថ្ងៃទី២០ ខែមិថុនានេះ បានដាក់កំហិតឲ្យលោកស្រី មូរ សុខហួរ សមាជិកសភាគណបក្សសមរង្ស៊ី អស់អភ័យឯកសិទ្ធិបង់ប្រាក់ពិន័យចំនួន ៨.៥០០.០០០ (ប្រាំបីលាន ប្រាំសែន រៀល) ទៅឲ្យរតនាគារជាតិ ឲ្យបានទាន់ពេលវេលា គិតពីថ្ងៃជូនដំណឹងនេះតទៅ។
លិខិតបន្តថា ក្នុងករណីលោកស្រី មូរ សុខហួរ មិនព្រមបង់ប្រាក់ពិន័យជាសាច់ប្រាក់ បង្វែរចូលគណនីអង្គភាពរតនាគារសាខារាជធានីភ្នំពេញ ក្នុងរយៈពេលពីរសប្ដាហ៍ ចាប់ពីថ្ងៃជូនដំណឹងទេ លោកស្រី មូរ សុខហួរ នឹងប្រឈមមុខតាមផ្លូវច្បាប់ ព្រោះសាលដីកាព្រហ្មទណ្ឌ ចុះថ្ងៃទី២ ខែមិថុនា ឆ្នាំ២០១០ របស់តុលាការកំពូលមានប្រសិទ្ធភាពអនុវត្តហើយ។
លោក យឹម សុវណ្ណ មន្ត្រីនាំពាក្យ និងជាតំណាងរាស្ត្រគណបក្សសមរង្ស៊ី បានបដិសេធន៍មិនធ្វើអត្ថាធិប្បាយ ជុំវិញករណីសំណុំរឿងលោកស្រី មូរ សុខហួរ នៅរសៀលថ្ងៃទី២០ ខែមិថុនានេះទេ។
កាលពីថ្ងៃទី២ ខែមិថុនា បន្ទាប់ពីចាញ់ក្ដីនៅសវនាការតុលាការកំពូល លោកស្រី មូរ សុខហួរ មានប្រសាសន៍ថា លោកស្រីនឹងមិនបង់ប្រាក់ពិន័យទៅតាមសេចក្ដីសម្រេចរបស់តុលាការកំពូលឡើយ។
លោកស្រីមានប្រសាសន៍ដូច្នេះ ៖ «ខ្ញុំសូមបញ្ជាក់ជាថ្មីម្ដងទៀត យើងមិនបង់ជាដាច់ខាត សម្បជញ្ញៈរបស់ខ្ញុំមិនអនុញ្ញាតឲ្យខ្ញុំបង់មួយកាក់មួយសេនទេ...»។
កាលពីថ្ងៃទី២ ខែមិថុនាកន្លងទៅនេះ តុលាការកំពូលបានសម្រេចតម្កល់សាលក្រមការកាត់សេចក្ដីរបស់សាលាដំបូង និងសាលាឧទ្ធរណ៍ ជុំវិញបណ្ដឹងបរិហារកេរ្តិ៍ ប្ដឹងដោយមេធាវីលោកនាយករដ្ឋមន្ត្រី ហ៊ុន សែន ទុកជាបានការ។
យ៉ាងណាក៏ដោយ សេចក្ដីជូនដំណឹងថ្ងៃទី១៧ ខែមិថុនា ចុះហត្ថលេខាដោយលោក កែ ប៊ុនឡេង ប្រធានរតនាគាររាជធានីភ្នំពេញឲ្យដឹងថា ក្នុងករណីលោកស្រី មូរ សុខហួរ សមាជិកគណបក្សសមរង្ស៊ី មិនព្រមបង់ប្រាក់ពិន័យតាមការកំណត់ទេ។ អង្គភាពរតនាគាររាជធានីនឹងអនុវត្តតាមនីតិវិធីច្បាប់៕