មេបញ្ជាការវរសេនាតូចលេខ៤២២ នៃកងយោធពលខេមរភូមិន្ទ លោក ប៉ុល ថេន បានមានប្រសាសន៍ឲ្យដឹងកាលពីរសៀលថ្ងៃព្រហស្បតិ៍ ទី១១ ខែកញ្ញា ថា កងទាហានខ្មែរជាច្រើនត្រូវបានដឹកតាមរថយន្តតាំងតែពីយប់ថ្ងៃពុធ ទៅកាន់ប្រាសាទតាក្របី នៅចន្លោះតំបន់ថ្មដូន ដែលកងទាហានថៃកំពុងតែចូលលុកលុយប្រាសាទតាក្របីនោះ ហើយកំពុងមានការប្រឈមមុខដាក់គ្នាដោយកងទ័ពយ៉ាងតឹងតែងនៅឡើយ។
មន្រ្តីយោធាដដែលបានឲ្យដឹងថា រហូតមកដល់រសៀលថ្ងៃព្រហស្បតិ៍ កងទ័ពថៃនិងខ្មែរកំពុងតែហ៊ុមព័ទ្ធគ្នាជាច្រើនជាន់ជុំវិញប្រាសាទតាក្របីនោះ។
លោក ប៉ុល ថេន បានឲ្យដឹងថា ៖ «ពួកខ្ញុំទៅយប់មិញទាំងយប់ច្រើនដែរ ពីកន្លែងដែលខ្ញុំនៅនេះ ហើយដឹកពីក្រោយឡើង២-៣ឡាន។ មុនមួយសន្ទុះមិញហ្នឹងសភាពការណ៍រាងធូរបន្តិច គ្រាន់តែថាអាចនិយាយគ្នាបានរឿងបញ្ហាតួប្រាសាទហ្នឹង។ ហើយវាហ្នឹងអត់ទាន់ដឹងដកថយយ៉ាងម៉េចទេ ពីម្សិលមិញវាចូលមក យើងនៅក្នុងប្រាសាទហ្នឹង ហើយវាចូលមក វាព័ទ្ធយើងពីក្រោយប្រាសាទហ្នឹងមួយជាន់ ដល់អ៊ីចឹងយើងព័ទ្ធវាមួយជាន់ទៀត វាថែមមកគ្របយើងមួយជាន់ទៀត»។
តាមការអះអាងពីកងយោធាខ្មែរឲ្យដឹងថា រហូតមកដល់រសៀលថ្ងៃព្រហស្បតិ៍ មានទាហានឈុតខ្មៅថៃប្រមាណ១៤០នាក់ហើយ បានចូលមកកាន់កាប់តំបន់ប្រាសាទតាក្របីនៃទឹកដីខ្មែរ។ កងទាហានខ្មែរបានឲ្យដឹងថា កាលពីយប់ថ្ងៃពុធ វេលាម៉ោងប្រមាណជា៨ កងទាហានឈុតខ្មៅថៃប្រមាណ១២នាក់បានជំរុលចូលមកកាន់កាប់ប្រាសាទតាក្របីនៃទឹកដីខ្មែរមុនគេ។
តាមនាយទាហានខ្មែរម្នាក់ប្រចាំការនៅតំបន់អូរស្មាច់ដែលសុំមិនបញ្ចេញឈ្មោះបាននិយាយថា កងទាហានខ្មែរការពារប្រាសាទតាក្របីបានបាញ់អាវុធឡើងលើមួយគ្រាប់កាលពីយប់ថ្ងៃពុធ ដើម្បីរារាំងការជំរុលចូលរបស់កងទាហានថៃទាំងនោះក៏ប៉ុន្តែមិនអាចរារាំងបាន។
ទាហានខ្មែរដដែលបានឲ្យដឹងថា ៖ «វាចូលពីយប់ ១២នាក់ ឯកម្លាំងយើងរុញច្រានទៅវិញ ក៏បាញ់មួយគ្រាប់ឡើងលើបង្អើលវាទៅ វានៅតែមក វាចូលមក»។
អភិបាលរងស្រុកបន្ទាយអំពិល លោក ចាប ផាត មានប្រសាសន៍ថា ប្រាសាទតាក្របីមានចម្ងាយប្រមាណជា៦គីឡូម៉ែត្រ ភាគខាងកើតតំបន់ថ្មដូន ហើយទីនោះពុំមានប្រជាពលរដ្ឋខ្មែររស់នៅទេ។
លោក ចាប ផាត បានមានប្រសាសន៍ទៀតថា អាជ្ញាធរស្រុកកំពុងព្យាយាមចូលទៅពិនិត្យស្ថានការណ៍នៅទីនោះ ប៉ុន្តែមិនអាចចូលបាននៅឡើយដោយសារផ្លូវត្រូវឆ្លងអូរជាច្រើនកំណាត់ ហើយកំពុងទឹកហូរខ្លាំងខណៈពេលមានភ្លៀង។
លោក ចាប ផាត បានមានប្រសាសន៍ថា ៖ «ព្រឹកមិញខ្ញុំព្យាយាមទៅដែរ ប៉ុន្តែទៅទឹកដាច់ផ្លូវនៅអូរទៅ ទៅអត់រួច។ អត់មានប្រជាជនយើងទៅនៅទេ នៅខាងហ្នុង»។
ចំណែកនៅឯប្រាសាទតាមាន់ដែលជាតំបន់ក្បែរគ្នានោះមានសេចក្ដីរាយការណ៍ថា កងទាហានខ្មែរបានបញ្ជូនកម្លាំងបន្ថែមទៀត ខណៈពេលដែលកងទាហានឈុតខ្មៅថៃបានបញ្ជូនកម្លាំងរបស់ខ្លួនមកកាន់កាប់តំបន់ដែលពួកគេធ្លាប់បោះជំរំ នៅជុំវិញប្រាសាទតាមាន់ជាថ្មីឡើងវិញ ជាងមួយសប្ដាហ៍មកហើយនោះ៕