គណបក្សសមរង្ស៊ីមានគម្រោងការរៀបចំបុណ្យសាសនាមួយ រាប់បាត្រ សូត្រមន្ត និងបង្សុកូល ដើម្បីរំឭកខួប ១៣ឆ្នាំ នៃព្រឹត្តិការណ៍គប់គ្រាប់បែកដៃចំនួន ៤គ្រាប់ កាលពីថៃ្ងទី៣០ ខែមីនា ឆ្នាំ១៩៩៧ ដែលបានសម្លាប់បាតុករតវ៉ាចំនួន ១៦នាក់ និងរងរបួសជាង ១០០នាក់ ប៉ុន្តែជនសង្ស័យជាឃាតករមិនទាន់ត្រូវបានចាប់ខ្លួននៅទ្បើយ។
គេបានរំពឹងទុកថា មានអ្នកគាំទ្រគណបក្សប្រឆាំង និងតំណាងរាស្រ្តគណបក្សប្រឆាំងចំនួនជាង ៣០០នាក់ នឹងចូលរួមក្នុងពិធីរំឭកខួបនោះនៅថៃ្ងទី៣០ ខែមីនា ឆ្នាំ២០១០ខាងមុខនេះ។
លោក យឹម សុវណ្ណ តំណាងរាស្រ្តគណបក្សសមរង្ស៊ី និងជាមន្រ្តីអ្នកនាំពាក្យ បានមានប្រសាសន៍ប្រាប់វិទ្យុអាស៊ីសេរី នៅថៃ្ងអាទិត្យ ទី២១ មីនា ថា ៖ «យើងត្រូវតែរំឭករឿងនេះជារៀងរាល់ឆ្នាំ ពីព្រោះមកដល់ពេលនេះ ឃាតករមិនត្រូវបានចាប់យកទៅកាត់ទោសនៅឡើយទេ។ ដូច្នេះយើងត្រូវតែរំឭកពិធីនេះ ដើម្បីនឹកគុណទៅដល់វីរបាតុករដែលបានពលីជីវិតផង ហើយជាការឆ្លៀតឱកាសហ្នឹងអំពាវនាវឲ្យរដ្ឋាភិបាលតាមរកឃាតករឲ្យឃើញ និងអ្នកនៅពីក្រោយខ្នងឲ្យឃើញ ដើម្បីយកមកកាត់ទោសជូនជនរងគ្រោះ»។
ក្រុមអ្នកនយោបាយបក្សប្រឆាំង និងតំណាងអង្គការសង្គមស៊ីវិលមួយចំនួននៅតែឆ្ងល់សង្ស័យអំពីការយឺតយាវរបស់អាជ្ញាធររបស់រដ្ឋាភិបាលកម្ពុជា ក្នុងការចាប់ខ្លួនជនសង្ស័យមកផ្តន្ទាទោស។
ប្រធានក្រុមស៊ើបអង្កេតរបស់អង្គការការពារសិទ្ធិមនុស្ស អាដហុក លោក នី ចរិយា បានមានប្រសាសន៍ថា ៖ «វាខុសពីករណីផ្សេងៗទៀត ពេលខ្លះយើងឃើញថា មានតែ ២អាទិត្យ ៣អាទិត្យអី អាចគូរចេញជារូបភាពជនសង្ស័យ ប៉ុន្តែចម្លែករឿងនេះមួយ យើងឃើញបួនដប់ឆ្នាំហើយនៅតែជាបញ្ហា មិនអាចរកឃើញ!»។
កន្លងមកមន្រ្តីជាន់ខ្ពស់របស់ក្រសួងមហាផ្ទៃ បានមានប្រសាសន៍បំភ្លឺថា សំណុំរឿងឃាតកម្មនោះមិនទាន់ត្រូវបានបិទនៅទ្បើយទេ។
លោកឧត្តមសេនីយ៍ឯក គៀត ចាន្ថារិទ្ធិ ជាមន្រ្តីអ្នកនាំពាក្យរបស់អគ្គស្នងការដ្ឋាននគរបាលជាតិកម្ពុជា បានមានប្រសាសន៍នៅថៃ្ងអាទិត្យ ទី២១ មីនា ថា ៖ «ទាល់តែសួរគណៈកម្មការគេ អាហ្នឹងគេមានគណៈកម្មការគេណា៎!»។
សុខ សេរី ៖ ប៉ុន្តែតាមគោលការណ៍ អាជ្ញាធរយើងមិនអនុញ្ញាតឲ្យជនល្មើសណារួចផុតពីសំណាញ់ច្បាប់ទេ? គៀត ចាន្ថារិទ្ធិ ៖ បាទ អាហ្នឹងជាគោលការណ៍គឺអ៊ីចឹង។
កាលពី ១៣ឆ្នាំមុន គឺថៃ្ងទី៣០ ខែមីនា ឆ្នាំ១៩៩៧កន្លងទៅ គ្រាប់បែកដៃចំនួន ៤គ្រាប់ត្រូវបានជនមិនស្គាល់មុខគប់ចូលក្នុងហ្វូងបាតុករ នៅខាងមុខរដ្ឋសភា ក្នុងទីក្រុងភ្នំពេញ ដឹកនាំដោយលោក សម រង្ស៊ី ប្រធានគណបក្សប្រឆាំង ដើម្បីទាមទារកំណែទម្រង់ប្រព័ន្ធតុលាការ និងប្រឆាំងអំពើពុករលួយក្នុងប្រទេសកម្ពុជា។ មនុស្សចំនួន ១៦នាក់បានស្លាប់នៅនឹងកន្លែង និងនៅមន្ទីរពេទ្យ ហើយមនុស្សចំនួនជាង ១០០នាក់ទៀតបានរងរបួស រាប់ទាំងជនជាតិអាមេរិកាំងម្នាក់ គឺលោក រ៉ន អេបនី (Ron Abney) នាយកអង្គការ IRI ប្រចាំក្នុងប្រទេសកម្ពុជា ដែលបានតាមដានឃ្លាំមើលបាតុកម្មនោះ។
ក្រុមភ្នាក់ងារស៊ើបអង្កេតរបស់ FBI របស់អាមេរិកាំងបានចូលមកក្នុងប្រទេសកម្ពុជា ដើម្បីបើកការស៊ើបអង្កេតសំណុំរឿងនេះ។
យោងតាមឯកសារ FBI កាលពីថៃ្ងទី១៩ ខែកុម្ភៈ ឆ្នាំ១៩៩៩ ឆ្លើយតបនឹងសំណួររបស់លោក ជេស៊ី ហេមស៍ (Jesse Helms) ប្រធានគណៈកម្មការព្រឹទ្ធសភាអាមេរិកាំង ស្តីពីទំនាក់ទំនងការបរទេសអំពីសំណុំរឿងនេះ បង្ហាញថា មិនមានកិច្ចសហការពីមន្រ្តីនគរបាលសំខាន់ៗមួយចំនួនក្នុងប្រទេសកម្ពុជា ក្នុងការជួបសម្ភាសនិងស៊ើបអង្កេត។ ក្រោយមកមានសេចក្តីរាយការណ៍ថា FBI បានដកខ្លួនចេញពីសំណុំរឿងនេះ។
កាលពីថ្ងៃទី២០ ខែសីហា ឆ្នាំ២០០៤កន្លងទៅ លោកនាយករដ្ឋមន្រ្តី ហ៊ុន សែន ត្រូវបានមន្រ្តីតុលាការក្រុងភ្នំពេញសាកសួរចម្លើយនានានៅឯគេហដ្ឋានរបស់លោក ជុំវិញសំណុំរឿងគប់គ្រាប់បែកដៃនោះ ប្តឹងដោយលោក សម រង្ស៊ី ដែលបានចោទប្រកាន់ថា ប្រមុខរដ្ឋាភិបាលកម្ពុជា គឺលោក ហ៊ុន សែន ស្ថិតនៅក្រោយខ្នងនៃអំពើឃាតកម្មនោះ និងបានប្ដឹងទាមទារសំណងជំងឺចិត្តចំនួន ៥០លានដុល្លារអាមេរិក។
ក្រោយមកទៀត តុលាការក្រុងភ្នំពេញបានចេញដីកាកោះហៅលោក សម រង្ស៊ី វិញ ដើម្បីសាកសួរចម្លើយ ប្តឹងដោយលោកនាយករដ្ឋមន្រ្តី ហ៊ុន សែន អំពីបទបរិហារកេរ្តិ៍ និងជេរប្រមាថ ជាមួយនឹងការទាមទារសំណងជំងឺចិត្តវិញចំនួន ៥លានដុល្លារអាមេរិក ពីលោក សម រង្ស៊ី ចំពោះអ្វីដែលលោក សម រង្ស៊ី បានចោទប្រកាន់ខាងលើនេះ៕