លោក ចាន់ ថន អាយុ៥១ឆ្នាំ ជាសកម្មជនគណបក្សសមរង្ស៊ីនៅក្នុងភូមិទ្រា ឃុំទ្រា ស្រុកស្ទោង ខេត្តកំពង់ធំ ដែលបានដឹងហេតុការណ៍នៃឃាតកម្មនេះ បានមានប្រសាសន៍ប្រាប់វិទ្យុអាស៊ីសេរីនៅថៃ្ងសៅរ៍ ទី៥ ខែកញ្ញា ថា មានជនពីរនាក់ដោយមានបិទមុខផងបានជិះម៉ូតូមួយគ្រឿងមកឈប់នៅក្បែរផ្ទះ ហើយបានបាញ់សម្លាប់ជនរងគ្រោះតែម្តង ៖ «ស្លាប់នៅនឹងផ្ទះ ម៉ោង៧យប់ គេបាញ់»។
សុខ សេរី ៖ មូលហេតុអី? ចាន់ ថន ៖ រកមូលហេតុអត់ឃើញអត់ទាន់ឃើញ យើងស្រាវជ្រាវទៅវាអត់ទាន់ឃើញ ថាមនុស្សហ្នឹងមិនដឹងជាមូលហេតុអីកំពុងហូបបាយ បាញ់ ម៉ោង៧យប់ មនុស្សបិទមុខ ជិះម៉ូតូពីរនាក់។
សុខ សេរី ៖ គេឈប់ម៉ូតូឬក៏បាញ់ពីលើម៉ូតូមក? ចាន់ ថន ៖ ឈប់ ចុះដើរទៅបាញ់ រួចបើកម៉ូតូមកវិញ។
ចំណែកឯលោក ទ្បយ ទ្បែម ជាជំទប់ទី១នៃឃុំចំណាលើ ស្រុកស្ទោង ខេត្តកំពង់ធំ បានមានប្រសាសន៍ថា ជនរងគ្រោះដែលបានគេបាញ់សម្លាប់នោះមានឈ្មោះ ទូច ហូត ជាប្រធានគណបក្សសមរង្ស៊ីប្រចាំការនៅក្នុងភូមិគ ឃុំចំណាលើ ស្រុកស្ទោង ខេត្តកំពង់ធំ។ លោកបានបន្តថា ឃាតកម្មនោះទំនងជាគេចោទថា លោកទូច ហូត នោះ ចេះអាបធ្មប់។
ប្រភពបានឲ្យដឹងទៀតថា សពរបស់លោក ទូច ហូត ត្រូវបានគ្រួសាររងគ្រោះបូជារួចហើយ។ គេបានកត់សម្គាល់ឃើញថា ឃាតកម្មថ្មីៗនេះបានធ្វើទ្បើងនៅគ្រាដែលប្រជាពលរដ្ឋខែ្មរនានានៅទូទាំងប្រទេសកម្ពុជាកំពុងតែចាប់ផ្តើមពិធីកាន់បិណ្ឌ។
មិនអាចទាក់ទងមន្រ្តីសមត្ថកិច្ចមូលដ្ឋានបានទេ នៅថៃ្ងសៅរ៍ ទី៥ ខែកញ្ញានេះ ដើម្បីសុំការបំភ្លឺជុំវិញការស៊ើបអង្កេតនៃឃាតកម្មនេះ។
ប៉ុន្តែលោកឧត្តមសេនីយ៍ឯក ខៀវ សុភ័គ ជាមន្រ្តីអ្នកនាំពាក្យរបស់ក្រសួងមហាផៃ្ទ បានមានប្រសាសន៍ថា ត្រូវតែមានការស៊ើបអង្កេត។
លោកឧត្តមសេនីយ៍ឯក ខៀវ សុភ័គ បានមានប្រសាសន៍ថា ៖ «យើងមិនគិតថា គណបក្សណាៗទេ នោះគឺជាសិទ្ធិរបស់បុគ្គល របស់ប្រជាជនយើងទូទាំងប្រទេស ប៉ុន្តែបើមានករណីឧក្រិដ្ឋកម្មត្រូវតែធ្វើការស៊ើបអង្កេតដើម្បីស្វែងរកជនល្មើស»។
លោក កែប ធី ជាអនុប្រធានគណបក្សសមរង្ស៊ី ប្រចាំការនៅក្នុងខេត្តកំពង់ធំ បានមានប្រសាសន៍ថា លោកបានទទួលព័ត៌មានអំពីឃាតកម្មនេះរួចហើយ។
លោក កែប ធី បានបញ្ជាក់ថា ៖ «ថាឲ្យខាងខ្ញុំចុះទៅដល់កន្លែងដើម្បីពិនិត្យហេតុការណ៍ហ្នឹងដោយផ្ទាល់ដើម្បីបានព័ត៌មានច្បាស់លាស់»។
លោក អំ សំអាត ប្រធានផែ្នកស៊ើបអង្កេតនៃអង្គការសិទ្ធិមនុស្សក្រៅរដ្ឋាភិបាលមួយ ហៅកាត់ថា លីកាដូ បានមានប្រសាសន៍ថា ក្រុមរបស់លោកកំពុងតែស៊ើបអង្កេតហើយ។
លោក អំ សំអាត បានថ្លែងថា ៖ «ក្រុមស៊ើបអង្កេតរបស់អង្គការលីកាដូហ្នឹងកំពុងតែធ្វើការស៊ើបអង្កេតទៅលើរឿងនេះ តើវាបណ្ដាលមកពីមូលហេតុអ្វីបានជាមានការលួចធ្វើឃាតនេះឡើង»។
ប្រភពពីអ្នកតាមដានស្ថានការណ៍នយោបាយក្នុងប្រទេសកម្ពុជា បានកត់សម្គាល់ឃើញថា អំពើឃាតកម្មមកលើសកម្មជនគណបក្សប្រឆាំងសមរង្ស៊ីបានស្ងប់ស្ងាត់មួយរយៈធំមកហើយ ប៉ុន្តែគេបានសម្តែងការព្រួយបារម្ភជាថ្មីទៀត នៅគ្រាដែលមានការកម្រើកទ្បើងវិញនៃអំពើឃាតកម្មនេះ ដោយក្រោមលេសថាចេះអាបធ្មប់៕