លោក សុន ឆ័យ បានមានប្រសាសន៍ប្រាប់វិទ្យុអាស៊ីសេរីនៅព្រឹកថ្ងៃ២៨ វិច្ឆិកា ថា ក្នុងនាមជាតំណាងរាស្រ្តលោកបានស្នើសុំទៅប្រមុខរាជរដ្ឋាភិបាលតាមរយៈប្រធានរដ្ឋសភាឲ្យលោកឧបនាយករដ្ឋមន្ត្រី សុខ អាន និងសហការីឯកទេសខាងផ្នែកព្រំដែនមកកាន់រដ្ឋសភា នៅថ្ងៃទី១៧ ធ្នូ ខាងមុខ ដើម្បីពន្យល់អំពីបញ្ហាទាំងនេះ។
លោក សុន ឆ័យ បានបញ្ជាក់ថា ៖ «ពលរដ្ឋដូចជាងងឹតងងល់ មិនដឹងសកម្មភាពទាំងនេះ ដល់ហើយបានជាវាមានអព្ភូតហេតុ ជាទូទៅមានការងឿងឆ្ងល់ថាតើរដ្ឋាភិបាលហ្នឹងអនុវត្តត្រឹមត្រូវឬទេ? តើហេតុអ្វីបានពលរដ្ឋយើងបាត់បង់ដីស្រែ? រហូតដល់ភូមិរបស់សម្ដេច ហេង សំរិន ក៏ត្រូវបាត់បង់អីហ្នឹង ដើម្បីឲ្យពលរដ្ឋលោកបានដឹងផង ពីព្រោះការបោះបង្គោលកន្លងទៅនេះអត់មានការចូលរួមពីអ្នកសារព័ត៌មានឬក៏តំណាងរាស្ត្រអីទេ!»។
រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្ត្រី គឺលោក ផៃ ស៊ីផាន មានប្រសាសន៍ថា សំណើទាំងឡាយដែលត្រឹមត្រូវតាមផ្លូវច្បាប់រាជរដ្ឋាភិបាលពុំដែលព្រងើយកន្តើយក្នុងការឆ្លើយបំភ្លឺទេ។
លោក ផៃ ស៊ីផាន បានថ្លែងថា ៖ «ជាច្បាប់ខាងរាជរដ្ឋាភិបាលត្រូវតែចូលខ្លួនបំភ្លឺតាមរយៈការស្នើសុំរបស់សមាជិកសភាណាមួយ ហើយនិងការអនុញ្ញាតពីប្រធានរដ្ឋសភា អានេះជាច្បាប់!»។
ប្រធានគណៈកម្មាធិការព្រំដែនកម្ពុជា គឺលោក វ៉ា គឹមហុង ចាត់ទុកសំណើនេះថាជារឿងចាស់ដដែល។ ទោះបីជាយ៉ាងនេះក្តី លោកមានប្រសាសន៍ថា លោកនឹងឡើងធ្វើការពន្យល់ប្រសិនបើមានការចាត់តាំងពីប្រមុខរាជរដ្ឋាភិបាល។
លោក វ៉ា គឹមហុង បានមានប្រសាសន៍ថា ៖ «តាមពិតទៅដូចខ្ញុំបានជម្រាបអ៊ីចឹង ខ្ញុំគ្មានអីលាក់លៀមទេ ពេលយើងឆ្លងសុំសច្ចាប័នសន្ធិសញ្ញាបំពេញបន្ថែម២០០៥ សម្ដេចនាយកលោកបានអញ្ជើញទៅបំភ្លឺរដ្ឋសភាពេលហ្នឹងអស់ទៅហើយ។ ដូច្នេះវាអត់មានអីថាមិនដឹងទេណា៎! ទាំងពីអត្ថបទនៃសន្ធិសញ្ញាបំពេញបន្ថែមក៏មានចែកជូនអីទាំងអស់ ការបំភ្លឺរបស់រដ្ឋាភិបាល»។
កាលពីថ្ងៃ១៦ វិច្ឆិកាកន្លងទៅ រដ្ឋសភាបានសម្រេចព្យួរអភ័យឯកសិទ្ធិសមាជិកសភាពីលោក សម រង្ស៊ី ដោយលោកបានធ្វើសកម្មភាពដកបង្គោលឈើដែលជាតម្រុយបណ្តោះអាសន្នសម្រាប់សម្គាល់ព្រំដែន ហើយអាជ្ញាធរស្រុកចន្ទ្រាប្តឹងទៅតុលាការខេត្តចោទប្រកាន់លោក សម រង្ស៊ី ពីបទបំផ្លាញទ្រព្យសម្បត្តិសាធារណៈ ដែលឈានទៅដល់ការដកអភ័យឯកសិទ្ធិពីលោកដើម្បីបើកផ្លូវឲ្យតុលាការកោះអញ្ជើញទៅធ្វើការបំភ្លឺ៕