លោកស្រី កែ សុវណ្ណរតន៍ អគ្គលេខាធិការគណបក្សសមរង្ស៊ី មានប្រសាសន៍ឲ្យវិទ្យុអាស៊ីសេរីដឹងនៅល្ងាចថ្ងៃទី២៩ ខែវិច្ឆិកានេះ ថា គណបក្សសមរង្ស៊ីមិនទាន់ទទួលបានដំណឹងទាក់ទងការដែលមានសមាជិកគណបក្សសមរង្ស៊ីចុះចូលជាមួយគណបក្សប្រជាជនកម្ពុជានោះទេ។ ដោយឡែកចំពោះព័ត៌មានដែលថា មានកងអង្គរក្សរបស់លោក សម រង្ស៊ី ទៅចុះចូលជាមួយគណបក្សប្រជាជនកម្ពុជារហូតដល់ទៅ២០នាក់នោះក៏មិនពិតដែរ ព្រោះលោក សម រង្ស៊ី មិនមានអង្គរក្សច្រើនបែបនោះទេ។
លោកស្រី កែ សុវណ្ណរតន៍ បានបញ្ជាក់ថា ៖ «អត់មាន! តាមខ្ញុំដឹង កងអង្គរក្សរបស់ឯកឧត្ដម សម រង្ស៊ី អត់មាន២៤នាក់អីផង គាត់មានអង្គរក្សផ្ទាល់តែ២នាក់គត់។ រហូតមកដល់ពេលនេះខ្ញុំអត់ទាន់បានទទួលព័ត៌មានហ្នឹងផង»។
ដោយឡែកលោក កឹម សុខា ប្រធានគណបក្សសិទ្ធិមនុស្ស មានប្រសាសន៍ថា គណបក្សសិទ្ធិមនុស្សមិនមានបាត់សមាជិករបស់ខ្លួនមិនថានៅភ្នំពេញឬតាមបណ្តាខេត្តក្រុងសូម្បីតែម្នាក់ទៅចុះចូលជាមួយគណបក្សប្រជាជននោះទេ។ ផ្ទុយទៅវិញក្នុងមួយខែៗមានតែសមាជិកគណបក្សប្រជាជនកម្ពុជាមកចុះចូលជាមួយគណបក្សសិទ្ធិមនុស្សរាប់ពាន់នាក់ឯណោះ។
លោក កឹម សុខា បានមានប្រសាសន៍ថា ៖ «ខ្ញុំអត់មានបាត់សមាជិកផង ខាងគណបក្សសិទ្ធិមនុស្ស។ ដូច្នេះមិនដឹងថា គេបានសមាជិកពីណាមក ឬក៏សមាជិកដែលគេឈប់យូរហើយក៏មិនដឹង ព្រោះសមាជិកខ្ញុំនៅក្នុងរចនាសម្ព័ន្ធហ្នឹងអត់មានបាត់ផង ហើយមានតែគណបក្សប្រជាជនមកចូលខ្ញុំ ក្នុងមួយខែៗពីរបីពាន់(នាក់)រាល់តែខែ»។
ក្នុងពេលថ្មីៗនេះ យោងតាមការចុះផ្សាយរបស់កាសែតក្នុងស្រុកមួយចំនួនបានដកស្រង់សម្តីរបស់មន្ត្រីគណបក្សប្រជាជនកម្ពុជាមកចុះផ្សាយថា មានសមាជិកគណបក្សសមរង្ស៊ីនិងគណបក្សសិទ្ធិមនុស្សរាប់រយនាក់បានចុះចូលជាមួយគណបក្សប្រជាជនកម្ពុជាកំពុងកាន់អំណាច ប៉ុន្តែការអះអាងនេះត្រូវបានប្រកាសច្រានចោលភ្លាមៗពីមន្ត្រីជាន់ខ្ពស់គណបក្សនៅក្រៅរដ្ឋាភិបាលទាំងពីរ គឺគណបក្សសមរង្ស៊ីនិងគណបក្សសិទ្ធិមនុស្ស៕