គណបក្ស​សម​រង្ស៊ី​រំឭក​ខួប​ថ្ងៃ​១៧ មេសា ១៩៧៥

ថ្នាក់​ដឹកនាំ​គណបក្ស​សម​រង្ស៊ី និង​អ្នក​គាំទ្រ​បាន​មក​ជួប​ជុំ​គ្នា​នៅ​វាល​ពិឃាត​បឹង​ជើងឯក ដើម្បី​រំឭក​វិញ្ញាណក្ខន្ធ​ដល់​ជន​រង​គ្រោះ​ជាង ២​ម៉ឺន​នាក់​ដែល​ត្រូវ​បាន​ខ្មែរ​ក្រហម​សម្លាប់។

ថ្នាក់​ដឹកនាំ​គណបក្ស​សម​រង្ស៊ី និង​អ្នក​គាំទ្រ​គណបក្ស​នេះ​ចំនួន​ប្រមាណ ៣០០​នាក់ កាល​ពី​ព្រឹក​ថ្ងៃ​សៅរ៍ ទី​១៧ ខែ​មេសា​នេះ បាន​មក​ជួប​ជុំ​គ្នា ដើម្បី​រំឭក​វិញ្ញាណក្ខន្ធ​ដល់​ជន​រង​គ្រោះ​ជាង ២​ម៉ឺន​នាក់​ដែល​ត្រូវ​បាន​ខ្មែរ​ក្រហម​សម្លាប់​នៅ​វាល​ពិឃាត​បឹង​ជើងឯក និង​ទទូច​សុំ​ឲ្យ​សាលាក្ដី​ខ្មែរ​ក្រហម​ផ្ដន្ទា​ទោស​មេ​ដឹកនាំ​ខ្មែរ​ក្រហម​ឲ្យ​បាន​ធ្ងន់ធ្ងរ ដើម្បី​ផ្ដល់​យុត្តិធម៌​ដល់​គ្រួសារ​ជន​រង​គ្រោះ​ឲ្យ​បាន​ឆាប់ ដែល​កំពុង​តែ​រង់ចាំ​យុត្តិធម៌​រយៈ​ពេល ៣៥​ឆ្នាំ​មក​ហើយ។

ព្រះ​សង្ឃ​ចំនួន ៥០​អង្គ តំណាង​រាស្ត្រ​គណបក្ស​សម​រង្ស៊ី​ចំនួន​ជាង ២០​នាក់ និង​អ្នក​គាំទ្រ​ជា​ច្រើន​រយ​នាក់ បាន​មក​ធ្វើ​ពិធី​បុណ្យ​បង្សុកូល​រាប់​បាត្រ និង​សូត្រ​មន្ត ឧទ្ទិស​ដល់​អ្នក​ស្លាប់​ចំនួន​ជាង ២​ម៉ឺន​នាក់ ដែល​ខ្មែរ​ក្រហម​បាន​យក​ពី​គុក​ទួល​ស្លែង​មក​សម្លាប់​នៅ​ក្នុង​ផ្នូរ​រួម នៅ​បឹង​ជើងឯក ខាង​លិច​ឆៀង​ខាង​ត្បូង ចម្ងាយ​ជាង ១០​គីឡូម៉ែត្រ ជាយ​ទីក្រុង​ភ្នំពេញ។

មេ​ដឹកនាំ​គណបក្ស​សម​រង្ស៊ី​បាន​មាន​ប្រសាសន៍​តាម​ទូរស័ព្ទ​ពី​ទីក្រុង​ប្រ៊ូសែល ប្រទេស​បែលហ្សិក ដែល​គេ​បាន​ភ្ជាប់​ទៅ​នឹង​គ្រឿង​បំពង​សំឡេង​ថា ប្រជា​ពលរដ្ឋ​ខែ្មរ​រង់ចាំ​យុត្តិធម៌​ដើម្បី​លុប​បំបាត់​និទ្ទណ្ឌភាព​នៃ​អំពើ​ប្រល័យ​ពូជ​សាសន៍​នេះ ៖ «យើង​បប្រឆាំងដាច់​ខាត ប្រឆាំង​អំពើ​ឃោរឃៅ អំពើ​អ​យុត្តិធម៌ និង​អំពើ​អ​មនុស្សធម៌»

ដូន​ជី​ឈ្មោះ វ៉ាន់ គង់ អាយុ ៧៧​ឆ្នាំ ដែល​កំពុង​តែ​ដើរ​ទស្សនា​រណ្ដៅ​ផ្នូរ​ខ្មោច​រួម​ដ៏​ធំ​មួយ​នៅ​ក្បែរ​នោះ បាន​ថ្លែង​ប្រាប់​វិទ្យុ​អាស៊ី​សេរី​ទាំង​ទឹក​ភ្នែក​រលីង​រលោង និង​យក​កន្សែង​ពណ៌​ស​ជូត​ទឹក​ភ្នែក ជាមួយ​នឹង​ការ​ពណ៌នា​ថា ៖ «បង​ប្អូន​ខ្ញុំ​ស្លាប់​ទាំង​អស់ នៅ​តែ​ខ្ញុំ​ម្នាក់​ឯក។ អស់​ម្ដាយ គ្រួសារ​ស្លាប់​ដែរ នៅ​តែ​ខ្ញុំ​ម្នាក់​ឯង»

ជាមួយ​គ្នា​នេះ ប្រជា​ពលរដ្ឋ​ម្នាក់​ទៀត​ដែល​បាន​មក​ចូលរួម​ក្នុង​ពិធី​បុណ្យ​នេះ​ដែរ បាន​ថ្លែង​ថា ៖ «មក​ធ្វើ​បុណ្យ​កន្លែង​នេះ ពីព្រោះ​បុណ្យ​សព​ខ្មោច​ជំនាន់ ប៉ុល ពត បាន​សម្លាប់​ប្រជាជន​ស្លូត​ត្រង់​ទាំង​អស់​គ្នា​ហ្នឹង​ណា៎!»

ថ្ងៃ​ទី​១៧ ខែ​មេសា ឆ្នាំ​១៩៧៥ និង​ថ្ងៃ​ទី​១៧ ខែ​មេសា ឆ្នាំ​២០១០ កាល​ពី ៣៥​ឆ្នាំ​មុន ក្រុម​ខ្មែរ​ក្រហម​ឈុត​ខ្មៅ​បាន ឡើង​កាន់​អំណាច ដោយ​បាន​ជម្លៀស​ប្រជា​ពលរដ្ឋ​ខ្មែរ​ពី​ទីក្រុង​ភ្នំពេញ​ដោយ​បង្ខំ ទៅ​ទី​ជនបទ ធ្វើ​ឲ្យ​ព្រាត់​ប្រាស​ក្រុម​គ្រួសារ ហើយ​ក្រោយ​មក​ទៀត ក្រុម​ខ្មែរ​ក្រហម​ចាប់ផ្ដើម​អនុវត្ត​ផែនការ​សម្លាប់​រង្គាល​ប្រជា​ពលរដ្ឋ ចាប់​តាំង​ថ្ងៃ​ទី​១៧ ខែ​មេសា ឆ្នាំ​១៩៧៥ ដល់​ថ្ងៃ​ទី​៧ មករា ឆ្នាំ​១៩៧៩។

មនុស្ស​ចំនួន​ជិត ២​លាន​នាក់​បាន​រង​ការ​សម្លាប់​ដោយ​អំពើ​ឃោរឃៅ ធ្វើ​ការងារ​ពលកម្ម​បាក់​កម្លាំង អត់​បាយ​ក្រហាយ​ទឹក គ្មាន​ថ្នាំ​ព្យាបាល និង​រង​ការ​ធ្វើ​ទារុណកម្ម។

លោក ឌឹម សុវណ្ណារ៉ុម ជា​មន្ត្រី​អ្នក​នាំ​ពាក្យ​របស់​សាលា​ក្ដី​ខ្មែរ​ក្រហម បាន​មាន​ប្រសាសន៍​ទាក់ទង​នឹង​ការ​ស្វែងរក​យុត្តិធម៌​នៃ​សាលា​ក្ដី​ខ្មែរ​ក្រហម​ជូន​ជន​រង​គ្រោះ ថា ៖ «ការ​ប្រកាស​សាលក្រម​លេខ​០០១ យើង​គ្រោង​ប្រកាស​នៅ​ពាក់​កណ្ដាល​ឆ្នាំ​២០១០​នេះ ។ ដោយ​ទ្បែក​សំណុំ​រឿង ០០២​ហ្នឹង ការ​បញ្ជូន​រឿង​ទៅ​ជម្រះ គឺ​សហ​ចៅក្រម​ជំនុំ​ជម្រះ​បាន​ប្ដេជ្ញា​ថា នឹង​ធ្វើ​នៅ​ក្នុង​អំទ្បុង​ខែ​កញ្ញា ឆ្នាំ​២០១០។ ដូច្នេះ នេះ​គឺ​ជា​ការ​ប្ដេជ្ញា​ចិត្ត​មួយ ដើម្បី​ឆ្លើយ​តប​ទៅ​នឹង​ការ​រង់ចាំ​របស់​ជន​រង​គ្រោះ ហើយ​ក៏​ដូច​ជា​ធ្វើ​ម៉េច​ពន្លឿន​ការងារ ការ​កាត់​ទោស​ខ្មែរ​ក្រហម​ឲ្យ​បាន​លឿន»

រហូត​មក​ដល់​ពេល​នេះ សាលា​ក្ដី​ខ្មែរ​ក្រហម​បាន​បញ្ចប់​ការ​កាត់​ទោស​មេ​គុក​ទួលស្លែង ឬ​មន្ទីរ​ស​-​២១ លោក កាំង ហ្កេកអ៊ាវ ហៅ ឌុច នោះ​ហើយ។ គេ​រង់ចាំ​តែ​ថ្ងៃ​ប្រកាស​សាលក្រម​នៃ​សំណុំរឿង ០០១​នេះ។

សាលា​ក្ដី​ខ្មែរ​ក្រហម​កំពុង​តែ​ដំណើរការ​រៀបចំ​ការ​កាត់​ទោស​មេ​ដឹកនាំ​ខ្មែរ​ក្រហម​ជាន់​ខ្ពស់​ចំនួន ៤​នាក់​ទៀត មាន​ដូច​ជា​លោក ខៀវ សំផន, លោក អៀង សារី, លោក នួន ជា និង​លោក​ស្រី អៀង ធិរិទ្ធិ ជាដើម ឬ​សំណុំ​រឿង ០០២៕