ការស្វែងរកកិច្ចអន្តរាគមន៍លើកលែងទោសពីអង្គព្រះមហាក្សត្រដើម្បីឲ្យលោក សម រង្ស៊ី ប្រធានគណបក្សប្រឆាំងបានវិលចូលស្រុករបស់សមាជិកសភាគណបក្ស សម រង្ស៊ី ទាំង ២៤រូប ធ្វើឡើងតាមរយៈលិខិត ១ច្បាប់ចុះថ្ងៃទី១៨ ខែមីនា ឆ្នាំ២០១១ ថ្វាយទៅព្រះមហាក្សត្រខ្មែរ ដើម្បីសូមព្រះអង្គមានព្រះតម្រិះចំពោះបញ្ហានេះ។
ខ្លឹមសារលិខិតដែលទើបចែកដល់ដៃអ្នកកាសែតនៅព្រឹកថ្ងៃទី២១ ខែមីនា បានចាត់ទុកការកាត់ទោសលោក សម រង្ស៊ី ផ្ដើមដោយតុលាការក្រុងភ្នំពេញ គឺមានភាពអយុត្តិធម៌បំផុតចំពោះលោក សម រង្ស៊ី ដែលបានធ្វើសកម្មភាពការពារទឹកដីកុំឲ្យបរទេសឈ្លានពាន និងជួយការពារសិទ្ធិរស់នៅរបស់ប្រជាពលរដ្ឋក្រីក្រដែលរងការរំលោភបំពាន។
លិខិតឲ្យដឹងបន្តថា អវត្តមានមេដឹកនាំបក្សប្រឆាំងធំទី១ នៅកម្ពុជា គឺនាំឲ្យប៉ះពាល់ដល់ការវិវត្តន៍លទ្ធិប្រជាធិបតេយ្យកំពុងបោះជំហាននៅកម្ពុជា។
បន្ថែមលើខ្លឹមសារលិខិត លោក យឹម សុវណ្ណ មន្ត្រីនាំពាក្យគណបក្ស សម រង្ស៊ី មានប្រសាសន៍ឲ្យវិទ្យុអាស៊ីសេរី ដឹងនៅរសៀលថ្ងៃទី២១ ខែមីនា ថា ការទទួលបានការលើកលែងទោសពីព្រះមហាក្សត្រចំពោះលោក សម រង្ស៊ី នឹងអាចឲ្យរូបលោកទទួលបានបុព្វសិទ្ធិ និងទទួលបានសិទ្ធិជាសមាជិកភាពសមាជិកសភាឡើងវិញ។
លោក យឹម សុវណ្ណ បន្ថែម ៖ «ស្ថាប័នតុលាការ ស្ថាប័នរដ្ឋសភា ស្ថាប័នជាតិដទៃទៀត សុទ្ធតែគ្រប់គ្រងដោយគណបក្សប្រជាជន។ រាល់សេចក្តីសម្រេចទាំងអស់សុទ្ធតែទទួលឥទ្ធិពលពីគណបក្សប្រជាជន។ អត់មានស្ថាប័នណាមួយដែលធានានូវឯករាជ្យភាពពិតប្រាកដក្នុងការធ្វើសេចក្ដីសម្រេចរាល់ទំនាស់នយោបាយនោះទេ។ ដូច្នេះយើងនៅសល់តែស្ថាប័នព្រះមហាក្សត្រមួយទៀតដែលគណបក្ស សម រង្ស៊ី យល់ថា ព្រះមហាក្សត្រលោកមានព្រះរាជតម្រិះទៅលើសេចក្ដាំសម្រេច»។
វិទ្យុអាស៊ីសេរីមិនអាចទាក់ទងមន្ត្រីខុទ្ទកាល័យព្រះមហាក្សត្រ ដើម្បីបំភ្លឺជុំវិញការដាក់លិខិតស្នើលើកលែងទោសរបស់តំណាងរាស្ត្រគណបក្សប្រឆាំងទាំង ២៤រូប នៅរសៀលថ្ងៃទី២១ ខែមីនានេះ។ ប៉ុន្តែជាធម្មតារាល់ការស្នើសុំការលើកលែងទោសណាមួយកើតឡើង ទាល់តែព្រះមហាក្សត្របញ្ជូនលិខិតស្នើព្រះរាជទានទោសនោះទៅក្រសួងយុត្តិធម៌ និងទៅប្រមុខរដ្ឋាភិបាលដើម្បីពិនិត្យ។
យ៉ាងនេះក្ដី លោក យឹម សុវណ្ណ បានឲ្យដឹងថា លិខិតស្នើសុំព្រះរាជអន្តរាគមន៍ពីព្រះមហាក្សត្រ ត្រូវបានគណបក្ស សម រង្ស៊ី ដាក់ជូនទៅខុទ្ទកាល័យព្រះមហាក្សត្រ កាលពីថ្ងៃទី១៨ ខែមីនា មកម្ល៉េះ ប៉ុន្តែរហូតមកដល់ថ្ងៃទី២១ ខែមីនានេះ មិនទាន់មានការឆ្លើយតបបែបណានៅឡើយទេ។
លោក ផៃ ស៊ីផាន មន្ត្រីនាំពាក្យ និងជារដ្ឋលេខាធិការគណៈរដ្ឋមន្ត្រី មានប្រសាសន៍ថា រូបលោកមិនចង់ធ្វើអត្ថាធិប្បាយជុំវិញករណីលោក សម រង្ស៊ី នោះទេ សំណុំរឿងមេបក្សប្រឆាំងរូបនេះ ស្ថិតក្នុងដៃតុលាការ។
លោក ផៃ ស៊ីផាន មានប្រសាសន៍ដូច្នេះ ៖ «ច្បាប់អនុញ្ញាតឲ្យស្ថាប័នណាមួយធ្វើលិខិតដើម្បីស្នើសុំពីព្រះមហាក្សត្រ ដើម្បីព្រះរាជទានលើកលែងទោស តើការទទួលទោសទណ្ឌបានបម្រើប៉ុន្មានភាគរយរួចទៅហើយ? ត្រូវបកទៅមើលច្បាប់ហ្នឹងវិញ»។
លោក សម រង្ស៊ី ប្រធានគណបក្សប្រឆាំងធំជាងគេនៅកម្ពុជា ត្រូវបានរដ្ឋសភាប្រទេសកម្ពុជា សម្រេចលុបឈ្មោះចេញពីបញ្ជីតំណាងរាស្ត្រជាស្ថាពរ កាលពីថ្ងៃទី១៥ ខែមីនា បន្ទាប់ពីសាលក្រមតុលាការកំពូលផ្ដន្ទាទោសឲ្យជាប់ពន្ធនាគារ ២ឆ្នាំ ក្នុងបទបំផ្លាញតម្រុយបង្គោលព្រំដែនកម្ពុជា-វៀតណាម លេខ១៨៥ នៅស្រុកចន្ទ្រា ខេត្តស្វាយរៀង។
ករណីលោក សម រង្ស៊ី នេះដែរ មន្ត្រីសង្គមស៊ីវិលមួយចំនួននៅកម្ពុជា បានចាត់ទុកថា ជារឿងនយោបាយ និងទាមទារឲ្យរដ្ឋាភិបាលត្រូវធ្វើការដោះស្រាយបែបនយោបាយជំនួសវិញ ដោយមិនត្រូវប្រើប្រព័ន្ធតុលាការយកមកធ្វើការដោះស្រាយនោះទេ៕