មន្ត្រីកម្ពុជារំពឹងថា កូរ៉េខាងជើងនឹងក្លាយជាទីផ្សារថ្មីមួយសម្រាប់ទិញផលិតផលកសិកម្មកម្ពុជា ដូចជាស្រូវពោត ដំឡូងមី និងសណ្ដែក។ ចំណែកកម្ពុជា នឹងទិញគ្រឿងចក្រសម្រាប់វិស័យកសិកម្មពីកូរ៉េខាងជើងវិញ។
លោក សម រង្ស៊ី ប្រធានគណបក្ស សម រង្ស៊ី បានព្រមានរដ្ឋាភិបាលក្រុងភ្នំពេញថា កម្ពុជាគួរតែជ្រើសរើសយកវិស័យសិទ្ធិមនុស្សជាអាទិភាព មុនស្វែងរកផលប្រយោជន៍ផ្សេងៗទៀតពីកូរ៉េខាងជើង។
ក្ដីបារម្ភរបស់គណបក្សប្រឆាំង ធ្វើឡើងបន្ទាប់ពីកម្ពុជា និងកូរ៉េខាងជើងបានចុះហត្ថលេខាជំរុញវិស័យសេដ្ឋកិច្ច បច្ចេកទេស វប្បធម៌ ការដឹកជញ្ជូនផ្លូវសមុទ្រ និងវិស័យការបរទេស។
ក្នុងពិធីចុះហត្ថលេខានេះ រដ្ឋាភិបាលកម្ពុជា មិនបានធ្វើអត្ថាធិប្បាយលើការរំលោភសិទ្ធិមនុស្សរបស់កូរ៉េខាងជើងនោះទេ។
លោក សម រង្ស៊ី បន្ថែមថា វិស័យសេដ្ឋកិច្ច និងពាណិជ្ជកម្មនឹងមិនរីកចម្រើនទេ ប្រសិនការគោរពសិទ្ធិមនុស្សធ្លាក់ចុះនោះ ៖ «យើងមានគោលការណ៍មនុស្សធម៌ គោលការណ៍ប្រជាធិបតេយ្យដែលយើងគោរពចំពោះប្រទេសក្នុងពិភពលោក យើងមិនអាចចូលដៃនឹងចោរ និងឧក្រិដ្ឋកម្មអន្តរជាតិទេ ប្រទេសខ្លះពាក់ព័ន្ធការជួញដូរអាវុធ ការជួញដូរគ្រឿងញៀន បោះពុម្ពលុយក្លែងក្លាយ។ ប្រទេសកូរ៉េខាងជើងជាប់ពាក់ព័ន្ធឧក្រិដ្ឋកម្មអន្តរជាតិ ដូច្នោះជាការសោកស្ដាយ បើប្រទេសណាទៅជាប់ពាក់ព័ន្ធនឹងប្រទេសបែបកូរ៉េខាងជើងនេះ»។
កូរ៉េខាងជើងត្រូវបានគេចោទប្រកាន់ថា បានរំលោភសិទ្ធិមនុស្សធ្ងន់ធ្ងរ ដូចជាការសម្លាប់មនុស្សជាសាធារណៈ ការធ្វើទារុណកម្ម និងការចាប់ខ្លួនអ្នកទោសនយោបាយរាប់ពាន់នាក់ដាក់គុក។
សេចក្ដីប្រកាសព័ត៌មានក្រសួងការបរទេសបញ្ជាក់ថា កិច្ចសហការកម្ពុជា និងកូរ៉េខាងជើង គឺសំដៅលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាជននៃប្រទេសទាំងពីរ។
ប្រទេសទាំងពីរក៏នឹងផ្លាស់ប្ដូរបទពិសោធន៍ និងអ្នកជំនាញការ និងបច្ចេកវិទ្យាក្នុងវិស័យឧស្សាហកម្ម កសិឧស្សាហកម្ម និងពលកម្ម។ ភាគីទាំងពីរបានយល់ព្រមនឹងរៀបចំកិច្ចប្រជុំគណៈកម្មការចម្រុះកម្ពុជា-កូរ៉េខាងជើង នៅទីក្រុងព្យុងយ៉ាង នៅឆ្នាំ២០១៣ ខាងមុខនេះ។
ទោះបីជាទំនាក់ទំនងខាងក្រៅរវាងរដ្ឋាភិបាលកូរ៉េខាងជើង និងកម្ពុជា មានភាពជិតស្និទ្ធក៏ដោយ ប៉ុន្តែទំនាក់ទំនងផ្ទៃក្នុងកម្ពុជា កូរ៉េខាងត្បូង និងកូរ៉េខាងជើងហាក់បីដូចមិនសូវទុកចិត្តគ្នាទៅវិញទៅមក។
ឯកសារសម្ងាត់របស់ស្ថានទូតសហរដ្ឋអាមេរិកប្រចាំកម្ពុជា ដែលបានលេចធ្លាយផ្សាយដោយគេហទំព័រ វីគីលិគ (Wikileaks) និយាយថា កម្ពុជាបច្ចុប្បន្ននេះបានធ្វើការដោយសម្ងាត់ជាមួយនឹងស្ថានទូតកូរ៉េខាងត្បូង ដើម្បីជួយជនភៀសខ្លួនកូរ៉េខាងជើងរាប់រយនាក់ទៅស្វែងរកប្រទេសមានសុវត្ថិភាពរស់នៅ។ ឯកសារបន្តថា កម្ពុជាក្លាយជាទីកន្លែងសំខាន់សម្រាប់ជនភៀសខ្លួនកូរ៉េខាងជើង ដោយសារជនទាំងនោះអាចមកកម្ពុជា តាមប្រទេសវៀតណាម និងចិន។
មន្ត្រីកម្ពុជា ឲ្យដឹងថា ការអនុញ្ញាតឲ្យជនភៀសខ្លួនកូរ៉េខាងជើង ស្វែងរកសិទ្ធិជ្រកកោននៅកម្ពុជា គឺដោយមានការយល់ព្រមពីស្ថានទូតកូរ៉េខាងត្បូង និងលោក ហ៊ុន សែន។
ឯកសារសម្ងាត់បន្តថា កម្ពុជាចង់រក្សាការណ៍សម្ងាត់ក្នុងការជួយសង្គ្រោះពលរដ្ឋកូរ៉េខាងជើង ដោយសារតែសុវត្ថិភាពផ្ទាល់ខ្លួនរបស់លោកនាយករដ្ឋមន្ត្រី ហ៊ុន សែន។
មន្ត្រីជាន់ខ្ពស់កម្ពុជា ធ្លាប់បានប្រាប់មន្ត្រីស្ថានទូតសហរដ្ឋអាមេរិកថា រដ្ឋាភិបាលមានក្ដីកង្វល់ពីសន្តិសុខរបស់លោក ហ៊ុន សែន ដោយសារផ្ទះលោក ហ៊ុន សែន នៅក្បែរស្ថានទូតកូរ៉េខាងជើង។
អ្នកវិភាគនយោបាយលោក ឡៅ ម៉ុងហៃ កាលពីថ្ងៃអង្គារ ទី២ ខែសីហា មានប្រសាសន៍ថា បើទោះបីជាកិច្ចសហការកម្ពុជា និងកូរ៉េខាងជើង មិនបានពិភាក្សាគ្នាពីបញ្ហាសិទ្ធិមនុស្សក៏ដោយ ក៏មិនប៉ះពាល់ដល់កិត្តិយសកម្ពុជា លើឆាកអន្តរជាតិដែរ ដោយសារតែប្រទេសមួយចំនួនក្នុងតំបន់ក៏បានសហការនឹងកូរ៉េខាងជើងផ្នែកសេដ្ឋកិច្ច។ លោកបន្តថា ការគោរពសិទ្ធិមនុស្សនៅកម្ពុជា នៅមានការខ្វះចន្លោះនៅឡើយ ដូច្នោះកម្ពុជាត្រូវពង្រឹងវិស័យសិទ្ធិមនុស្សជាមុនសិន ទើបអាចរិះគន់ការអនុវត្តសិទ្ធិមនុស្សប្រទេសដទៃ។
លោកបន្តថា ៖ «រឿងសិទ្ធិមនុស្ស យើងគិតរឿងក្នុងផ្ទះយើងសិន។ បើផ្ទះយើងមិនស្អាត គឺយើងទៅជួយគេ គឺប្រើប្រាស់ឥទ្ធិពលសម្រាប់ការគោរពសិទ្ធិមនុស្សក៏ពិបាកដែរ ហើយប្រទេសតិចណាស់ក្នុងពិភពលោកយកសិទ្ធិមនុស្សដាក់ក្នុងគោលនយោបាយក្រៅប្រទេសរបស់គេ»។
ចំណងមិត្តភាពជិតស្និទ្ធរវាងកម្ពុជា និងកូរ៉េខាងជើងបានចាប់ផ្ដើមតាំងពីទសវត្សឆ្នាំ១៩៦០ មកម្ល៉េះ ដោយសារតែព្រះមហាវីរក្សត្រខ្មែរ សម្ដេចព្រះបាទ នរោត្តម សីហនុ ជាមិត្តជិតស្និទ្ធជាមួយអតីតលោកសេនាប្រមុខ គឹម អ៊ីលស៊ុង (Kim Il Sung) ដែលជាឪពុករបស់មេដឹកនាំកូរ៉េខាងជើងបច្ចុប្បន្ន គឺលោក គឹម ជុងអ៊ិល (Kim Jong Il)៕