ការចរចានោះ គឺភាគីទាំងពីរមិនបានចុះសម្រុងគ្នាទេ ដោយសារតែភាគីនីមួយៗមានហេតុផលរៀងៗខ្លួន និងជំហរដាច់ខាតរៀងៗខ្លួនដែរ។
មន្ត្រីជាន់ខ្ពស់ក្រសួងមហាផ្ទៃ បានបដិសេធសំណើរួមគ្នារបស់គណបក្ស សម រង្ស៊ី និងគណបក្ស សិទ្ធិមនុស្ស ដែលបានស្នើសុំឲ្យរដ្ឋមន្ត្រីក្រសួងមហាផ្ទៃ លោក ស ខេង កែទម្រង់សមាសភាពរបស់ គ.ជ.ប ដោយសំអាងថា គឺជាសំណើដដែលដូចពេលមុនៗដែរ និងជាការមិនចាំបាច់ឡើយ។
ការបដិសេធនេះ គឺក្រោយពីរដ្ឋលេខាធិការក្រសួងមហាផ្ទៃ លោក ព្រំ សុខា តំណាងឲ្យលោក ស ខេង បានទទួលជួបចរចាជាមួយលោក យឹម សុវណ្ណ និងលោក គួយ ប៊ុនរឿង មកពីគណបក្ស សម រង្ស៊ី និងលោក ម៉ៅ មុន្នីវណ្ណ និងលោក អ៊ូ ច័ន្ទរិទ្ធិ មកពីគណបក្ស សិទ្ធិមនុស្ស នៅឯក្រសួងមហាផ្ទៃ។
គោលបំណងដែលគណបក្ស សម រង្ស៊ី និងគណបក្ស សិទ្ធិមនុស្ស សុំឲ្យកែទម្រង់ គ.ជ.ប នោះ គឺចង់ឲ្យ គ.ជ.ប មានភាពឯករាជ្យ អព្យាក្រឹត្យ និងទុកចិត្តពីមជ្ឈដ្ឋានជាតិ និងអន្តរជាតិ។
ចំណុចសំខាន់ៗដែលភាគីទាំងពីរមិនចុះសម្រុងគ្នានោះ គឺភាគីក្រសួងមហាផ្ទៃ បានចោទប្រកាន់ថា សំណើសុំឲ្យកែទម្រង់សមាសភាព គ.ជ.ប នោះ គឺបង្កឲ្យមានហានិភ័យខ្ពស់ ដូចជាអស្ថិរភាពជាតិ និងអស្ថិរភាពនយោបាយ និងរាំងស្ទះដល់ការបោះឆ្នោតជាដើម។ ចំណែកឯភាគីគណបក្ស សម រង្ស៊ី និងគណបក្ស សិទ្ធិមនុស្ស ក៏បានចោទប្រកាន់វិញថា ការមិនព្រមកែទម្រង់ គ.ជ.ប នោះ គឺបង្កឲ្យមានអស្ថិរភាពជាតិ មិនមានការឯកភាពជាតិ និងបង្កជម្លោះហិង្សានយោបាយជាដើម។
រដ្ឋលេខាធិការក្រសួងមហាផ្ទៃ លោក ព្រំ សុខា បានមានប្រសាសន៍នៅក្នុងសន្និសីទកាសែតនៅក្រសួងមហាផ្ទៃថា ក្រសួងមហាផ្ទៃបានកែទម្រង់សមាសភាព គ.ជ.ប នោះជាច្រើនលើករួចមកហើយ តាមសំណើគណបក្សប្រឆាំង តាំងពីឆ្នាំ១៩៩៨ មក។ សំណើថ្មីៗនេះ គឺរឿងដដែលៗ៖ «ឲ្យមានការកែលំអ គ.ជ.ប តាមបែបហ្នឹង គឺធ្វើឲ្យ គ.ជ.ប ហ្នឹងគាំង ធ្វើឲ្យដំណើរការបោះឆ្នោតគាំង ធ្វើឲ្យមានផលប៉ះពាល់ដល់ស្ថិរភាពនយោបាយ ស្ថិរភាពសង្គម។ មកដល់ថ្ងៃនេះ ប្រជាពលរដ្ឋយល់ថា ការបោះឆ្នោត ដូចអត់មានអ្វីរាំងស្ទះទេ»។
ផ្ទុយពីការអះអាងនេះ អ្នកនាំពាក្យគណបក្ស សម រង្ស៊ី លោក យឹម សុវណ្ណ និងជាតំណាងរាស្ត្រដែលបានដឹកនាំគណៈប្រតិភូចូលរួមចរចានោះ បានមានប្រសាសន៍នៅគណបក្ស សម រង្ស៊ី ថា គណបក្សប្រឆាំងទាំងពីរ នឹងពិចារណាអំពីការដកខ្លួនចេញពីការបោះឆ្នោតឆ្នាំ២០១៣ បើសិនណាមិនមានការសម្របសម្រួល ឬដំណោះស្រាយនយោបាយណាមួយទេ៖ «ឥឡូវនេះ ប្រជាពលរដ្ឋភាគច្រើន អន្តរជាតិ គណបក្សនយោបាយភាគច្រើន លើកលែងតែគណបក្សកាន់អំណាច ហើយនិងសង្គមស៊ីវិល បាត់ជំនឿទៅលើស្ថាប័ន គ.ជ.ប នេះ អ៊ីចឹងយើងត្រូវតែកែទម្រង់ ដើម្បីបង្កនូវជំនឿការទុកចិត្តមកលើស្ថាប័នមួយនេះ ហើយយើងនឹងកាត់បន្ថយជម្លោះថែមទៀត»។
ការស្នើសុំឲ្យកែទម្រង់សមាសភាព គ.ជ.ប នោះ គឺផ្នែកតាមច្បាប់បោះឆ្នោតដែលតម្រូវឲ្យក្រសួងមហាផ្ទៃធ្វើការកែទម្រង់ គ.ជ.ប ក្នុងរយៈពេល៩ខែ មុនការបោះឆ្នោតសកល នៅថ្ងៃទី២៨ ខែកក្កដា ឆ្នាំ២០១៣ ខាងមុខនេះ។
ស្របពេលនេះដែរ លោក ព្រំ សុខា បានឲ្យដឹងថា រដ្ឋមន្ត្រីក្រសួងមហាផ្ទៃ លោក ស ខេង និងជាឧបនាយករដ្ឋមន្ត្រី បានធ្វើបញ្ជីឈ្មោះសមាសភាព ដើម្បីកែទម្រង់ គ.ជ.ប នោះហើយ ដើម្បីដាក់បញ្ជីនោះជូនរដ្ឋាភិបាលសម្រេច។
កន្លងមក មេដឹកនាំគណបក្ស សម រង្ស៊ី លោក សម រង្ស៊ី និងមេដឹកនាំគណបក្ស សិទ្ធិមនុស្ស លោក គឹម សុខា បានធ្វើយុទ្ធនាការនៅក្រៅប្រទេសកម្ពុជា ដើម្បីសុំការគាំទ្រពីសហភាពអឺរ៉ុប អង្គការសហប្រជាជាតិ និងសហរដ្ឋអាមេរិក ជាដើម ឲ្យគាំទ្រឲ្យមានការកែទម្រង់ គ.ជ.ប និងបើកផ្លូវឲ្យលោក សម រង្ស៊ី វិលចូលប្រទេសកម្ពុជា វិញ ដើម្បីចូលរួមការបោះឆ្នោតនៅឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។