ប្រធានក្រុមអ្នកតំណាងរាស្ត្រគណបក្ស សម រង្ស៊ី លោក សុន ឆ័យ បានឲ្យវិទ្យុអាស៊ីសេរី ដឹងនៅថ្ងៃទី១២ ខែមីនា ថា លោក ម៉ៅ មុនីវណ្ណ បានដាក់ពាក្យលាឈប់ពីតំណាងរាស្ត្រមណ្ឌលកំពង់ចាម នៅថ្ងៃទី៣០ ខែមីនា ឆ្នាំ២០១១ តទៅ។ លោកថា ការលាឈប់នេះ លោក មុនីវណ្ណ បានដាក់ពាក្យជូនប្រធានគណបក្ស និងថ្នាក់ដឹកនាំគណបក្ស សម រង្ស៊ី ចាប់តាំងពីដើមខែមីនា មកម្ល៉េះ។
តាមការគូសបញ្ជាក់របស់លោក សុន ឆ័យ ការលាឈប់ពីតួនាទីអ្នកតំណាងរាស្ត្រមណ្ឌលកំពង់ចាម របស់លោក មុនីវណ្ណ គឺមិនមែនគណបក្សនេះមានជម្លោះផ្ទៃក្នុងគណបក្សនោះទេ គឺគ្រាន់តែជាការផ្លាស់ប្ដូរទៅតាមគណៈកម្មការអចិន្ត្រៃយ៍គណបក្សដែលបានសម្រេចឲ្យបេក្ខជនតំណាងរាស្ត្រនីមួយៗ ត្រូវធ្វើការផ្លាស់ប្ដូរមុខងារនៅពាក់កណ្ដាលអាណត្តិ។
លោក សុន ឆ័យ មានប្រសាសន៍ថា ៖ «ដូចបានដឹងហើយថា គាត់ត្រូវបានដកចេញពីតួនាទីប្រធានខេត្តកំពង់ចាមដ៏ធំ១ ជាខេត្តដ៏ធំជាងគេ។ តែគាត់មានអារម្មណ៍យ៉ាងណានោះ ខ្ញុំមិនបានដឹង។ ប៉ុន្តែអ្វីដែលគាត់ធ្វើការសម្រេចតាមដែលខ្ញុំដឹង បំណងរបស់គាត់ ខ្ញុំថា ជាសេចក្ដីសម្រេចដ៏ល្អមួយ ព្រោះជាអ្នកនយោបាយចាំបាច់ត្រូវឲ្យមានឆន្ទៈ គោរពការសន្យារបស់ខ្លួនឲ្យបានត្រឹមត្រូវ។ កាលណាផ្លាស់ប្ដូរការសន្យាម្ដងហើយម្ដងទៀត អាចធ្វើឲ្យខូចកិត្តិយសរបស់ខ្លួន»។
ទាក់ទងបញ្ហានេះ លោក ម៉ៅ មុនីវណ្ណ មានប្រសាសន៍ថា ការលាឈប់ពីតំណាងរាស្ត្រមណ្ឌលកំពង់ចាម របស់លោក គឺមិនមែនគណបក្ស សម រង្ស៊ី បណ្ដេញរូបលោក ឬក៏ផ្ទៃក្នុងបក្សប្រេះស្រាំនោះទេ គឺជាបញ្ហាផ្ទាល់ខ្លួន និងធ្វើទៅតាមសេចក្ដីសម្រេចរបស់គណៈកម្មការអចិន្ត្រៃយ៍បក្សប៉ុណ្ណោះ ហើយរូបលោកក៏មិនបានទៅចុះចូលជាមួយគណបក្សផ្សេងណាទេ គឺនៅជាមួយគ្នាបក្ស សម រង្ស៊ី រហូត និងឈរឈ្មោះជាបេក្ខជនតំណាងរាស្ត្រជាថ្មីទៀត នៅឆ្នាំ២០១៣ ខាងមុខ។
លោក ម៉ៅ មុនីវណ្ណ បន្ថែម ៖ «ជាបញ្ហាផ្ទាល់ខ្លួនរវាងខ្ញុំជាមួយនឹងសកម្មជនគណបក្ស សម រង្ស៊ី នៅខេត្តកំពង់ចាម ខ្ញុំបាននិយាយជាសាធារណៈនៅមុនពេលបោះឆ្នោត។ ខ្ញុំនិយាយថា បើខ្ញុំដឹកនាំនៅខេត្តកំពង់ចាម បានតែ ៥កៅអីដដែលទេ ខ្ញុំនឹងលាលែងពីតំណាងរាស្ត្រ ខ្ញុំធ្វើតែពាក់កណ្ដាលអាណត្តិទេ ហើយជាសេចក្ដីសម្រេចរបស់គណៈកម្មការអចិន្ត្រៃយ៍គណបក្សនៅពេលនោះ»។
យ៉ាងណាក៏ដោយ មន្ត្រីសង្គមស៊ីវិលមួយចំនួននៅកម្ពុជា បានលើកឡើងថា ការលាឈប់ពីតួនាទីតំណាងរាស្ត្ររបស់លោក មុនីវណ្ណ អាចជាសញ្ញាបែកបាក់ផ្ទៃក្នុង និងនាំឲ្យគណបក្សនេះបាត់បង់ប្រជាប្រិយភាពក្នុងការបោះឆ្នោតនាថ្ងៃខាងមុខ។
លោកបណ្ឌិត ហង្ស ពុទ្ធា ទីប្រឹក្សាគ្រប់គ្រងអង្គការនិចហ្វិក (NECFFEC) បានចាត់ទុកការលាឈប់ពីតួនាទីជាតំណាងរាស្ត្ររបស់គណបក្សប្រឆាំងនៅមុនការបោះឆ្នោត២០១២ និង២០១៣ អាចនាំឲ្យបក្សនេះបាត់បង់ការគាំទ្រពីប្រជាពលរដ្ឋ និងបានបង្ហាញពីការបែកបាក់ផ្ទៃក្នុងបក្សប្រឆាំងមួយនេះ។
លោក គល់ បញ្ញា នាយកប្រតិបត្តិអង្គការខុមហ្វ្រែល (COMFREL) បានបញ្ចេញទស្សនៈថា ការលាឈប់ពីតួនាទីរបស់លោក ម៉ៅ មុនីវណ្ណ ពីតំណាងរាស្ត្រ គឺបានជះឥទ្ធិពលតិចតួចដល់ប្រជាប្រិយភាពគណបក្សប្រឆាំងមួយនេះ ប៉ុន្តែមិនធ្ងន់ធ្ងរទេ ព្រោះប្រព័ន្ធបោះឆ្នោតនៅកម្ពុជា ជាប្រព័ន្ធសមាមាត្រ មិនមែនជាការបោះឆ្នោតឯកត្តនាម។
លោក គល់ បញ្ហា បានឲ្យដឹងដូច្នេះ ៖ «វាមានឥទ្ធិពលដែរ ក៏ប៉ុន្តែវាមិនមានឥទ្ធិពលដូចប្រព័ន្ធឯកត្តនាមទេ។ បើប្រព័ន្ធឯកត្តនាមវិញ បើសិនជាបុគ្គលមានការប្រែប្រួលតាមមណ្ឌលនីមួយៗដែលជាអ្នកតំណាងរាស្ត្រ ឬជាអ្នកនយោបាយរបស់គណបក្សណាមួយ ប្រសិនបើមានការឈប់ការអីអ៊ីចឹង វាអាចធ្វើឲ្យមានការប្រែប្រួលទៅលើគណបក្សច្រើន»។
ប្រភពពីគណបក្ស សម រង្ស៊ី បានឲ្យដឹងថា លោក ម៉ៅ មុនីវណ្ណ តំណាងរាស្ត្រមណ្ឌលកំពង់ចាម កាលពីពេលថ្មីៗនេះ ត្រូវបានផ្លាស់ប្ដូរពីប្រធានក្រុមការងារគណបក្សមណ្ឌលកំពង់ចាម និងដាក់ជំនួសមកវិញដោយលោក គួយ ប៊ុនរឿន។ ការផ្លាស់ប្ដូរនេះ បង្កឲ្យមានប្រតិកម្មច្រើនពីសកម្មជនគណបក្សនេះនៅតាមមូលដ្ឋានមួយចំនួនក្នុងខេត្តកំពង់ចាម ដែលឈានដល់ធ្វើការទម្លាក់ស្លាកសញ្ញាគណបក្សនេះអស់ប្រមាណ ២០ស្លាកកាលពីខែកុម្ភៈ កន្លងទៅនេះ៕