គណបក្សសមរង្ស៊ី បានប្រកាសកាលពីថ្ងៃព្រហស្បតិ៍ ទី៥ សីហាថា អ្នកយកព័ត៌មានកម្មវិធីភ្លើងទៀនរបស់គណបក្សសមរង្ស៊ី និងអ្នកនិពន្ធសៀវភៅ ដែលក្រសួងអប់រំបានបញ្ជាឲ្យរឹបអូស កាលពីខែកក្កដាកន្លងទៅនេះ បានរត់ភៀសខ្លួនទៅកន្លែងមានសុវត្ថិភាព បន្ទាប់ពីមានការព្រមានសម្លាប់ពីអ្នកទូរស័ព្ទមិនស្គាល់អត្តសញ្ញាណ កាលពីថ្ងៃទី១៩ កក្កដា កន្លងមក។
លោកស្រី មូរ សុខហួរ អ្នកតំណាងរាស្ត្រគណបក្សសមរង្ស៊ី ប្រាប់វិទ្យុអាស៊ីសេរីនៅថ្ងៃព្រហស្បតិ៍ថា លោក ប៉ែន ពុទ្ធសភា កំពុងរស់នៅលាក់ខ្លួនដោយមានការព្រួយបារម្ភពីសុវត្ថិភាពរបស់លោក បន្ទាប់ពីមានការគំរាមសម្លាប់មក។ លោកស្រីថា អ្នកទូរស័ព្ទមកលោក ប៉ែន ពុទ្ធសភា គំរាមមិនឲ្យលោក ប៉ែន ពុទ្ធសភា បន្តការងាររបស់លោក។
លោកស្រីបន្ថែមថា ការគំរាម និងការរឹបអូសសៀវភៅជាការបំបិទសិទ្ធិផ្នែកបញ្ចេញមតិនៅកម្ពុជា។
ក្រសួងអប់រំបានបញ្ជាក់ជំពូកក្នុងសៀវភៅ ដែលមិនមានន័យសមស្រប មានដូចជា ការសរសេរថា "ទៅថ្ងៃអនាគតតើកម្ពុជា នឹងអភិវឌ្ឍដែរឬទេ?" និងសំណួរបន្ថែមថា "តើអ្នកគិតដូចម្ដេចដែរ ចំពោះវិស័យសិទ្ធិមនុស្សនៅកម្ពុជា?" ចម្លើយឆ្លើយទៅនឹងសំណួរក្នុងសៀវភៅនេះ មានដូចជា "រដ្ឋាភិបាលនឹងមិនអាចដឹកនាំប្រទេសឲ្យរីកចំរើនបាន ដោយសារអំពើពុករលួយ"។
សេចក្ដីប្រកាសព័ត៌មានរបស់គណបក្សជំទាស់ គឺគណបក្សសមរង្ស៊ី បានបញ្ជាក់ថា លោក ប៉ែន ពុទ្ធសភា ជាអ្នកយកព័ត៌មានរបស់គណបក្ស ហើយលោកត្រូវបានឃ្លាំមើលពីសំណាក់រដ្ឋាភិបាល ដើម្បីគំរាម និងគាបសង្កត់សិទ្ធិសេរីភាព ផ្នែកបញ្ចេញមតិរបស់គណបក្ស ក្នុងការបោះពុម្ពផ្សាយ។
អ្នកលក់សៀវភៅរបស់លោក ប៉ែន ពុទ្ធសភា ដែលសុំមិនបញ្ចេញឈ្មោះ បានឲ្យដឹងថា អាជ្ញាធរបានហាមឃាត់លោកស្រី មិនឲ្យលក់សៀវភៅនេះបន្តទៅទៀតទេ បើមិនដូច្នោះលោកស្រីនឹងមានបញ្ហា។ លោកស្រីថា កន្លងមកសៀវភៅនេះ លក់ក្នុងតម្លៃមួយពាន់រៀល ក្នុងមួយក្បាល។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានប្រាប់វិទ្យុអាស៊ីសេរីនៅថ្ងៃព្រហស្បតិ៍ថា សមត្ថកិច្ចនៅមិនទាន់ទទួលបានបណ្ដឹងរបស់គណបក្សជំទាស់ ទាក់ទងនឹងការគំរាមរបស់ជនមិនស្គាល់មុននៅឡើយទេ។ លោកស្នើឲ្យគណបក្សជំទាស់សហការជាមួយសមត្ថកិច្ច ដើម្បីស្វែងរកជនល្មើស។
វិទ្យុអាស៊ីសេរីមិនអាចសុំអត្ថាធិប្បាយពីអ្នកនាំពាក្យរដ្ឋាភិបាល និងរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ជុំវិញការរឹបអូសសៀវភៅនេះទេ នៅថ្ងៃព្រហស្បតិ៍នេះ។
កន្លងមក រដ្ឋាភិបាលកម្ពុជាធ្លាប់បានចាប់សាស្ត្រាចារ្យ និងអតីតសាស្ត្រាចារ្យផ្នែកនយោបាយ ទៀង ណារិទ្ធ ដាក់គុកចំនួន២ឆ្នាំកន្លះ កាលពីឆ្នាំ២០០៧ បន្ទាប់ពីលោកបាននិពន្ធសៀវភៅរិះគន់រដ្ឋាភិបាល រួមមានលោកនាយរដ្ឋមន្ត្រី ហ៊ុន សែន និងមន្ត្រីជាន់ខ្ពស់ដទៃទៀត។ ក្នុងសៀវភៅរបស់លោក ចេញផ្សាយនៅឆ្នាំ២០០៦ និង២០០៧ បានចោទប្រកាន់លោក ហ៊ុន សែន នៅពីក្រោយការវាយប្រហារគ្រប់បែក នៅឆ្នាំ១៩៩៧៕