បុគ្គលិកក្រុមហ៊ុន NAGA WORLD ជាច្រើននាក់ រួមទាំងបុគ្គលិកដែលក្រុមហ៊ុនទើបបានបញ្ឈប់ និងមិនទាន់បានបញ្ឈប់ពីការងារ នៅថ្ងៃ១៣ មេសានេះ បានជួបជុំគ្នានៅខាងមុខក្រុមហ៊ុន បន្ទាប់ពីថៅកែក្រុមហ៊ុនបានបញ្ឈប់ពួកគេជាបន្តបន្ទាប់ដោយគ្មានមូលហេតុ។
កញ្ញា សាន់ ម៉ូលីតា បុគ្គលិកក្រុមហ៊ុន NAGA WORLD ផ្នែកចែកបៀរយៈពេលជាងមួយឆ្នាំ បានឲ្យដឹងថា គាត់ត្រូវបានអ្នកគ្រប់គ្រងក្នុងក្រុមហ៊ុនបញ្ឈប់ពីការងារភ្លាមៗ ដោយពុំមានសេចក្តីជូនដំណឹង និងបញ្ជាក់ពីមូលហេតុ ឬបញ្ជាក់ពីកំហុសណាមួយឡើយ។
កញ្ញា សាន់ ម៉ូលីតា បានបញ្ជាក់ថា ៖ «ពេលដែលនាងខ្ញុំចែកបៀឲ្យភ្ញៀវហ្នឹង មិនទាន់បានមួយម៉ោងផង ទៅជួបគេ។ ខ្ញុំសួរគេ មានការអីដែរ? "បង! គេបានបញ្ឈប់បងឯងហើយ! គេឲ្យបងឯងរើអីវ៉ាន់ចេញទៅ" ខ្ញុំថា ខ្ញុំអត់បញ្ហាទេ តែខ្ញុំចង់និយាយថា ម៉ោងនេះគឺម៉ោងខ្ញុំធ្វើការ បើសិនជាខ្ញុំចេញដោយអត់មានលិខិតស្នាមអីបញ្ជាក់ ខ្ញុំខ្លាចគេនឹងចោទខ្ញុំ អាប់សង់(អវត្តមាន)ថ្ងៃនេះ។ គុណលុយឲ្យខ្ញុំបាន ៥១៥,១៥ (ដុល្លារ) មានបាត់លុយយប់ បាត់លុយធីបអីច្រើនណាស់! និយាយទៅរៀបរាប់មិនអស់ទេ! គឺមិនត្រឹមត្រូវទាំងអស់។ អ៊ីចឹងគេក្រៀកខ្ញុំចេញ គេអូសខ្ញុំចេញ គេឲ្យសន្តិសុខមកយកនាងខ្ញុំចេញ!»។
កញ្ញា ថេត សុផាន់ណារី បំរើការងារក្នុងក្រុមហ៊ុន NAGA WORLDចំនួន ៧ឆ្នាំមកហើយ ដែលត្រូវបានអ្នកគ្រប់គ្រងក្នុងក្រុមហ៊ុនបញ្ឈប់ដែរនោះ បានអះអាងស្រដៀងគ្នានេះដែរថា ៖ «បញ្ឈប់ពួកខ្ញុំហើយ គេមានបុគ្គលិក Stand by សម្រាប់ជំនួសពួកខ្ញុំទៀត ព្រោះឈប់ក្នុងអំឡុងពេលហ្នឹងគឺត្រូវបុណ្យចូលឆ្នាំអ៊ីចឹង ស្ថាប័នរដ្ឋគឺគេឈប់ អ៊ីចឹងហើយខ្ញុំអត់ដឹងថា ខាងណាអាចជួយខ្ញុំបានទេ។ ខ្ញុំគិតថា គាត់ធ្វើអ៊ីចឹងគឺខុសច្បាប់ហើយ ខ្ញុំអត់ដឹងពីមូលហេតុច្បាស់លាស់។ ករណីដែលថា បញ្ឈប់គេហ្នឹង គឺមានខុសច្បាប់ ដូចជាលួចកាក់ ព្រោះការងារនៅហ្នឹងគឺប៉ះពាល់រឿងលុយកាក់ ប៉ះពាល់របស់ក្រុមហ៊ុនអីអ៊ីចឹង ប្រហែលជាគេបញ្ឈប់យើងទៅវាស្របច្បាប់ យើងអត់មានពាក្យអ្វីនិយាយតវ៉ាទេ! តែនេះអត់ដឹងមានមូលហេតុអីច្បាស់លាស់!»។
ក្រុមបុគ្គលិក NAGA WORLD ដែលឈរនៅខាងមុខក្រុមហ៊ុនបានអះអាងថា រហូតមកដល់រសៀលថ្ងៃទី១៣ ខែមេសានេះ អ្នកគ្រប់គ្រងក្រុមហ៊ុនបានបញ្ឈប់បុគ្គលិកចំនួន ៣៨នាក់ហើយ ជាមួយគ្នានេះក៏នៅមានបុគ្គលិកមួយចំនួនទៀតក៏នឹងត្រូវប្រឈមនឹងការបញ្ឈប់ដូចគ្នានេះដែរ ៖ «គេប្រាប់ថា ថ្ងៃទី១៣ហ្នឹង នឹងមាន ៦០នាក់ទៀត។ ឥឡូវនេះឮព័ត៌មានថា គេកំពុងតែឆូត Highlight ឈ្មោះហើយ អ្នកដែលគេបានបញ្ឈប់...»។
នាយកផ្នែកធនធានមនុស្សនៃក្រុមហ៊ុន NAGA WORLDលោក ក្រេហ្គោរី ហ្គូស (Gregory Goh) បានបដិសេធមិនផ្តល់ការបំភ្លឺណាមួយឡើយជុំវិញមូលហេតុនៃការបញ្ឈប់ និងចំនួនបុគ្គលិកដែលត្រូវបានបញ្ឈប់នោះទេ។
នៅថ្ងៃនេះវិទ្យុអាស៊ីសេរីមិនអាចទាក់ទងសុំការបំភ្លឺពីមន្រ្តីក្រសួងការងារ និងបណ្តុះបណ្តាលវិជ្ជាជីវៈ បាននៅឡើយទេ ដោយក្រសួងឈប់សម្រាកនៅក្នុងអំឡុងពេលបុណ្យចូលឆ្នាំថ្មី។
បុគ្គលិក NAGA WORLD ដែលឈរជួបប្រជុំគ្នានៅខាងក្រុមហ៊ុន បានឲ្យដឹងទៀតថា កាលពីថ្ងៃទី២៦ កុម្ភៈ ឆ្នាំ២០០៩ អ្នកគ្រប់គ្រងក្រុមហ៊ុន NAGA WORLD បានបញ្ឈប់ថ្នាក់ដឹកនាំសហជីពនៅក្នុងក្រុមហ៊ុនចំនួន ១៤នាក់។ បន្ទាប់មកនៅថ្ងៃទី១៦ ខែកុម្ភៈ ឆ្នាំ២០១០ ក្រុមប្រឹក្សាអាជ្ញាកណ្តាលបានចេញសេចក្តីបង្គាប់បញ្ជាឲ្យក្រុមហ៊ុនយកបុគ្គលិកសហជីពចំនួន ៤នាក់ចូលធ្វើការវិញ ក៏ប៉ុន្តែក្រុមហ៊ុនបានបដិសេធ ដោយសារតែបញ្ហានេះ នៅថ្ងៃទី៨ ខែមីនា ឆ្នាំ២០១០ បុគ្គលិកជាង ១ពាន់នាក់បាននាំគ្នាធ្វើពហិការមិនចូលធ្វើការ ដោយសុំឲ្យតំណាងសហជីពរបស់ពួកគេបានចូលធ្វើការវិញ ក៏ប៉ុន្តែពុំមានដំណោះស្រាយពីក្រុមហ៊ុនឡើយ៕