ថៃ​បង្កើន​ការល្បាត​ព្រំដែន​ក្រោយ​ពី​មាន​ការផ្ទុះ​អាវុធ​ដាក់​គ្នា​រវាង​ទាហាន​ខ្មែរ​-ថៃ

មេបញ្ជាការ​វរ​ការពារ​ព្រំដែន​បាន​ថ្លែង​ថា កង​ទ័ព​ថៃ​នៅ​តែ​មាន​សកម្មភាព​ចល័ត​និង​ល្បាត​នា​ពេល​យប់​ជា​បន្ត​បន្ទាប់ នៅ​តាម​បណ្ដោយ​ព្រំដែន​នៃ​ភាគ​ពាយ័ព្យ​ប្រទេស​កម្ពុជា ប៉ុន្តែ​មិន​មាន​ការផ្ទុះ​អាវុធ​កើត​ឡើង​ដាក់​គ្នា​នោះ​ទេ។

0:00 / 0:00

ថ្លែង​ប្រាប់​វិទ្យុ​អាស៊ីសេរី នៅ​ថ្ងៃ​ចន្ទ ទី​៦ ខែ​តុលា​នេះ លោក ម៉ៅ រ៉ៃ មេបញ្ជាការ​វរ​សេនា​តូច​ការពារ​ព្រំដែន លេខ​៨០៧ បាន​ឲ្យ​ដឹង​ថា កម្លាំង​ប្រដាប់​អាវុធ​ថៃ បាន​ល្បាត​តាម​រថពាស​ដែក​នៅ​ពេល​យប់​ជា​បន្ត​បន្ទាប់ ក្រោយ​ពី​មាន​ហេតុការណ៍​បាញ់​ប្រហារ​គ្នា​មួយ​ឈុត​នៅ​ឯ​តំបន់​ភ្នំទ្រព្យ​ខេត្ត​ព្រះវិហារ។

លោក ម៉ៅ រ៉ៃ មាន​ប្រសាសន៍​ដូច្នេះ​ថា ៖ «វា​ចល័ត​ផ្លាស់​ប្ដូរ​វេន​គ្នា ម៉ោង​១២ ម៉ោង​១ វា​ចាប់ផ្ដើម​អា​ស្គុត​វា​ចេញ​ល្បាត នៅ​ពេល​យប់ ដល់​ពេល​ម៉ោង​៤ ម៉ោង​៥​ភ្លឺ វា​ចូល​បន្ទាយ​វិញ​អស់»

ចាប់តាំង​ពី​មាន​ហេតុការណ៍​បាញ់​ប្រហារ​គ្នា​រវាង​កង​ទ័ព​រដ្ឋាភិបាល​ខ្មែរ​និង​ទាហាន​ឈុត​ខ្មៅ​ថៃ នៅ​វាល​ព្រលាន​ឥន្រ្ទី តំបន់​ភ្នំទ្រព្យ ខេត្ត​ព្រះវិហារ កាល​ពី​ថ្ងៃ​សុក្រ សប្ដាហ៍​កន្លង​ទៅ ដែល​បណ្ដាល​ឲ្យ​ភាគី​ទាំង​សង​ខាង​រងរបួស​រៀង​ខ្លួន​មក ទាហាន​ឈុត​ខ្មៅ​ថៃ បាន​បង្កើន​សកម្មភាព​ចល័ត​និង​ល្បាត​កងទ័ព​ខុស​ពី​ធម្មតា។

លោក ឈូក អាង មេបញ្ជាការ​វរ​សេនា​តូច​ការពារ​ព្រំដែន លេខ​៩១១ បាន​ថ្លែង​ថា ថ្វី​ត្បិត​មិន​មាន​ហេតុការណ៍​អ្វី​កើត​ឡើង​រហូត​មក​ដល់​ថ្ងៃ​ចន្ទ​នេះ​ក៏​ដោយ ប៉ុន្តែ​ភាគី​ថៃ នៅ​តែ​មាន​សកម្មភាព​ចល័ត​កងទ័ព​ជា​បន្ត​បន្ទាប់​នៅ​ពេល​យប់។

លោក ឈូក អាង មាន​ប្រសាសន៍​ថា ៖ «វា​ចល័ត​ចុះ​ឡើង ផ្លូវ​ទី​១ ផ្លូវ​ទី​២ ធម្មតា ប៉ុន្តែ​ផ្លូវ​ទី​៣ ជាប់​ព្រំដែន​ហ្នឹង​នៅ​ធម្មតា​ទេ។ ប្ដូរ​ពី​ភូមិសាស្រ្ដ​មួយ ទៅ​ភូមិសាស្រ្ដ​មួយ ភូមិសាស្រ្ដ​ចាស់​មក​ថ្មី ថ្មី​ទៅ​ចាស់​អ៊ីចឹង​ទៅ ប្ដូរ​គ្នា​ចុះ​ឡើងៗ»

ពលរដ្ឋ​ខ្មែរ​ម្នាក់​ដែល​ធ្វើ​ដំណើរ​ចេញ​ចូល​ទឹក​ដី​ថៃ បាន​ថ្លែង​ថា សកម្មភាព​ទាហាន​ឈុត​ខ្មៅ​ថៃ ក្នុង​រយៈពេល​ប៉ុន្មាន​ថ្ងៃ​នេះ បាន​ធ្វើ​ឲ្យ​មាន​ការព្រួយ​បារម្ភ​យ៉ាង​ខ្លាំង​ចំពោះ​ស្ថានការណ៍​សន្តិសុខ​នៅ​តាម​ព្រំដែន​ខ្មែរ​ថៃ ៖ «ជ្រួល​ទៅ​ជ្រួល​មក វា​ដឹក​ដាក់​ទៅ ដឹក​ដាក់​មក​អ៊ីចឹង នៅ​ខាង​ថៃ​ហ្នឹង ថ្ងៃ​វា​អត់​ធ្វើ​ទេ យប់​វា​ដឹក​ចុះ​ដឹក​ឡើងៗ»

ទោះ​បី​យ៉ាង​ណា​ក៏​ដោយ បើ​តាម​លោក​ឧត្ដមសេនីយ៍​ទោ សុខ ភាព ប្រធាន​ការិយាល័យ​ទំនាក់​ទំនង​ព្រំដែន​ខ្មែរ​ថៃ នៅ​ច្រក​ទ្វារ​អន្តរជាតិ​ប៉ោយប៉ែត បាន​ថ្លែង​ថា មេបញ្ជាការ​កង​ទ័ព​ថៃ ដែល​មាន​ទំនាក់​ទំនង​ជាមួយ​គ្នា​កន្លង​មក ត្រូវ​បាន​ផ្លាស់ប្ដូរ​ចេញ​ទាំង​អស់ ប៉ុន្តែ​លោក​បញ្ជាក់​ថា បញ្ហា​ទាំង​នោះ​មិន​ធ្វើ​ឲ្យ​ប៉ះពាល់​ដល់​ដំណើរការ​ទំនាក់​ទំនង​គ្នា​ឡើយ។

លោក សុខ ភាព ថ្លែង​ដូច្នេះ​ថា ៖ «ថៃ​ហ្នឹង​ពី​មុន​ផ្លាស់​ទៅ​អស់​ហើយ មក​អ្នក​ថ្មី ឥឡូវ​ដូរ​ថ្មី​មក​អស់​ហើយ កំពុងតែ​ទាក់ទង​គ្នា​ដែរ»

ប្រធាន​ច្រក​អន្តរជាតិ​ដូង នៅ​ស្រុក​កំរៀង ខេត្ត​បាត់ដំបង លោក ញ៉ឹក ពេជ្រ បាន​ថ្លែង​ថា តាម​បណ្ដោយ​ព្រំដែន​ខ្មែរ​ថៃ​ជាប់​ខេត្ត​បាត់ដំបង សកម្មភាព​កង​ទ័ព​ថៃ​គ្មាន​អ្វី​គួរ​ឲ្យ​កត់​សម្គាល់​ទេ ប៉ុន្តែ​ខាង​អាជ្ញាធរ​ថៃ​បាន​រឹត​បន្តឹង​សន្តិ​សុខ នៅ​តាម​ព្រំដែន​ខុស​ពី​ធម្មតា។

ចាប់​តាំង​ពី​មាន​ការបាញ់​ប្រហារ​គ្នា​មួយ​ឈុត ប្រហែល​១០​នាទី កាល​ពី​ថ្ងៃ​សុក្រ ទី​៣ ខែ​តុលា សប្ដាហ៍​កន្លង​ទៅ កម្លាំង​ប្រដាប់​អាវុធ​ការពារ​ព្រំដែន​ខ្មែរ​បាន​កត់​សម្គាល់​ឃើញ​ថា ភាគី​ថៃ​បាន​ចល័ត​កងទ័ព​តាម​រថពាស​ដែក​និង​រថយន្ត​យ៉ាង​គគ្រឹក​គគ្រេង ជាពិសេស​នៅ​ពេល​យប់ ចំណែក​ឯ​កម្លាំង​រដ្ឋាភិបាល​ខ្មែរ ក៏​បាន​ពង្រឹង​ការពារ​របស់​ខ្លួន​ផង​ដែរ៕