មន្ត្រីជំនួយការប្រតិបត្តិនៃកងយោធពលខេមរភូមិន្ទក្នុងវរលេខ៨១ដែលកំពុងត្រៀមប្រយុទ្ធនៅខ្សែត្រៀមជួរមុខតំបន់វាលឥន្ទ្រីបានមានប្រសាសន៍ថា កងទាហានខ្មែរបានត្រៀមលក្ខណៈប្រយុទ្ធតាំងតែពីម៉ោង១២រំលងអធ្រាត្រថ្ងៃពុធ ខណៈដែលមានការផ្តល់ដំណឹងថាទាហានថៃបានព្យាយាមជំរុលចូលមកព្រំដែនខ្មែរ ហើយកាលពីព្រឹកថ្ងៃពុធមានទាហានកុម្ម៉ង់ដូថៃខ្លះបានព្យាយាមលូនចូលមករកខ្សែត្រៀមទាហានខ្មែរ។
មន្ត្រីដដែលបានឲ្យដឹងថា ៖ «ពេលព្រឹកវាលូនមកវាលឥន្ទ្រី ជាន់មីនតែអត់ផ្ទុះ ប៉ះមីនស្អុយ ហើយវាបាញ់បួនដប់គ្រាប់ទៀត»។
ចំណែកមន្ត្រីកងរាជអាវុធហត្ថដែលកំពុងប្រចាំការនៅលើខ្នងភ្នំប្រាសាទព្រះវិហារបានមានប្រសាសន៍ប្រហាក់ប្រហែលគ្នានេះដែរថា កាលពីវេលាម៉ោងជាង៦កន្លះព្រឹកថ្ងៃពុធមានកងកុម្ម៉ង់ដូថៃមួយក្រុមបានព្យាយាមជំរុលចូលមកក្នុងតំបន់វាលឥន្ទ្រី ខ្សែត្រៀមទាហានខ្មែរ ធ្វើឲ្យកងទាហានខ្មែរនៅតាមចំណុចព្រំដែនជាច្រើនជិតប្រាសាទព្រះវិហារបានត្រៀមខ្លួនប្រយុទ្ធជាថ្មី ៖ «កំពុងតែតឹងតែង កំពុងតែត្រៀមលក្ខណៈរៀងខ្លួន ពួកខ្ញុំពួកអីត្រៀមខ្លួន»។
ក៏ប៉ុន្តែការអះអាងរបស់កងទាហានការពារព្រំដែនខ្មែរនេះត្រូវបានច្រានចោលដោយមន្ត្រីយោធាថៃភ្លាមៗដែរ។
វរសេនីយ៍ឯកដែលជាមន្ត្រីទំនាក់ទំនងព្រំដែនថៃកម្ពុជាប្រចាំខេត្តស៊ីសាកេតដែលប្រចាំការនៅតំបន់ព្រំដែនស្រុកកាន់ថារ៉ាឡាក់មួយរូបសុំមិនបញ្ចេញឈ្មោះបានបដិសេធកាលពីព្រឹកថ្ងៃពុធថា ទាហានថៃមិនបានចូលទៅតំបន់វាលឥន្រ្ទីទេ ហើយក៏មិនមានការបាញ់កាំភ្លើងនៅទីនោះដែរដោយខាងយោធាថៃបានពិនិត្យរកបញ្ហានេះរួចហើយ ៖ "មិនមានទេតាមការត្រួតពិនិត្យរួចរាល់អស់ហើយ ទាហានថៃមិនបានចូលទៅតំបន់វាលឥន្ទ្រីទេ ហើយការបាញ់កាំភ្លើងក៏មិនមានដែរ គឺមានតែទាហានខ្មែរប៉ុណ្ណោះដែលនិយាយចេញព័ត៌មានបែបនេះ"។
សូមរំឭកថា បញ្ហាជម្លោះព្រំដែនរវាងខ្មែរថៃនៅតំបន់ជាច្រើនបានចាប់ផ្តើមពីថ្ងៃទី១៥ ខែកក្កដា ឆ្នាំ២០០៨ ដែលមកដល់ពេលនេះបានអូសបន្លាយរយៈពេល១០ខែមកហើយមិនមានដំណោះស្រាយប្រសើរក្នុងការដោះស្រាយជម្លោះនោះទេ។
កាលពីថ្ងៃទី៦និងទី៧ ខែមេសាកន្លងមកថ្មីៗ គណៈកម្មការព្រំដែនគោករបស់រាជរដ្ឋាភិបាលខ្មែរថៃបានជួបចរចាគ្នាម្តងទៀតដើម្បីស្វែងរកដំណោះស្រាយប្រសើរបញ្ចប់បញ្ហាជម្លោះព្រំដែនដោយភាគីកម្ពុជាបានទាមទារឲ្យប្រទេសថៃដកកងទ័ពចេញពីទីវត្តកែវសិខាគិរីស្វរៈតំបន់ជុំវិញវត្តនិងតំបន់ជិតប្រាសាទព្រះវិហារ ក៏ប៉ុន្តែភាគីថៃមិនបានឆ្លើយតបចំពោះការទាមទាររបស់កម្ពុជានៅឡើយទេ ហើយថៃបានទាមទារដាក់ឈ្មោះប្រាសាទព្រះវិហារទៅជាប្រៈវិហានតាមភាសាថៃមិនអាចត្រូវរ៉ូវគ្នាបាន៕