លោកប្រធាន មឿង សុន បានលើកហេតុផលជាឧបសគ្គធំៗពីរដោយបានចោទប្រកាន់បទអត្ថាធិប្បាយនានាធ្វើឡើងដោយអ្នកអត្ថាធិប្បាយល្បីឈ្មោះ គឺលោក សយ សុភាព នៅទូរទស្សន៍ស៊ីធីអិន ថាជាឧបសគ្គធំមួយបង្កើតភាពជាប់គាំងនៃសំណើរបស់ក្រុមលោក។
លោកឲ្យដឹងថា អត្ថាធិប្បាយនោះមានរួមទាំងការចោទប្រកាន់របស់អ្នកធ្វើអត្ថាធិប្បាយថា សំណើរបស់លោកជាអំពើច្រងេងច្រងាងដែលបណ្តាលឲ្យមានអរិភាពរវាងប្រទេសជិតខាងទាំងពីរទៀតផង។
ទោះបីយ៉ាងណាក្តី យើងមិនអាចសុំប្រតិកម្មពីលោក សយ សុភាព ទៅនឹងពាក្យចោទប្រកាន់របស់លោក មឿង សុន នៅពេលនេះបានភ្លាមៗទេ។
លោកប្រធានមូលនិធិទ្រទ្រង់អរិយធម៌ខ្មែរ មឿង សុន បានឲ្យដឹងនូវឧបសគ្គដទៃទៀតដូច្នេះ ៖ «ហើយអវិជ្ជមានទី២ទៀត គឺយើងពុំឃើញមានការឆ្លើយតបពីរាជរដ្ឋាភិបាលយើងក្នុងការអំពាវនាវរបស់យើងសុំឲ្យរាជរដ្ឋាភិបាលយើងជួយធ្វើអន្តរាគមន៍ដល់ប្រទេសថៃដើម្បីឲ្យថៃសងដល់ប្រជាពលរដ្ឋយើង ក៏ដូចជាប្រទេសថៃក៏ពុំមានឆ្លើយនឹងការស្នើរបស់យើងដែរ»។
លោក មឿង សុន ឲ្យដឹងទៀតថា លោកនឹងចាត់វិធានការស្របច្បាប់ទាំងអស់ដែលអាចធ្វើទៅបានដើម្បីឲ្យប្រទេសថៃគោរពនូវភាពថ្លៃថ្នូរនិងការរស់ដោយសុខសន្តិភាពនៃពលរដ្ឋដែលស្រឡាញ់សន្តិភាព។
លោក មឿង សុន បានមានប្រសាសន៍ថា ៖ «យើងនឹងធ្វើលិខិតទៅអង្គការសហប្រជាជាតិសុំឲ្យជួយធ្វើអន្តរាគមន៍ឲ្យថៃឆ្លើយតបនឹងលិខិតរបស់យើង។ យើងធ្វើលិខិតទៅស្ដេចថៃទៀតឲ្យជួយធ្វើអន្តរាគមន៍ដល់រដ្ឋាភិបាលឲ្យឆ្លើយនឹងការទាមទាររបស់យើងដែលធ្វើជួសមុខឲ្យប្រជាពលរដ្ឋ ហើយនិងធ្វើលិខិតពិនិត្យជូនទៅរាជរដ្ឋាភិបាលដើម្បីឲ្យលោកជួយធ្វើអន្តរាគមន៍ទៀត»។
គួររំឭកផងដែរថា ក្នុងអតីតកាលប្រទេសកម្ពុជាធ្លាប់ទទួលសងការខូចខាតស្ថានទូតប្រទេសថៃដែលបណ្តាលឡើងដោយពលរដ្ឋនៃប្រទេសកម្ពុជា៕