តាមទីភ្នាក់ងារសារព័ត៌មាន អេអេហ្វភី (AFP) បានឲ្យដឹងថា ប្រទេសថៃបានកោះហៅឯកអគ្គរាជទូតតំណាងប្រទេសខ្លួនទៅប្រទេសថៃវិញ នារសៀលថ្ងៃ៥ វិច្ឆិកានេះ ក្រោយពេលប្រទេសកម្ពុជាបានប្រកាសតែងតាំងលោក ថាក់ស៊ីន ឈីនណាវ៉ាត្រ (Thaksin Shinawatra) ជាទីប្រឹក្សាសេដ្ឋកិច្ចរបស់រដ្ឋាភិបាលនិងជាទីប្រឹក្សាផ្ទាល់របស់លោកនាយករដ្ឋមន្រ្តី ហ៊ុន សែន។
តាមទីភ្នាក់ងារសារព័ត៌មាន អេអេហ្វភី បានឲ្យដឹងទៀតថា លោកនាយករដ្ឋមន្រ្តីថៃ អាភីស៊ិត វេតឆាឈីវ៉ាក់ (Abhisit Vejjajiva) បានមានប្រសាសន៍ថា ការកោះហៅទូតទៅវិញនេះជាការចាត់ការខាងផ្លូវទូតឲ្យប្រទេសកម្ពុជាដឹងថា ប្រជាពលរដ្ឋថៃមិនពេញចិត្តចំពោះទង្វើរបស់ប្រទេសកម្ពុជានោះទេ។
តាមទីភ្នាក់ងារសារព័ត៌មាន អេអេហ្វភី បានឲ្យដឹងទៀតថា លោកនាយករដ្ឋមន្រ្តីថៃ អាភីស៊ិត វេតឆាឈីវ៉ាក់ បានចាត់ទុកថា ទង្វើរបស់ប្រទេសកម្ពុជាគឺមានគ្រោះថ្នាក់ដល់ប្រព័ន្ធតុលាការថៃនិងប៉ះពាល់ដល់អារម្មណ៍របស់ប្រជាពលរដ្ឋថៃ។
លោកនាយករដ្ឋមន្រ្តីថៃបានឲ្យដឹងទៀតថា ជំនួយមកកម្ពុជាត្រូវផ្អាក ប៉ុន្តែច្រកឆ្លងកាត់ប្រទេសទាំងពីរនៅបើកជាធម្មតា។
បើតាមលោក កុយ គួង មន្រ្តីអ្នកនាំពាក្យរបស់ក្រសួងការបរទេសកម្ពុជា បានឲ្យដឹងថា ៖ «យើងបានទទួលព័ត៌មានតាមបណ្ដាញសារព័ត៌មានហ្នឹងដែរ យើងអត់ទាន់មានលិខិតផ្លូវការពីភាគីថៃ បង្ហាញទេ។ ខ្ញុំអត់បានជ្រាបទេមកដល់ពេលនេះ អត់បានទទួលព័ត៌មានផ្លូវការផង។ ជាទូទៅគេត្រូវជូនដំណឹងឲ្យយើងដឹងពីមូលហេតុ ហើយនិងកាលបរិច្ឆេទដែលត្រូវដក។ នេះគេហៅថា Recall (ហៅត្រឡប់មកវិញ) ហើយខ្ញុំបានទទួលតាមបណ្ដាញសារព័ត៌មាននានាដែរទេ គេថា នេះគ្រាន់តែ Recall ហើយជាវិធានការទី១ផ្នែកការទូត ហើយគេបានបញ្ជាក់នៅក្នុងបណ្ដាញសារព័ត៌មានហ្នឹងទៀតថា ទំនាក់ទំនងប្រជាជន ក៏ដូចជាតំបន់ឆ្លងកាត់ព្រំដែននៅរក្សាដដែលទេ»៕