អធិការនគរបាលស្រុកត្រពាំងប្រាសាទ លោក កែវ ប៉ាន់ បានមានប្រសាសន៍កាលពីព្រឹកថ្ងៃអាទិត្យ ទី២០ ខែធ្នូ ថា ប្រជាពលរដ្ឋខ្មែរម្នាក់ឈ្មោះ ផន សារិទ្ធិ អាយុ៣៧ឆ្នាំ ជាអ្នកចំណាកស្រុកមកស្នាក់នៅភូមិជ្រៃ ឃុំត្រពាំងប្រាសាទ ត្រូវទាហានថៃនៃស្រុកខាន់ថារៈឡាក់ ខេត្តស៊ីសាកេត បាញ់ស្លាប់កាលពីព្រឹកថ្ងៃសៅរ៍ ទី១៩ ខែធ្នូ នៅតំបន់ខ្នងភ្នំដងរែក ជាប់ភូមិសាស្ត្រនៃឃុំត្រពាំងស្វាយ ខណៈដែលអ្នកភូមិនាំគ្នាចំនួន២៥នាក់ចូលទៅក្នុងព្រំដែនថៃដើម្បីកាប់ឈើ។ ក្រុមគ្រួសារអ្នករងគ្រោះទើបតែទៅយកសាកសពកាលពីព្រឹកថ្ងៃអាទិត្យ ទី២០ ខែធ្នូ។
លោក កែវ ប៉ាន់ មានប្រសាសន៍ឲ្យដឹងដូច្នេះ ៖ «នៅខ្នងភ្នំដងរែក កន្លែងហ្នឹងគ្មានភូមិគ្មានអីទេ គឺទៅរកឈើព្រៃហ្នឹង។ ក្រុមគ្រួសារឡើងទៅទទួលយក តែអត់ទាន់ដល់ផ្ទះទេ តែយកចេញមកផុតហើយ»។
អភិបាលស្រុកត្រពាំងប្រាសាទ លោក វណ្ណ កុសល បានមានប្រសាសន៍ថា អាជ្ញាធរស្រុកបានខិតខំផ្សព្វផ្សាយនិងអប់រំប្រជាពលរដ្ឋនៅទីនោះកុំឲ្យឆ្លងដែនទៅប្រកបរបរក្នុងទឹកដីថៃជៀសវាងគ្រោះថ្នាក់ ក៏ប៉ុន្តែដោយសារបញ្ហាអត់ឃ្លាន ប្រជាពលរដ្ឋខ្មែរខ្លះនៅតែប្រថុយផ្សងនឹងគ្រោះថ្នាក់ឆ្លងដែនដដែល ហើយមួយចំនួនគឺជាអ្នកចំណាកស្រុកពីទីឆ្ងាយមកប្រកបរបរនៅទីនោះ។ អាជ្ញាធរបានឲ្យដឹងថា គេនឹងចាប់ផ្តើមរឹតបន្តឹងប្រជាពលរដ្ឋខ្មែរមិនឲ្យឆ្លងដែនទៅរកស៊ីក្នុងទឹកដីថៃទៀតទេ។
លោក វណ្ណ កុសល មានប្រសាសន៍ដូច្នេះ ៖ «ព្រំប្រទល់ គាត់ចេះតែចេញចូល។ យើងបានធ្វើការអប់រំផ្សព្វផ្សាយដល់គាត់ជាបន្តបន្ទាប់។ ចាប់ផ្តើមរឹតបន្តឹងថែមទៀតហើយ ព្រោះបងប្អូនដែលមកនេះភាគច្រើនមិនមែនជាអ្នកមូលដ្ឋានប៉ុន្មានទេ ច្រើនតែអ្នករកស៊ីចំណាកស្រុកមកមួយថ្ងៃពីរថ្ងៃ»។
អាជ្ញាធរស្រុកត្រពាំងប្រាសាទ បានឲ្យដឹងថា គិតត្រឹមពីរសប្តាហ៍មុនរហូតមកដល់ពេលនេះ មានប្រជាពលរដ្ឋខ្មែរចំនួន៣ហើយនាក់ត្រូវទាហានថៃ នៃស្រុកខាន់ថារៈឡាក់ ខេត្តស៊ីសាកេត បាញ់ស្លាប់ និងម្នាក់ទៀតបានរងរបួស ដែលក្រុមគ្រួសារទើបរកឃើញនៅរស់កាលពីពេលថ្មីៗ។
ចាប់តាំងពីអំឡុងខែកញ្ញា ឆ្នាំ២០០៩ រហូតមកដល់ពេលនេះ នៅខេត្តឧត្តរមានជ័យ ចំនួនប្រជាពលរដ្ឋខ្មែរដែលត្រូវទាហានថៃបាញ់ស្លាប់ បានកើនឡើងដល់៦នាក់ ចំណែក២នាក់ទៀតបានរងរបួសនិងម្នាក់ទៀតត្រូវទាហានថៃនៃស្រុកកាប់ជើង ខេត្តសុរិន្ទ ចាប់យកទៅកាត់ទោសមិនទាន់ដោះលែងនៅឡើយ៕