មេបញ្ជាការកងពលធំលេខ៣ ដែលកំពុងគ្រប់គ្រងយោធាខ្មែរនៃតំបន់ជម្លោះជិតប្រាសាទព្រះវិហារលោកឧត្តមសេនីយ៍ទោ ស្រី ឌឹក បានមានប្រសាសន៍កាលពីព្រឹកថ្ងៃច័ន្ទ ទី១៨ ខែឧសភា ថា លោកបានរៀបចំដាក់សំណើទៅមេបញ្ជាការយោធាថៃដែលកាន់កាប់តំបន់ទល់មុខគ្នានោះដើម្បីរកពេលជួបជជែកគ្នារកដំណោះស្រាយប្រសើរក្នុងការជំរុញឲ្យដកទាហានថៃចេញពីតំបន់នោះ ជៀសវាងឲ្យផុតពីការដែលអាចឈានទៅរកប្រើប្រាស់អាវុធ។
លោកឧត្ដមសេនីយ៍ទោ ស្រី ឌឹក មានប្រសាសន៍ដូច្នេះថា ៖ «កំពុងតែខិតខំដោះស្រាយវែកញែកអំពីបញ្ហាតំបន់ភូមិសាស្ត្រ ... ដើម្បីចាត់ចែងឲ្យវាល្អនឹងគ្នា ជៀសឲ្យផុតពីការផ្ទុះអាវុធ។ តំបន់ហ្នុង បើមិនទាន់មានកងទ័ពទេ យើងក៏មិនទៅដែរ យើងគ្រាន់តែហាមឃាត់ទៅវិញទៅមក។ យើងធ្វើអ្វីក៏ដោយ ទាល់តែយើងមានបទបញ្ជា ប៉ុន្តែយើងបានគោលការណ៍សម្ដេចហើយ គឺមួយមីលីម៉ែត្រយើងមិនទៅ ហើយមួយមីលីម៉ែត្រក៏យើងមិនឲ្យមក»។
ទោះយ៉ាងណា លោកឧត្តមសេនីយ៍ ស្រី ឌឹក បានមានប្រសាសន៍ថា ពុំទាន់មានការឆ្លើយតបពីមេបញ្ជាការយោធាថៃឲ្យដឹងពីពេលវេលាច្បាស់លាស់នៃការជួបប្រជុំបញ្ហានោះនៅឡើយទេ។
ចំណែកមន្ត្រីទំនាក់ទំនងការងារព្រំដែនថៃ-កម្ពុជាប្រចាំខេត្តស៊ីសាកេត ដែលកំពុងធ្វើការនៅតាមព្រំដែនតំបន់ជម្លោះមួយរូបដែលសុំមិនបញ្ចេញឈ្មោះ បានមានប្រសាសន៍ឆ្លើយតបថា លោកពុំបានដឹងអំពីព័ត៌មាននោះនៅឡើយទេ ប៉ុន្តែលោកបដិសេធថា ទាហានថៃពុំបានរំលោភបូរណភាពទឹកដីខ្មែរនៅតំបន់ភ្នំចាក់ច្រែងនោះទេ ៖ «ខ្ញុំមិនបានដឹងទេអំពីបញ្ហានោះ តែទាហានថៃអះអាងថា មិនមានការរំលោភលើបូរណភាពទឹកដីខ្មែរនៅតំបន់នោះទេ គឺពួកគេរស់នៅដោយកិត្តិយស ដោយម្នាក់ៗនៅតាមទីកន្លែងដូចមុនដដែលរៀងៗខ្លួន»។
តាមទាហានខ្មែរនៅតំបន់ប្រាសាទព្រះវិហារបានអះអាងថា ទាហានប៉ារ៉ាថៃនៅក្នុងកងពលទី៦ បានចូលមកបោះជំរំនៅតំបន់ចាក់ច្រែងនៅភាគខាងលិចឈៀងខាងជើងចម្ងាយប្រមាណ ៧គីឡូម៉ែត្រពីប្រាសាទព្រះវិហារនិងបានរំលោភចូលព្រំដែនខ្មែរផងដែរ ៖ «ច្រើនតែប៉ារ៉ា កងពលលេខ៦ វាចូលមកជាង ២០នាក់ យើងបាននិយាយថា បើវាអត់ដកចេញទេ យើងនឹងយកកម្លាំងយើងដាក់ គឺវាដាក់ប៉ុន្មាន គឺយើងដាក់ប៉ុណ្ណឹង ដាក់ទល់មុខគ្នា»។
តាមមន្ត្រីយោធាខ្មែរនៃកងពលលេខ៨ ដែលកាន់កាប់តំបន់ជម្លោះចាប់ពីវាលឥន្ទ្រីរហូតខ្នងភ្នំទ្រព្យ ច្រកតាសឹម និងតំបន់ចាក់ច្រែងនោះ បានអះអាងថា កងទាហានប៉ារ៉ាថៃប្រមាណ ២០នាក់ បានចូលមកដើរល្បាតនិងបោះជំរំនៅលើពើយខ្នងភ្នំចាក់ច្រែងនោះ នៅក្រោយពេលដែលមានការប៉ះប្រយុទ្ធគ្នាចុងក្រោយរវាងទាហានខ្មែរ-ថៃនៅជិតប្រាសាទព្រះវិហារកាលពីដើមខែមេសា៕