អគ្គបញ្ជាការរងនៃកងយោធពលខេមរភូមិន្ទដែលគ្រប់គ្រងកងយោធាខ្មែរនៅតាមតំបន់ថៃចូលបោះទីតាំងខុសច្បាប់ជិតប្រាសាទព្រះវិហារ លោកឧត្តមសេនីយ៍ឯក ជា តារា បានមានប្រសាសន៍កាលពីព្រឹកថ្ងៃច័ន្ទ ទី២០ ខែកក្កដា ថា ការជួបប្រជុំរវាងមេបញ្ជាការយោធាខ្មែរនិងមេបញ្ជាការកងពលទី៦ ស៊ូរ៉ាក់ណារី របស់ថៃ កាលពីពេលថ្មីៗគឺថៃបានស្នើសុំឲ្យមានការដើរល្បាតរួមគ្នារវាងទាហានខ្មែរ-ថៃនៅតាមតំបន់ព្រំដែនមួយចំនួនដែលទ័ពថៃកំពុងចូលបោះទីតាំងខុសច្បាប់នៅជិតប្រាសាទព្រះវិហារចាប់ពីតំបន់ច្រកតាសឹមរហូតដល់ខ្នងភ្នំចាក់ច្រែង។
លោកឧត្តមសេនីយ៍ឯក ជា តារា បានមានប្រសាសន៍ទៀតថា មេបញ្ជាការយោធាខ្មែរប្រចាំតំបន់នោះបានទទួលយកសំណើរបស់មេបញ្ជាការយោធាថៃនោះ ក៏ប៉ុន្តែមានលក្ខខណ្ឌមួយចំនួនដែលត្រូវកំណត់គឺការដើរល្បាតរួមគ្នានោះនឹងមិនឲ្យចូលទៅក្នុងទឹកដីថៃនិងក៏មិនឲ្យចូលមកក្នុងទឹកដីខ្មែរដែរ គឺអាចដើរល្បាតបានតែតំបន់ណាដែលជាចន្លោះកណ្តាលតែប៉ុណ្ណោះ ប៉ុន្តែគេនៅមិនទាន់កំណត់បានថាតំបន់ណាដែលអាចដើរល្បាតបាននៅឡើយទេ។
លោកឧត្តមសេនីយ៍ឯក ជា តារា ថ្លែងដូច្នេះថា ៖ «ចាំមើលការកំណត់ការល្បាត ល្បាតនៅត្រង់ណា ពីណាទៅណា ប៉ុន្តែមិនទាន់ឆ្លើយតប...»។
ទាក់ទិននឹងតំបន់ព្រំដែនលើខ្នងភ្នំចាក់ច្រែង មេបញ្ជាការយោធាខ្មែរឲ្យដឹងថា គេបានកំណត់ឲ្យទាហានថៃ ដែលបានចូលមកបោះទីតាំងខុសច្បាប់នោះ លុបចោលលេណដ្ឋានទាំងអស់ហើយ។
ទោះយ៉ាងណានៅថ្ងៃច័ន្ទនេះ មិនអាចទំនាក់ទំនងមេបញ្ជាការយោធាថៃណាមួយដើម្បីពន្យល់បញ្ហានោះបានទេ។
ជម្លោះព្រំដែនរវាងខ្មែរ-ថៃនៅជុំវិញតំបន់ប្រាសាទព្រះវិហារបានកើតឡើងចាប់តាំងពីថៃបានបញ្ជូនកងទ័ពរាប់រយនាក់ចូលមកក្នុងទីវត្តខ្មែរកែវសិខាគិរីស្វរៈ កាលពីថ្ងៃទី១៥ ខែកក្កដា ឆ្នាំ២០០៨ ដោយតាមរយៈការទូតកន្លងមក មន្ត្រីរដ្ឋាភិបាលខ្មែរបានប្រឹងប្រែងរកដំណោះស្រាយយ៉ាងខ្លាំងតាមរយៈការជួបចរចាគ្នាជាមួយមន្ត្រីរដ្ឋាភិបាលថៃជាច្រើនលើក ប៉ុន្តែគ្មានដំណោះស្រាយប្រសើរទេរហូតមកដល់ពេលនេះ។
ប្រធានគណៈកម្មាធិការដោះស្រាយបញ្ហាព្រំដែនកម្ពុជា លោក វ៉ា គឹមហុង បានមានប្រសាសន៍ថា រហូតមកដល់ពេលនេះ មន្ត្រីរដ្ឋាភិបាលខ្មែរ-ថៃមិនមានគម្រោងជួបចរចាណាមួយជុំវិញបញ្ហាវិបត្តិព្រំដែនទៀតទេ ដោយសារតែនៅរង់ចាំការបញ្ជាក់ពីភាគីថៃ ៖ «អត់ទាន់មានទេរហូតមកដល់ពេលនេះ យើងចាំការបញ្ជាក់ពីថៃម្ដងទៀត»។
សូមបញ្ជាក់ថា ចាប់តាំងពីថៃបានបញ្ជូនកងទ័ពចូលមកក្នុងទីវត្តកែវសិខាគិរីស្វរៈ នាថ្ងៃទី១៥ ខែកក្កដា ឆ្នាំ២០០៨ រហូតមកដល់ថ្ងៃទី២០ ខែកក្កដា ឆ្នាំ២០០៩នេះ មានរយៈពេលមួយឆ្នាំ និង ៥ថ្ងៃមកហើយ ដោយមានការប៉ះទង្គិចគ្នាចំនួន៣លើកមកហើយ បណ្តាលឲ្យទាហានទាំងសងខាងស្លាប់និងរងរបួសមួយចំនួន៕