មន្ត្រីជាន់ខ្ពស់កងយោធពលខេមរភូមិន្ទ និងក្រសួងការបរទេសកម្ពុជា នៅថ្ងៃអង្គារ ទី៥ ខែតុលា បានស្វាគមន៍ការដកកងទ័ពរបស់ថៃ នៅតំបន់ជម្លោះក្បែរប្រាសាទព្រះវិហារ ដោយមន្ត្រីកម្ពុជា បានលើកឡើងថា ការដកទ័ពរបស់ភាគីថៃ នឹងអាចជំរុញឲ្យកម្ពុជា និងថៃ អាចបន្តការចរចាទ្វេភាគី ដើម្បីបញ្ចប់ជម្លោះព្រំដែនដែលបានអូសបន្លាយជាងពីរឆ្នាំមកហើយ។
ឧត្ដមសេនីយ៍ផ្កាយ៤ ជា តារា អគ្គបញ្ជាការរងនៃកងយោធពលខេមរភូមិន្ទ ដែលទទួលបន្ទុកការពារព្រំដែនតំបន់ប្រាសាទព្រះវិហារ នៅថ្ងៃអង្គារ ទី៥ ខែតុលា ប្រាប់វិទ្យុអាស៊ីសេរីឲ្យដឹងថា កងទ័ពថៃ នៅខ្សែប្រយុទ្ធទីពីរចំនួនជាង ១ពាន់នាក់ បានដកចេញពីតំបន់ជម្លោះក្បែរប្រាសាទព្រះវិហារនៅថ្ងៃអង្គារ។
លោក ជា តារា បន្តទៀតថា តាំងពីជំនួបរវាងនាយករដ្ឋមន្ត្រីកម្ពុជា លោក ហ៊ុន សែន និងលោក អាភីស៊ិត វេតឆាឈីវ៉ាក់ (Abhisit Vejjajeva) កាលទីខែកញ្ញា នៅទីក្រុងញូវយ៉ក (New York) សហរដ្ឋអាមេរិកមក កងទ័ពកម្ពុជា និងថៃ នៅក្នុងតំបន់ជម្លោះព្រំដែន បានឈប់ប្រឈមមុខដាក់គ្នា ហើយបានរួបរួមគ្នាបង្កើតបរិយាកាសស្និទ្ធស្នាលដោយបានបរិភោគបាយជាមួយគ្នា។
ការដកកងទ័ពរបស់ថៃ ធ្វើឡើងមួយថ្ងៃបន្ទាប់ពីលោក ហ៊ុន សែន និងលោក អាភីស៊ិត វេតឆាឈីវ៉ាក់ បានជួបគ្នា នៅក្នុងទីក្រុងប្រ៊ូសែល (Brussels) ប្រទេសប៊ែលហ្សិក (Belgium) នៅក្រៅមហាសន្និបាតអាស៊ី-អឺរ៉ុប (ASEM) ដោយបានផ្ដោតលើការស្វែងរកដោះស្រាយលើបញ្ហាផ្សេងៗ ដូចជា បញ្ហាសម្រួលកងកម្លាំងទ័ពនៅតាមបណ្ដោយព្រំដែនកម្ពុជា-ថៃ និងការស្ដារទំនាក់ទំនងរវាងប្រទេសទាំងពីរឲ្យកាន់តែរឹងមាំថែមទៀត។
ទោះជាយ៉ាងណាក៏ដោយ លោក ជា តារា បានឲ្យដឹងថា ថៃនៅតែរក្សាទុកកងទ័ពមួយចំនួននៅតាមតំបន់ព្រំដែន ហើយនិងកងទ័ពថៃ ដែលលោកហៅថា ជាកងទ័ពឈ្លានពានចំនួន ១០នាក់ នៅក្នុងវត្តកែវសិក្ខាគិរីស្វារៈរបស់កម្ពុជា ដែលមានទីតាំងប្រមាណជាង ៣០០ម៉ែត្រប៉ុណ្ណោះពីប្រាសាទព្រះវិហារ។ លោកថា ប្រសិនបើកងទ័ពថៃ ដកកងទ័ពខ្លួនចំនួន ១០នាក់នេះទៀត ស្ថានការណ៍នៅតំបន់ព្រំដែននឹងវិលត្រឡប់ទៅរកភាពធម្មតាវិញ។
លោក ជា តារា មានប្រសាសន៍បន្ថែមថា ៖ «កងទ័ពរបស់ថៃ យើងឃើញថា គាត់មានជំហរល្អណាស់។ ឥឡូវនេះគឺមានភាពធូរស្រាល គាត់បានដកកម្លាំងខ្សែត្រៀមទី២ ដើម្បីទៅក្រោយវិញ ហើយក្នុងរយៈពេលប៉ុន្មានថ្ងៃនេះ គឺនៅចំណុចមួយៗមានការជួបគ្នារវាងកងទ័ពកម្ពុជា និងថៃ»។
អ្នកនាំពាក្យក្រសួងការបរទេសកម្ពុជា លោក កុយ គួង នៅថ្ងៃអង្គារ ទី៥ ខែតុលា មានប្រសាសន៍ឲ្យដឹងថា ការដកកងទ័ពរបស់ថៃ នឹងអនុញ្ញាតឲ្យកម្ពុជា និងថៃ អាចបន្តការចរចាដើម្បីបញ្ចប់ជម្លោះព្រំដែនបាន បើទោះបីជាកន្លងមកកម្ពុជា ធ្លាប់បានស្នើឲ្យអង្គការសហប្រជាជាតិ និងសមាគមអាស៊ាន ជួយសម្របសម្រួលជម្លោះព្រំដែនកម្ពុជា និងថៃ ក៏ដោយ។
លោក កុយ គួង បន្ថែមទៀតថា កម្ពុជាកំពុងរង់ចាំសភារបស់ថៃ ធ្វើការអនុម័តលទ្ធផលនៃកិច្ចចរចាព្រំដែនចំនួនបីជាមុនសិន មុននឹងបន្តការចរចាបន្ថែមទៀត ៖ «បញ្ហានេះ គឺជាសញ្ញាមួយដ៏ល្អនៃទំនាក់ទំនងនៃប្រទេសទាំងពីរ ដើម្បីធ្វើឲ្យបញ្ហាប្រឈមផ្នែកយោធាធូរស្បើយ ដូច្នេះឈានទៅមុខ ការដោះស្រាយសន្តិវិធីកាន់តែមានលក្ខណៈឈានទៅមុខបាន»។
ថ្លែងនៅក្នុងពិធីប្រគល់សញ្ញាបត្រដល់និស្សិតនៅវិទ្យាស្ថានជាតិអប់រំ កាលពីថ្ងៃទី២៩ ខែកញ្ញា លោក ហ៊ុន សែន បានអះអាងថា ក្រោយពីលោកបានជួបលោក អាភីស៊ិត វេតឆាឈីវ៉ាក់ លោកបានទទួលការសន្យាអំពីការផ្ដល់សច្ចាប័នពីសភាថៃ ក្រោយពីមានការចរចាអំពីជម្លោះខ្មែរ-ថៃ ចំនួន ៣លើកកន្លងមកនេះ។
លោកនាយករដ្ឋមន្ត្រីបានបញ្ជាក់ថា លោកមិនបានទុកចោលចំពោះការប្ដឹងទៅអន្តរជាតិនោះទេ ប៉ុន្តែលោកបានជ្រើសរើសនូវការចរចាទ្វេភាគីជាមួយប្រទេសថៃឡើងវិញ ដើម្បីបញ្ចៀសការប្រឈមមុខដាក់គ្នា កុំឲ្យមានការប៉ះទង្គិចគ្នាដោយអាវុធ និងទប់ស្កាត់ការរីករាលដាលទំនាស់តាមបណ្ដោយព្រំដែនខ្មែរ-ថៃ បន្ថែមទៀត ប្រយោជន៍ដើម្បីអភិវឌ្ឍន៍តំបន់ទល់ដែន។
មន្ត្រីវិភាគនយោបាយធ្លាប់បានព្រមានរដ្ឋាភិបាលកម្ពុជា រួចហើយ មិនឲ្យកម្ពុជា បន្តកិច្ចចរចាទ្វេភាគីជាមួយថៃ ពីព្រោះការចរចាកន្លងមកវាគ្មានលទ្ធផលអ្វីទាំងអស់ ដោយភាគីថៃ គ្មានឆន្ទៈក្នុងការចរចាជាលក្ខណៈទ្វេភាគីនោះទ។ ប៉ុន្តែលោក កុយ គួង មានប្រសាសន៍ថា កម្ពុជានឹងមិនបោះបង់ចោលការសម្រុះសម្រួលជាលក្ខណៈអន្តរជាតិនោះទេ។ កម្ពុជានឹងបន្តការចរចាទ្វេភាគី ហើយប្រសិនការចរចានេះគ្មានលទ្ធផល កម្ពុជានឹងបន្តទៅដល់ការចរចាជាលក្ខណៈពហុភាគី។
ជម្លោះព្រំដែនកម្ពុជា និងថៃ កើតឡើងដោយសារថៃ បានអះអាងដោយសំអាងពីការគូសផែនទីដោយឯកតោភាគីថា តំបន់ ៤,៦គីឡូម៉ែត្រការ៉េជាទឹកដីរបស់ខ្លួន ប៉ុន្តែកម្ពុជា ប្រកាសថា គ្មានតំបន់ ៤,៦គីឡូម៉ែត្រការ៉េ ដូចជាការលើកឡើងរបស់ថៃនោះទេ។
សង្គ្រាមពាក្យសម្ដីរវាងកម្ពុជា និងថៃ បានផ្ទុះឡើងជាថ្មីម្តងទៀត កាលពីចុងខែកក្កដា ក្រោយពេលដែលគណៈកម្មាធិការបេតិកភណ្ឌពិភពលោក បានទទួលយកផែនការគ្រប់គ្រងប្រាសាទព្រះវិហារខ្មែរ។ ថៃបានជំទាស់ទៅនឹងការទទួលយកផែនការគ្រប់គ្រងប្រាសាទព្រះវិហារខ្មែរ ដោយខ្លួនខ្លាចកម្ពុជា ដាក់បញ្ចូលដីតំបន់ក្បែរប្រាសាទព្រះវិហារ ៤,៦គីឡូម៉ែត្រក្រឡា ក្នុងផែនការគ្រប់គ្រងនោះ៕