ស្តីពីបញ្ហានេះប្រធានគណៈកម្មការព្រំដែនរបស់រដ្ឋាភិបាលខ្មែរបានជំរុញឲ្យអាជ្ញាធរខេត្តនិងកងកម្លាំងរាយការណ៍បញ្ហានេះទៅក្រសួងមហាផ្ទៃនិងគណៈកម្មការរបស់លោក។
កងកម្លាំងការពារព្រំដែនបានថ្លែងថា ភាគីថៃបានបង្ខិតបង្គោលព្រំដែនចូលលើទឹកដីកម្ពុជានៅចំណុចភ្នំតាលួសនិងចំណុចភ្នំបើកត្បាល់ក្នុងភូមិសាស្រ្តស្រុកភ្នំព្រឹក ខេត្តបាត់ដំបង ជាប់ស្រុកខ្លងហាត ខេត្តស្រះកែវថៃ។
ការអះអាងនេះគឺបានធ្វើឡើងបន្ទាប់ពីកងកម្លាំងការពារព្រំដែនខ្មែរបានប្រើផែនទីប្រទេសកម្ពុជាធ្វើការប្រៀបធៀបជាមួយផែនទីឯកតោភាគីថៃ ហើយរកឃើញថាថៃបានបង្ខិតបង្គោលព្រំដែនចូលលើទឹកដីខ្មែរ។
មេបញ្ជាការវរសេនាតូចការពារព្រំដែន៨១៧ លោក ស្រី សុខុន បានថ្លែងប្រាប់វិទ្យុអាស៊ីសេរីនាព្រឹកថ្ងៃអាទិត្យ ទី១ ខែមីនា ថា កម្លាំងរដ្ឋាភិបាលខ្មែរបានប្រើបា្រស់ផែនទីកម្ពុជា ឆ្នាំ១៩៦១ ពិនិត្យមើលរកឃើញថា ភាគីថៃបានបង្ខិតបង្គោលព្រំដែនចូលលើទឹកដីខ្មែរ មានកន្លែងខ្លះចូល៤០ម៉ែត្រ កន្លែងខ្លះចូល៧០ម៉ែត្រ និងកន្លែងខ្លះទៀតចូល១៥០ម៉ែត្រ នៅភូមិសាស្រ្តព្រំដែនស្រុកភ្នំព្រឹក ខេត្តបាត់ដំបង។
លោក ស្រី សុខុន បានឲ្យដឹងថា ៖ «កន្លែងហ្នឹងគឺថាយើងប្រៀបធៀបផែនទីរបស់យើងឆ្នាំ១៩៦១ ហើយនិងប្រៀបធៀបផែនទីឯកតោភាគីរបស់គាត់ ដល់យើងយកផែនទីហ្នឹងប្រៀបធៀបគ្នា អ៊ីចឹងវាខុសគ្នា នៅភ្នំតាលួសបើកត្បាល់វាជាទឹកដីរបស់កម្ពុជា ប៉ុន្តែការប្រៀបធៀបផន់គាត់ហ្នឹងឃើញថា គាត់ជ្រុលចូលមកខាងដីយើង»។
អភិបាលរងខេត្តបាត់ដំបង លោក សៀង ស៊ុតថង បានថ្លែងថា បញ្ហាខាងលើនេះបានកើតមានឡើងតំាងពីសម័យកម្ពុជាធ្វើសមាហរណកម្មកងកម្លាំងប្រដាប់អាវុធនាអំឡុងឆ្នាំ១៩៩៦ តែអាជ្ញាធរខេត្តមិនដែលបានផ្ទៀងផ្ទាត់ផែនទីទេ ប៉ុន្តែខាងយោធភូមិភាគ៥ជាអ្នកធ្វើកិច្ចការនេះ។
លោកបន្តថា តាមព័ត៌មានពីយោធភូមិភាគទី៥គឺបានរកឃើញថា មានបង្គោលព្រំដែនខ្លះក្នុងខេត្តបាត់ដំបងជាប់ប្រទេសថៃត្រូវបានគេលួចរំកិល ៖ «សន្និដ្ឋានថាមានការកាប់ មានការលើករំកិល»។
លោកអភិបាលរងខេត្តបានបញ្ជាក់ថា អាជ្ញាធរខេត្តមិនអាចដោះស្រាយបញ្ហាខាងលើនេះបានទេ គឺមានតែគណៈកម្មាធិការព្រំដែនរបស់រដ្ឋាភិបាលប៉ុណ្ណោះដែលដោះស្រាយជាមួយប្រទេសថៃបាន។
ប្រធានគណៈកម្មាធិការព្រំដែនរដ្ឋាភិបាលខ្មែរ លោក វ៉ា គឹមហុង បានមានប្រសាសន៍ថា លោកមិនទាន់ទទួលបានព័ត៌មាននេះទេ។ លោកបានបន្តថា កងកម្លាំងការពារព្រំដែននិងអាជ្ញាធរខេត្តគួររាយការណ៍ទៅក្រសួងមហាផ្ទៃនិងគណៈកម្មាធិការព្រំដែនរដ្ឋាភិបាលដើម្បីដោះស្រាយ ៖ «សុំឲ្យខាងព្រំដែនដឹងផង បានជួយដោះស្រាយ»។
យោងតាមរបាយការណ៍វរសេនាតូចការពារព្រំដែន៨១៧បានបញ្ជាក់ថា ថៃបានបង្ខិតបង្គោលព្រំដែនតាមបន្ទាត់ផ្តេកចាប់ពីខាងកើតមានកន្លែងខ្លះរំលោភចូល៤០ម៉ែត្រ កន្លែងខ្លះ៧០ម៉ែត្រ និងកន្លែងខ្លះទៀត១៥០ម៉ែត្រ គិតបន្ទាត់បញ្ឈរពីខាងជើងទៅត្បូងមានប្រវែង៣២៥០ម៉ែត្រចូលមកលើទឹកដីខ្មែរ ហើយថៃបានធ្វើផ្លូវកៅស៊ូកាត់លើទឹកដីខ្មែរនៅចំណុចភ្នំតាលួសនិងភ្នំបើកត្បាល់ ស្រុកភ្នំព្រឹក ខេត្តបាត់ដំបង ជាប់ស្រុកខ្លងហាត ខេត្តស្រះកែវថៃ។
គួរបញ្ជាក់ថា ក្នុងខេត្តបាត់ដំបងមានព្រំប្រទល់ជាប់ជាមួយខេត្តបីរបស់ថៃ គឺខេត្តស្រះកែវ ខេត្តត្រាត និងខេត្តចាន់បូរី៕